Македонија
(Видео) Мециновиќ: Левицата ќе ја турне диктатурата, решетки за сите ѕверови што им ја пијат крвта на обичните луѓе

„Кога станува јасно дека сите политички партии на олигархијата ДПМНЕ – СДС – ДУИ дејствуваат координирано, и другите партии во Собранието учествуваат во орото што тие им го свират, кога стана јасно дека во институциите преку Левицата е претставена народната волја, која се попречува на владеењето на овие бизнис-партии – со вчерашното носење на новиот Деловник во Собранието се формализира диктатурата на широката коалиција“, рече портпаролот на Левицата, Амар Мециновиќ.
„Режимот на СДС – ДПМНЕ – ДУИ има цел целосно да го пороби народот, за државата да им служи единствено за богатење на раководствата на партиите додека под нивната авторитарна чизма се слушаат пискотници од голготата на обичниот народ на кој му е одземено се. Народ чии семејства се разединуваат поради мизеријата која ја приредува политичката олигархија, чии животи се безвредни за монструозната тројка која не престанува да се богати – чиј народен суверенитет се потиштува за конечно и да му се одземе државата. Народ кој се тетерави да се ослободи од фаталниот стисок на сецесионизмот на ДУИ, предавничката нарав на СДС и лажниот патриотизам на ДПМНЕ со чиј благослов се одзима државата – создадена од крвта на нашите претходници.
118 од 120 пратеници се на истата страна, на страната на бизнисот и профитот, на страната на антимакедонските сили. Со парализа на Собранието, на домот на народот, токму на тој начин, ДПМНЕ со сигурност ќе ги внесе и Бугарите во Уставот во следниот мандат. Сè ќе направат за да продолжат да владеат. Да владеат и ненаситно да се богатат, па и по цена на расчеречување на државата.
За вчерашното грозоморно прекршување на Уставот и законите на Република Македонија, Левицата ќе поднесе кривична против Талат Џафери и архиварите во Собранието, а услов на Левицата за формирање секоја идна влада ќе биде процесирање на кривичните пријави и, конечно, затвор за сегашниот собраниски спикер.
Македонскиот народ, под деценискиот притисок на овие човекојадци од СДС-ДУИ-ДПМНЕ го пронајде во своите редови оружјето со кое ќе се одбрани од оваа ламја со три глави – преку партијата на народните маси Левица, во антифашистички и народен фронт спремен за финална пресметка. Сите велепредавници, кои ја овозможуваат и ја продлабочуваат диктатурата на антимакедонската политичка олигархија, ќе се соочат со безмилосен крај, кој ќе ги стави зад решетки овие ѕверови, кои им ја пијат крвтта на обичните луѓе“, изјави портпаролот на Левицата, Амар Мециновиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Славески како гувернер ќе следи партиски директиви, а не реална монетарна политика, вели Филипче

Трајко Славески, како гувернер на Народната банка, нема да биде независен и нема да води вистинска и балансирана монетарна политика.
Ова е оценката на претседателот на СДСМ, Венко Филипче, за одлуката на претседателката на државата, Гордана Сиљановска-Давкова, Славески да го предложи за гувернер.
Со ваквиот предлог, според Филипче, ВМРО-ДПМНЕ докажува дека при одлучувањето и водењето на државата нема интерес да им служи на граѓаните, туку на сопствените теснопартиски интереси.
„Со предлогот Трајко Славески да биде гувернер на Народната банка, и последната институција која ја водеше експерт ќе биде партизирана“, вели Филипче.
Според него, ваквиот избор ќе ја доведе во ризик целата макроекономска политика, бидејќи, како што истакна, Славески нема да води монетарна политика каква што ѝ е потребна на државата, туку ќе ги следи партиските директиви.
Претседателот на СДСМ, Венко Филипче, попладнево е со членовите и граѓаните на Желино, Брвеница и Гостивар.
Македонија
Перински: Министерството за локална самоуправа активно се вклучува со конкретни активности за решавање на проблемот со аерозагадувањето

„Чиста животна средина и спречување на аерозагадувањето се обврска на секој поединец, но и на секоја институција. Иако Министерството за локална самоуправа нема директни ингеренции во областа на аерозагадувањето, сепак активно се вклучува со конкретни активности таму каде што има можност. Заштитата на животната средина и природата, како и преземањето на мерки за спречувањето на загадувањето на воздухот се утврдени како надлежности на општините согласно Законот за локална самоуправа. Ова значи дека борбата за чист воздух е заедничка обврска и одговорност на сите нивоа на власт“, изјави министерот за локална самоуправа, Златко Перински, на денешната надзорна расправа во Собранието на тема „Ефектите од аерозагадувањето во Скопје и во другите градови врз здравјето на луѓето и мерките што се преземаат за заштита на јавното здравје“.
Перински се осврна на Акцискиот план за спроведување на програмата за одржлив локален развој и децентрализација за периодот 2024-2026 година кој предвидува конкретни мерки за справување со аерозагадувањето.
„Во таа насока Акцискиот план за спроведување на програмата за одржлив локален развој и децентрализација за периодот 2024-2026 година предвидува конкретни мерки за справување со аерозагадувањето, препознавајќи ја сериозноста и влијанието на квалитетот на животот“, подвлече Перински.
„Предвидените мерки опфаќаат подобрување на сообраќајните услови за превозни средства кои не предизвикуваат аерозагадување, зајакната соработка меѓу државата и општините, институционални активности, како унапреден мониторинг, засилен инспекциски надзор и подготовка на локални планови за квалитетен воздух. Спроведувањето на овие мерки бара координиран ангажман од повеќе институции, со што темата добива заслужен приоритет во националните развојни политики“, посочи тој.
Перински истакна дека Министерство за локална самоуправа посредно учествува и во финансирање на активности во областа на животната средина. Тој нагласи дека е потребно да се предлагаат мерки и решенија коишто ќе го подигнат или превенираат проблемот со аерозагадувањето.
Македонија
Филипче: Дали се однапред договорени фирмите блиски до власта кои ќе работат на проектите од заемот

Владата на ВМРО-ДПМНЕ тргна по еден пат кој што не знаеме каде не води, со економски политики кои, како што предупредуваат експертите, не водат во амбис, истакна претседателот на СДСМ, Венко Филипче, на денешниот состанок со општинската организација во Желино.
Во обраќањето, Филипче укажа на лошите владини политики во делот на финансиите, потенцирајќи дека новото задолжување од 6 милијарди евра, за кое Владата ги крие деталите, е ризично и драстично ќе го зголеми јавниот долг.
„Не знаеме какви се роковите, колку се каматите, дали се споредил тој кредит и тој извор на средства со некој друг, дали навистина Владата избрала најповолен извор на средства. Зошто шест милијарди евра и толку драстично да се зголеми јавниот долг? Јавниот долг ќе надмине 100% и тогаш нема да имаме фискален простор буквално за ништо“, рече Филипче.
Тој додаде дека со новото планирано задолжување, практично се задолжуваат сите следни генерации.
Филипче изрази сомнеж за транспарентноста на ова задолжување, осврнувајќи се на изјавите на министерката за финансии: „Министерката вели дека Законот за јавни набавки ќе важи, ние проверивме и нема да важи. Што значи, се поставува прашањето дали е однапред договорено кои фирми ќе го работат тоа?“, праша Филипче.
Притоа, Филипче посочи дека досегашната реализација на капиталните проекти е поразителна, што укажува на тоа дека Владата нема капацитет да ги искористи парите од централниот Буџет и да ги реализира планираните капитални инвестиции.
„Веќе е средина на годината, а не е ни 30% реализацијата на капиталните проекти. Единствено нешто на што се работи е Гостивар – Букојчани, делот од автопатот на Бехтел и Енка, кој ВМРО-ДПМНЕ го напаѓаше дека е најкоруптивен, но еве продолжува да се работи. Се поставува прашањето: има ли Владата капацитет? Во нашиот буџет има милијарда и 200 милиони евра за проекти кои не се остваруваат, не се реализираат. А што ќе правиме со други шест милијарди евра? Џабе ќе стојат, само камати ќе плаќаме, нема капацитет за реализација“, рече претседателот на СДСМ, Венко Филипче.