По речиси 8 години, охриѓани гледаат дека СДС имале пратеник од Охрид по име Лазе Танески, кој дури сега смогна храброст и се појави на комична прес-конференција. СДС и Танески бесцелно ги напаѓаат градоначалникот Кирил Пецаков и ВМРО-ДПМНЕ, кои имаат трипати повеќе доверба од охриѓани за разлика од нив, истакна на денешната прес-конференција Лидија Петкоска, пратеничка од ВМРО-ДПМНЕ.

СДС и Танески, вели таа, се служат со конструкции и лаги мислејќи дека може да направат дефокусирање од нивната неспособност и криминал.

„Охриѓани, да, навистина чекаат одговор, но ги интересира каква е состојбата со фамилијарното стебло на пратеникот Танески?

Ќерката е вработена докторка и како најдобра и најзаслужна добила инстант-специјализација, а зетот за ќерка е вработен во контрола на летање веднаш по назначувањето на Лаки за претседател на ОО СДС.

Дали партиската определба и фамилијарната поврзаност се основен услов за вработување за СДС и кланот Танески?

Охриѓани чекаат и одговор дали е вистина дека блиска фирма до кланот Танески и зетот има камиони во РЕК „Битола“ и дали е тој директно вклучен?

Охриѓани се прашуваат како Танески стана главен хотелиер молејќи по вратите на локалната самоуправа во времето од ВМРО-ДПМНЕ за одобрение за градба на хотелот, каде што подоцна со предмет во градежниот инспекторат, базенот и другите помошни објекти се прогласени за дивоградба и не исполнуваат услови за легализација. Токму затоа пратеникот Лазе гласаше за Законот за легализацијата и ревносно го промовира иако е против препораките на УНЕСКО за кои наводно се изборил тој и СДС“, потенцира Петкоска.

Охриѓани, како што рече, сакаат да знаат дали кланот Танески има возен парк од над 200.000 евра и три СУВ-возила „ауди“ и кој му ги платил?

„Затоа и ја повикуваме ДКСК да го испита возниот парк на чие име се води затоа што во анкетниот лист како пријавен во ДКСК како пратеник возилата не се пријавени во него!

Дали е на повидок нов случај „Артан Груби“ од редовите на СДС?

Дали е вистина дека вработените преку синдикатот на РЕК „Битола“ и ЕЛЕМ (сега ЕСМ) летуваат во хотелот „Лаки“ редовно и зошто токму тој хотел е избран од целата охридска ривиера?

СДС и Танески како централна власт немаат ништо сработено за Охрид и никако не може да се помират дека градоначалникот Пецаков и ВМРО-ДПМНЕ како локална власт градат и работат домаќински“, оценува таа.

Танески и неговиот клан, како што додава, нека си погледнат во неговата партија колку нивните функционери се поврзуваат со криминални афери на дневна основа и да дадат одговори на многу прашања.