Култура
Костадиновска-Стојчевска: Вложуваме во едукацијата на младите за фолклорот, чуварот на македонскиот идентитет и традиција
![](https://makfax.com.mk/wp-content/uploads/2023/11/kostadinovska-stojcevska-2.jpg)
Министерката за култура Бисера Костадиновска-Стојчевска, вицепремиерот Бојан Маричиќ и министерката за труд и социјална политика, Јованка Тренчевска, денеска беа во работна посета на Општина Ѓорче Петров.
Посетата почна во Културниот центар „Ѓорче Петров“ со средба со претставници од Културно-уметничкото друштво „Глигор Прличев“ и од Едукативно-фолклорното здружение „Седум осмини“ .
„Инвестираме во културата и се грижиме за традицијата. Вложуваме во едукативно информирање на младите поколенија за фолклорот и запознавање со богатото народно творештво што го поседуваме. Тоа е најдобриот начин да продолжат да ги чуваат македонската традиција, корените, јазикот, културата“, изјави министерката за култура.
Зборувајќи за поддршката што Министерството за култура ја дава за проекти со кои ги поттикнува најмладите да станат дел од културно-уметничките друштва и ансамбли, со што ќе ја продолжат македонската традиција, Костадиновска-Стојчевска додаде: „Воспоставувањето на ваквата силна врска со сопствената традиција создава здрава основа за зачувување на македонскиот идентитет. Затоа, Министерството за култура секоја година ја зголемува поддршката за проекти од областа на фолклорот, проекти кои се национален и државен интерес“.
На средбата со претставниците на здружението и на културно-уметничкото друштво, министерката Костадиновска-Стојчевска потенцираш дека износот за финансирање и поддршка на фолклорот во континуитет продолжува да биде значаен дел од поддршката на културата во целост.
„Вкупната буџетска ставка за 2023 година за фолклорната дејност изнесува 46,8 милиони денари, од кои само за поддршка на програмата за други корисници се издвоени над 41,5 милион денари. Одобрените средства за проекти на конкурсот за општини и локални установи, здруженија, културно-уметнички друштва, ансамбли и физички лица изнесуваат 24,2 милиони денари, средства чии корисници се и Едукативно-фолклорното здружение ‘Седум осмини’ и Културно-уметничкото друштво ‘Глигор Прличев’“, рече Костадиновска-Стојчевска.
Костадиновска-Стојчевска додаде дека Министерството за култура продолжува и во иднина да помага во зачувувањето на културата и традицијата на нашиот народ и истовремено посветено да работи за младите да продолжат да ја пренесуваат традиција на следните генерации.
По посетата, министерката за култура, Бисера Костадиновска-Стојчевска, одговорајќи на новинарски прашања во врска со изборот на Скопје за престолнина на културата во 2028 година и за пренесувањето на надлежноста за Универзалната сала, рече: „Универзалната сала сѐ уште е во надлежност на Град Скопје. Одлуката со која до завршување на реконструкцијата Универзална сала треба да се пренесе во надлежност на Министерството за култура сѐ уште не е формално потпишана од градоначалничката Данела Арсовска иако се прават максимални напори за забрзување на постапката. Инаку, процесот на кој се заснова титулата европска престолнина на културата не е поврзан со реконструкцијата на Универзалната сала“.
Таа додаде дека европска престолнина на културата е титула што културната сцена и културните работници во Северна Македонија сосема ја заслужија. Во контекст на тоа потпишавме и меморандум за соработка меѓу Министерството за култура и Град Скопје, при што Министерството за култура ги понуди сите ресурси, односно просторни и финансиски, настрана од гаранцијата дадена како поддржувачи во европска престолнина на културата за 2028 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Култура
„Фолклорни игри под Шара“ во Тетово
![](https://makfax.com.mk/wp-content/uploads/2024/06/folklor.jpg)
Здружението на Срби и Македонци „Бранко Чајка” од Тетово денеска во големата сала на Центар за култура „Иљо Антевски-Смок“ во Тетово ќе ја одржи четвртата манифестација „Фолклорни игри под Шара“. Манифестацијата ќе започне во 17:00 часот со дефиле на културно-уметничките друштва по улиците на градот, а свечениот концерт е закажан за 19:00 часот.
„Манифестацијата има мултиетнички карактер на која на едно место се претставува фолклорот на народите кои живеат во пазувите на Шар Планина. На годинешната манифестација, како и на претходните три изданија, својот фолклор го претставуваат културно-уметнички друштва кои делуваат во Тетово и околните населени места. На сцената ќе продефилираат народните носии на Македонците, Албанците, Турците и Србите“, информира Соња Андонов, претседателка на Здружението.
Народните игри на Македонците и Србите ќе ги претстават членовите на домаќините, КУД „Бранко Чајка“ кое што делува во состав на Здружението на Срби и Македонци „Бранко Чајка“ од Тетово. Покрај ова друштво пред тетовската публика ќе настапат КУД „Брвеница“ од Брвеница со македонски фолклор, КУД „Џеладин Зеќири“ од Тетово со албански фолклор, КУД „Јени хајат“ Тетово со турски фолклор како и Вокалниот ансамбл „Распеани кичевчани“ од Кичево.
Манифестацијата „Фолклорни игри под Шара“ претставува проект од национален интерес во културата за 2024 година на Министерството за култура на Република Северна Македонија од областа на фолклорот.
Култура
„Златна рамка“ од 18 до 20 јуни во МКЦ: нови македонски филмови, презентации, трибини
![](https://makfax.com.mk/wp-content/uploads/2024/06/ZLATNA-RAMKA-2024_POSTER-750x375.jpg)
Шестото издание на „Златна рамка“ – Денови на македонскиот филм, во организација на Друштвото на филмските работници на Македонија (ДФРМ), ќе се одржи од 18 до 20 јуни во киното „Фросина“ во Младинскиот културен центар.
Филмската ревија „Златна рамка“ претставува можност за публиката бесплатно да ги гледа македонските филмски остварувања што биле реализирани во текот на изминатата година, а биле поддржани од Агенцијата за филм. Филмската програма годинава содржи долгометражни, краткометражни и документарни остварувања.
Во рамките на долгометражната програма на 18 јуни, во 20.30 часот, ќе биде прикажан филмот „Преекспонирано“ на режисерката Елеонора Венинова во продукција на „ДНФ продукција“, на 20 јуни е проекцијата на „Домаќинство за почетници“ на режисерот Горан Столевски со „Лист продукција“, како и филмот „Лена и Владимир“ на режисерот Игор Алексов со „Минд продукција“.
Краткометражната програма содржи девет филма, кои ќе бидат прикажани во терминот од 18 часот на 19 јуни. На програмата се остварувања на режисер(к)ите Александра Кардалевска, Ангела Димеска, Јован Саркањац, Јане Спасиќ, Ѓорче Ставрески, Сандра Георгиева, Сабедин Селмани, Берат Асани, Јане Алтипармаков и Бесар Илјази.
Документарната програма носи пет остварувања, а проекциите се распоредени во текот на трите дена на одржувањето на ревијата „Златна рамка“. На 18 јуни, во 18 часот, е проекцијата на филмот „Бисер“, во режија на Драган Кумев, а во 19 часот ќе биде прикажан документарецот „Последниот каубој на Балканот“, на режисерот Сабедин Али. На 19 јуни, во терминот од 12 часот, ќе бидат прикажани филмовите „Живот на крстосница“ (Недопирливи) на Зоран Димов и „Емигрант сум или…“ на Сенад Абдули. На 20 јуни, во 18 часот, ќе биде прикажан документарниот филм „Јанѕа“, работен според „Дневник по многу години“ од Блаже Конески, во режија на Никола Т. Калајџиски, во продукција на „Контраст филм“.
Социјалната програма „Фокус“, наменета за публиката која од разни социјални ограничувања не може да го посети киното „Фросина“, годинава ќе се одржи на 20 јуни во Домот за стари лица „Мајка Тереза“.
Покрај ревијата на македонски филмови, „Златна рамка“, предвидува да се одржи свечено собрание на ДФРМ на 18 јуни. На 19 јуни, пак, во 20 часот, ќе има презентација на филмската камера „Сони“.
На 20 јуни, во 12 часот, ќе се одржи трибина со наслов „Зачувување на аудиовизуелното наследство“, на која ќе учествуваат Владимир Ангелов, вон. проф. м-р Владимир Павловски, Игор Старделов и Роберт Јанкуловски.
Традиционално „Златна рамка“ ќе ги додели почесни награди на ДФРМ за филмски актер, филмски автор и филмски работник.
Култура
Филхармонија во Градскиот парк со „Одисеја 2024“ – музиката од филмовите на славниот Кјубрик
![](https://makfax.com.mk/wp-content/uploads/2024/06/ОДИСЕЈА_FB-EVENT.jpg)
И оваа година, Македонската филхармонија ќе го реализира традиционалниот концерт „Филхармонија на отворено“, кој ќе донесе разновидност и секако, несомнен квалитет. Во среда, на 19 јуни во Градскиот парк со почеток во 21 часот, под ѕвездите на скопското небо, одиме на футуристичко патување низ дел од филмографијата на најкреативниот режисер на сите времиња – Стенли Кјубрик, визионерот кој изврши огромно влијание врз светската филмска уметност.
Концертот носи наслов „Одисеја 2024“, кој е инспирација од неговиот револуционерен филм „2001: Вселенска одисеја“, но и кој ја најавува новата концертна сезона на Македонската филхармонија во јубилејот којшто годинава го слави оваа најстара национална институција – 80 години од постоењето.
Под диригентската палка на маестра Дијана Имери Илкоска, ќе бидат изведени музички теми од големите композиторски имиња од светот на класичната музика: Моцарт, Бетовен, Штраус, Росини, Хачатуријан, Елгар, Хендл, Пук и Шостакович, а кои ги одбележаа маестралните филмови: „Одисеја 2001“, „Пеколен портокал“, „Бери Линдон“ и „Очи широко затворени“.
Кјубрик на музиката гледал како едно од најмоќните оружја во неговите уметнички остварувања, па затоа и неговиот избор на дела бил мошне деликатен. Токму музиката на класичните композитори, ги прави филмовите на Кјубрик дотолку повеќе препознатливи, давајќи им посебна драматургија и естетика.