Македонија
Георгиевски: Општина Илинден е една од најбрзорастечките општини и покрај немањето поддршка од централната власт

„Во однос на предизвиците Илинден не беше одмината од таа економска криза, бевме пред голем предизвик може за разлика од другите општини, Илинден е општина што има јавни претпријатија и што и те како се битни и кои овозможуваат прво Јавното комунално претпријатие ја покрива целата територија на Општина Илинден и Јавното комунално претпријатие за водовод Илинден каде покрива над околу 10 илјади приклучоци на територија на oпштина Илинден, Петровец и дел од oпштина Гази Баба“, истакна градоначалникот на oпштина Илинден, Александар Георгиевски на денешната дебата на тема „Локален економски развој“ која е во рамки на настанот „Важно е! Платформа за иднина кој е дел од кампањата „Важно е! Од тебе зависат промените.“
Тој продолжи и додаде дека и без поддршката од централната власт и со затечена каса во минус, Општина Илинден сепак покажа и докажа дека е една од најбрзо растечките општини.
„Кога почна економската криза само во тој дел кај Јавното комунално претпријатие за водовод имавме криза каде месечните износи за електрична енергија која требаше да ги плаќа претпријатието беа поголеми од вкупниот приход на претпријатието. Во такви ситуации, во ситуации на голема инфлација без поддршка од централната власт и со затечена каса во минус Општина Илинден изминатиов период од 2 години покажа и докажа дека е една од најбрзорастечките општини“, кажа Георгиевски.
Тој се осврна и на реализираните проекти во изминатите 2 години во Општина Илинден и додаде:
„Општина Илинден изминативе години реализираше многу проекти. Како што кажав ќе започнам од делот на патната инфраструктура каде во овој период само асфалтирани се над 40 илјади квадрати плус негде пробиени улици со тампони во должина од над 26 километри и 3,5 километри пешачки патеки. Во делот на животната средина затоа што Општина Илинден особено вложува во тој дел во изминатиот период можам да кажам дека на неколку локации се работеше на нови системи за одводнување, на фекална канализација и заврши комплетно двата крака на Илинден – Марино колекторот во должина од 4,800 метри, се започна со делот на влезот на Илинден на тотално нова канализација, примарна мрежа од 4,200 метри, работи на помали други линии или во тотал над 23,500 метри фекална канализација плус на тоа нови 3,000 метри водоводни линии. Изминатиов период пуштивме во употреба и две пречистителни станици едната беше во Кадино а другата во Марино“, вели Геориевски.
Георгиевски истакна дека се фокусирани за изградба на еден мал стадион во Илинден, за прв пат Илинден од своето постоење изготви субвенции за индивидуални спортисти, над 40-тина спортисти се здобија со тоа, за прв пат субвенции за инвертер клими, за новороденче, велосипеди, млади претприемачи.
„Изминатиов период имавме многу проекти пуштивме комплетно ново училиште од темел изградено за капацитет од 450 ученици минатата година, за прв пат во општина Илинден се воведе целодневна настана и целодневен престој за ученици. Проширување на градинката со нови капацитети кои кога ќе бидат завршени изминатиот период во општината ќе има нула деца на листа на чекање. Не застануваме тука, проектираме и нови градинки каде оној нов прилив на ново население да бидеме спремни да го прифатиме. Сме фокусирани за изградба на еден мал стадион во Илинден, за прв пат Илинден даде од своето постоење субвенции за индивидуални спортисти, над 40-тина спортисти се здобија со тоа, за првпат субвенции за инвертер клими, за новороденче, велосипеди, млади претприемачи“, заклучи Георгиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Уапсени се полицајци и полициски функционери кои биле на смена кобната вечер“: СДСМ ја поздрави акцијата на ОЈО ГОК за Кочани

„Ја поздравуваме вечерашната акција на Обвинителството за организиран криминал и корупција во која се лишени од слобода полицајци и полициски функционери кои биле на смена кобната вечер на 16 март во т.н. дискотека Пулс во Кочани“, соопшти СДСМ.
„Фактот што четири месеци ВМРО-ДПМНЕ се обидуваше да ја сокрие одговорноста на полицајците и полициските функционери, фактот што нивната вина беше негирана од страна на Панче Тошковски и Христијан Мицкоски укажува на тоа дека сите биле вмешани или на некој начин знаеле за нелегалното работење на Пулс и тоа го одобрувале.
Само поради обидите да се сокрие одговорноста од страна на Тошковски и Мицкоски на лицата кои тие ги поставија за полицајци, командири и началници би требало веднаш да си поднесат оставки.
Одговорност мора да има и за Александар Јанев, директорот на БЈБ. Тошковски и Јанев не смеат повеќе да ја попречуваат истрагата ниту да влијаат некој да не сноси одговорност.
Вистината за Кочани која цела недела ја објавуваше СДСМ е точна. Се покажа дека без силен притисок на јавноста, на дел од медиумите и на СДСМ нема да има правда за Кочани. Време е за одговорност, време е за оставки“, се додава во соопштението на СДСМ.
Македонија
Приведени уште 13 полициски службеници за пожарот во „Пулс“

Во тек е акција под раководство на обвинител од Специјализираното одделение за полициски службеници, соопштија од Обвинителство за гонење на организиран криминал и корупција.
Уште 13 полициски службеници и началници се приведени во рамки на истрагата за пожарот во дискотеката „Пулс“ во Кочани.
Од Обвинителството најавија дека соопштение ќе има во текот на утрешниот ден.
Македонија
МОН: Стручното образование е силна страна на македонскиот образовен систем, креира квалитетен и побаруван кадар на пазарот на трудот

„Во средните стручни училишта во Македонија успешно функционира концептот на дуално образование во чија реализација е вклучена и бизнис заедницата. Училиштата и компаниите заедно содаваат квалитетен кадар кој полесно може да се снајде на пазарот на трудот. Затоа, развојот и проширувањето на овој концепт ќе биде наш приоритет и во следниот период“.
Ова го истакна државниот секретар во Министерството за образование и наука, Елена Ивановска на панел дискусија „Достапност на квалификувана работна сила: предизвик и стратешки фактор за инвестициски одлуки и економски раст“, организирана во рамки на Првиот македонско – германско бизнис самит, со кој АХК германската стопанска комора во Македонија одбележува 25 години постоење.
Ивановска рече дека од самиот почеток на мандатот, новото раководство во МОН се заложи за унапредување на законската регулатива, бидејќи таа е основ за спроведување на образовните политики, новите мерки и активности со кои ќе се остварат целите од владината програма за градење на поквалитетен образовен систем.
„Во новиот Закон за стручно образование и обука системски се уреди концептот на дуално образование, се прецизираа обврските на сите учесници во реализацијата. На пример се дефинираше кој и како може да стане ментор на учениците, компаниите да им исплаќаат месечен надомест на практикантите, да им овозможат заштита и безбедност при работа и така натаму. Со Законот за средно образование пак, се предвиде поголема поддршка за талентираните ученици, се воведуваат кариерни советници што ќе ги насочуваат учениците и сето ова е во интерес на создавање на потребната квалификувана работна сила“, рече Ивановска.
Осврнувајќи се на регионалните центри за стручно образование и обука рече дека тоа се всушност средни стручни училишта кои се трансформираат во образовни установи со поголема вредност и повеќе функции, обврски и одговорност.
„Таму не само што се реализира средно стручно образование за ученици, туку идејата е да се реализира и образование и обука на повозрасни кои имаат потреба од доквалификација, преквалификација и слично, за да станат конкурентни на пазарот на трудот. Фреквентноста на луѓе ќе биде многу поголема. Центрите ќе прават и анализи на пазарот на трудот, ќе креираат програми за настава и обука и така натаму“, рече Ивановска, додавајќи дека во моментов се формирани 7 регионални центри, а до 2028 година ќе се формира осмиот и последен, што како обврска е предвидено во Реформската агенда.
Државниот секретар информираше дека во регионалните центри се вложуваат големи износи на средства за да има добри училници, опремени кабинети, работилници и соодветни сместувачки капацитети. Средствата во најголем дел ги обезбедува Европската унија, а Ивановска ја повика и бизнис заедицата да помогне во модернизацијата на инфраструктурата, затоа што, како што рече, училиштата се инкубатори на човечки капитал кој и нив им е потребен.
На панел дискусијата модерирана од Дејан Чуповски, раководител на програмата за дуално образование при АХК германската комора, се обратија и програмската директорка на Источниот комитет на германското стопанство, директорот на средно стручно училиште „Св. Наум Охридски“ во Охрид, Сашо Недески, раководителката на одделот за глобална техничка и комерцијална обука во компанијата Дрекслмаер, Барбара Гербер и управниот директор на компанијата Унија Груп, Бранислав Серафимоски.