Македонија
Европскиот сојуз за промена: ДУИ ги враќа комунизмот и концептот чесен Албанец
Европскиот сојуз за промена „загрижено ја следи кампањата на ДУИ и Судскиот совет за разрешување на Беса Адеми од позицијата претседател на Врховниот суд“.
„Ја потсетуваме јавноста дека борбата за разрешување на Адеми е со цел да се врати Груевски и да има негова целосна амнестија! Стратегијата за компромитирањето на г-ѓата Адеми е произведено во Министерството за пропаганда предводена од Артан Груби, а кампањата се спроведува преку фантом-порталите со седиште во истото министерство“, вели Европскиот сојуз за промена.
„Денешните предупредувања за разрешувањето на г-ѓата Адеми од позицијата претседател на Врховниот суд потврдуваат дека од Европскиот сојуз за промена биле во право – дека политичкиот притисок се води од Владата до Врховниот суд како последна пречка за враќањето на Груевски. Сме имале право кога прашавме дали се подготвува враќањето на Груевски со помош на ДУИ, сме имале право кога алармиравме за политичкиот притисок на ДУИ кон Беса Адеми!
Идеаторот и извршителот за враќањето на Груевски – ДУИ денес уште еднаш потврди дека тоа што некогаш беше политичка партија предводена од идеали, денес е трансформирана во параполитичка структура предводена од интереси, организиран криминал и корупција. Трансформирани во спонзор за разрешување на Беса Адеми, ДУИ уште еднаш ги потврди нашите тврдења дека денес во Северна Македонија еден Албанец може да напредува само како послушен кон власта и сервилен кон ДУИ, а не поради тоа дека е квалификуван, способен и умен!
Во времето на присилните мерки на Србија во Косово, Албанците што не одбиле да бидат послушни кон власта беа наречени „чесни Албанци“. Водејќи борба со Беса Адеми, ДУИ нѐ потсетува дека „чесниот Албанец“ не е исчезнат! „Чесниот Албанец“ денес е секаде каде што ДУИ има инсталирано сопствени луѓе што работат за партијата, а не за народот.
На Албанците во Северна Македонија никогаш не им недостигала слободата повеќе од денес, каде што таа слобода се контролира и се формулира од партијата на власт заедно со нејзините милитанти“, соопшти Европскиот сојуз за промена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК ги соопшти местата на кои ќе се прегласува на 22 мај
Државната изборна комисија (ДИК) денеска, на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1.194 и 1.202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино. Гласањето ќе се одржи идната среда, на 22 мај 2024 година.
ДИК на седницата ги разреши и претседателите на избирачките одбори, членовите и нивните заменици во избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга, 1272 во Општина Охрид и 2101 во Општина Желино.
Со оглед дека се кратки роковите за избор на нови избирачки одбори, за да биде регуларно прегласувањето, општинските изборни комисии (ОИК) ќе треба да ангажираат некои од веќе постојните избирачки одбори, или од најблиските избирачки места или некои други, и за тоа ќе треба да достават известување до ДИК.
Кампањата за повторното гласање ќе трае до понеделник, 20 мај, 00.00 часот. Притоа, ќе важат истите листи за болни и немоќни лица, ќе нема можност да се пријавуваат нови.
Според ДИК, има можност за измени и предлози за овластени претставници на кандидати. Тоа важи и за членовите на избирачките одбори кои се предложени од политичките партии.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.
Македонија
Утре затворени неколку улици во Скопје
Утре од 08.30 до 12.30 часот, поради одржување на натпревар „Стопански триоги триатлон”, со стартно-целна позиција кај Спортскиот центар „Борис Трајковски” во дел од градот ќе има изменет режим на сообраќај, соопшти СВР Скопје.
Посебниот режим на сообраќај ќе опфати дел од уличната мрежа околу СЦ „Борис Трајковски” и дел од булеварот Илинден (десна коловозна лента), потоа на потегот од крстосницата со булевар 8 Септември до крстосницата со улицата Никола Парапунов и обратно.
Утре исто така со почеток во 09.45 часот, поради одржување на спортско-рекреативен настан „Прв до врв” ќе има посебен режим на сообраќај во делот од градот каде што ќе се реализира манифестацијата.
Настанот почнува пред Музеј на град Скопје – улица Св.Кирил и Методиј, потоа лево по булеварот Св.Климент Охридски, во продолжение право по булеварот Мајка Тереза, па лево по улицата Тодор Александров и по локалниот пат за Средно Водно до врв на Водно („Милениумски крст”).