Лидерот на Левица, Димитар Апасиев, на својот Фејсбук профил објави дека се спрема кривичната пријава за попречување на правдата која му ја најави на премиерот на последната седница за пратенички прашања.

„Правниот тим на Левица ја подготвува кривичната пријава против премиерот Мицкоски, за сторено кривично дело против правосудството – попречување на правдата, казниво по чл. 369-а, ст. 5 од Кривичниот законик. Постојат разумни основи за сомневање дека постапката за разрешување на Јавниот обвинител на РМ е стопирана со цел да се насочи истрагата и, преку владино прикривање и влијание, да се спасат од прогон корумпираните кадри на ДПМНЕ кои биле на функција кога се случил кривично-правниот настан поврзан со пожарот во дискотеката во Кочани.

Премиерот Христијан Мицкоски не сакаше да ги коментира информациите дека Арбен Таравари ја напушта коалицијата „Вреди“. Прашан од новинарите и дали доколку се случи тоа од „Вреди“ ќе побара од премиерот да го тргне од Владата, Мицкоски рече дека би се воздржал од било какви коментари.

Тој во продолжение на одговорот рече дека Владата функционира обединето и единствено, и 78 пратеници ја поддржуваат, така што треба да се остави да работи како што е досега.

Таравари во изјава за медиумите во вторникот ја повтори оценката дека коалицијата функционира недоволно синхронизирано и дека очекува тоа да се поправи. Партиите од „Вреди“ имаат различни позиции во однос на тоа дали на претстојните локални избори треба да настапат на една листа, или пак со посебни советнички листи. Дополнително, Демократско движење, Беса и Алтернатива се оградија од Таравари во однос на контактите со лидерот од ДУИ, Али Ахмети.

Партијата на Таравари за денеска закажа состанок на партиското Собрание.

Премиерот Христијан Мицкоски очекува уште денес убави вести за македонските граѓани и економијата, во врска со царината од 33 отсто што САД ја воведе за увоз на македонските производи.

„На дневна основа работат тимови, и телефонски се слушаме. Очекувам многу скоро денеска убави вести за македонските граѓани и македонската економија“, изјави Мицкоски одговарајќи на новинарско прашање.

Тој рече дека Владата и институциите на САД се во постојана комуникација, со тамошното министерство за економија, финансии, Стејт Департментот, кабинетот на претседателот Доналд Трамп.

Министерот за надворешни работи, Тимчо Муцунски имал куса средба со државниот секретар, а на средбата станало збор и за царините, информираше Мицкоски.

Претходно неделава, американскиот претседател Доналд Трамп воведе нови царини за увозот од 180 земји, вклучувајќи ја и Македонија. За увозот од Македонија, Трамп одреди царина од 33 отсто.

Владата потоа уверуваше дека одлуката на САД за царинските трошоци, нема да има голем импакт врз нашата економија, а тие имаат план за надминување на ситуацијата. Македонската влада тогаш кажа дека нема потреба од паника и избрзани реакции и заклучоци.

Трговската размена меѓу Македонија и САД минатата година изнесувала 314 милиони долари, од кои што 118 милиони долари е извоз на Македонија.