Македонија
Џафери – Бесани: Поддршката што ја добива Македонија од Светската банка е силен сигнал дека државата се движи во вистинска насока

Денес, претседателот на Собранието на Република Северна Македонија, Талат Џафери, оствари средба со потпретседателката на Светската банка за Европа и Централна Азија, Антонела Бесани. На средбата присуствуваа и Џијаокинг Жу, директорка на Светската банка за регионот на Западен Балкан, и Масимилијано Паолучи, менаџер на Светската банка за Северна Македонија и Косово, како и генералната секретарка на Собранието, Цветанка Иванова.
Претседателот Џафери информира за временската рамка во која Собранието ќе го усвои буџетот на државата за 2024 година, како и за законите што се усвоија во Собранието во изминатиот период, со акцент на новиот Закон за буџетите, со кој се воведоа фискални правила, фискален совет и подобрување на транспарентноста на јавните финансии. Во однос Законот за задолжување на Република Северна Македонија со заем кај Меѓународната банка за обнова и развој – Светската банка по договорот за заем за развојни политики за одржливост и отпорност, Џафери нагласи дека е во собраниска процедура, а како предуслов за усвојување на овој закон Собранието усвои 11 дополнителни закони.
Потпретседателката на Светската банка, Бесани, искажа задоволство што Светската банка ги поддржува амбициите и целите на државата и нејзините граѓани во изминативе 30 години и надеж дека плодната соработка ќе продолжи и во иднина. Бесани се осврна на наодите од ажурирањето на систематската дијагностика за земјата од 2023 година и се осврна на приоритетите на земјата, кои би можеле да бидат поддржани од Светската банка во следната рамка за партнерство со земјата.
Соговорниците се согласија дека поддршката што ја добива Република Северна Македонија од Светската банка е силен сигнал дека државата се движи во вистинска насока и е мотивација да се продолжи со политиките и почнатите реформски процеси, а во исто време дава сигнал кон меѓународните фактори и меѓународните финансиски пазари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Кој ќе одговара за последниот смртен случај на Кардиохирургија?

СДСМ бара итна и целосна истрага за скандалот на Кардиохирургија и утврдување на одговорност за последниот смртен случај каде пациент почина со пукната аорта, велат од партијата.
„Условите и околностите кои довеле до овој трагичен исход мора да бидат истражени и да следи одговорност.
Дали навистина, како што се тврди на Клиниката за кардиохирургија, операционите сали не функционирале кога пациентот во критична состојба бил донесен на клиниката?
Зошто пациент со пукната аорта – состојба што бара итна интервенција – не бил опериран?
Зошто бил вратен, и покрај тоа што неговиот живот висел на конец?
Ова не е само здравствен, туку и човечки и морален скандал.
На Онкологија нема лекови, луѓе умираат по клиники, хаосот во здравството со ДПМНЕ и Таравари зема преголем замав.
Човечки животи не смеат да бидат изгубени поради хаос, немарност и недостиг на одговорност. Овој случај мора да добие јасен одговор и одговорност!“, пишува во соопшението на СДСМ.
Македонија
Министерот Муцунски денеска ќе учествува на 4. Анталија Дипломатски Форум

Министерот за надворешни работи и надворешна трговија, Тимчо Муцунски, денес ќе учествува на 4. Анталија Дипломатски Форум (ADF2025), што се одржува од 11 до 13 април 2025 година во Анталија, Република Турција, под покровителство на претседателот Реџеп Таип Ердоган и во организација на Министерството за надворешни работи на Турција.
Во рамки на Форумот, министерот Муцунски ќе се обрати на панел-дискусијата на тема: „Regional Ownership for a Prosperous Future in the Balkans“, а ќе оствари и бројни билатерални средби со негови колеги – министри за надворешни работи.
Во ера на зголемена нестабилност и непредвидливост, обележана со комплексни предизвици и повеќекратни кризи, Анталија Дипломатскиот Форум има за цел да ги анализира системските предизвици со кои се соочува мултилатералниот поредок и да поттикне конструктивен дијалог за враќање на дипломатијата во брзо менувачката меѓународна средина. Согласно најавите, Форумот ќе собере глобални лидери, креатори на политики, академици, бизнис експерти, како и претставници на медиумите и граѓанското општество, со цел размена на мислења за тоа како дипломатијата може да придонесе кон заедничка акција и одговор на глобалните предизвици во фрагментираниот свет.
Македонија
Герасимовски до управителите: Противпожарната безбедност не смее да се игнорира

Во Општина Центар се одржа работна средба на градоначалникот Горан Герасимовски, Секторот за инспекциски работи и голем дел од управителите на станбени и станбено-деловни објекти, како и претседатели на куќни совети.
На средбата се разговараше за предизвиците во делот на противпожарната заштита и одржувањето на фасадите.
„Имавме одличен одзив на нашето барање до управителите да достават информации за состојбата со противпожарната заштита. Важно е да продолжиме со меѓусебна соработка – само така можеме да обезбедиме безбедни згради за сите граѓани. Главен приоритет се ПП апаратите, проодноста на скалите и хидрантите. Ќе продолжиме да бараме системски решенија и соработка со ЗЕЛС и Дирекцијата за заштита и спасување“, изјави градоначалникот Горан Герасимовски.
Од општинската инспекција појаснуваат дека е потребна постојана и отворена комуникација со управителите.
„Доколку се забележат проблеми, особено заградени противпожарни скали, апелираме тие веднаш да се пријават. Ако објектот е небезбеден, градежен инспектор ќе излезе на терен, ќе состави записник и ќе донесе решение. Но, сè започнува со навремено пријавување. Контрола на сите згради во секое време е невозможна, затоа очекуваме одговорност и иницијатива од управителите“, посочија инспекторите.
На средбата беше потенцирано дека постојат чести случаи на кражби и обивање на сандачињата со противпожарна опрема. Управителите истакнаа дека вложуваат напори за заштита на системите и подобрување на состојбата во секоја зграда. И тие бараат под итно да се донесе системско и унифицирано решение за противпожарната заштита што ќе важи за сите локални самоуправи во државата.
Се разговараше и за проблемите со оштетени и небезбедни фасади, при што беше најавено дека Општина Центар во април и мај ќе има нови повици за субвенционирање на санација на фасади, кровови и лифтови.