За СДСМ е прифатлив предлогот на ДУИ, Талат Џафери да биде технички премиер кажа пратеничката Даниела Маркоска и потврди дека координаторот на пратеничката група Јован Митрески да биде потврдена за кандидат за претседател на Собранието.

„Сметаме дека Талат е соодветно и добро решение. Претседателот на партијата Димитар Ковачевски, за во недела закажа состанок на раководството на СДСМ. На овој состанок од страна на претседателот Димитар Ковачаевски се очекува Јован Митрески да биде предложен за Претседател на Собранието и потврден од страна на раководството и Извршниот одбор на СДСМ“, рече Маркоска.

Согласни се и од Алијанса за Албанците.

„Ова е договор меѓу ДУИ и СДСМ од почетокот на мандатот. За нас тоа е симболика, секако ќе го поддржиме. Мислам дека секоја албанска партија, па и сите, треба да покажеме широкоградост во овие моменти и да продолжиме понатаму да имаме успешни избори“, изјави Арбен Таравари, претседател на Алијанса за Албанците, прашан дали е прифатлива за неговата партија одлуката Талат Џафери да биде технички премиер сто дена пред изборите во 2024.

За ВМРО-ДПМНЕ, пак, ова покажало дека ДУИ е власт, а СДС подизведувач.

„Џафери или командант Форина во 2001 година дезертирал од македонската Армија и преминува во УЧК. А јавноста е сведок и на низа прекршувања на собраниски процедури од страна на Џафери, како употреба на европското знаменце на закони кои немаа врска со европската регулатива, само имаа врска со криминалиите на ДУИ, заклучување на вратите на пленарната сала за да не можат другите пратеници да се пријават за дискусија за дневниот ред, како и недоличното однесување и навредување кон собраниските службеници, се наведува во соопштението на партијата. На Македонија и се случува ДУИзација, а Ковачевски е директно одговорен за тоа. Има ли некој од СДС што му останало барем грам достоинство за веднаш да му се спротивстави на Ковачевски?“, пишуваат од опозициската партија.

Лидерот на Левица, Димитар Апасиев преку својот фејсбук-профил реагира на номинирањето на претседателот на Собранието на Македонија, Талат Џафери за премиер на техничката влада. „Учката“ ќе добие кривична пријава, а најинтересно е што ДПМНЕ ќе го гласа, вели Апасиев.

„Крунисувањето на учката за премиер ќе му го честитаме следната недела со нова кривична пријава (за ускратувањето на пратеничкото право на амандмани). Туку, најјако во целава ситуација е тоа што и ДПМНЕ во јануари ќе ја гласа поржинската влада (оти и они ќе имаат министри во истата). Избирањето воен злосторник за премиер е последната шајка во ковчегот на изгубениот СДС. После ова, таа партија е осудена на распаѓање и пасокизација, оти нема им да остане ниту еден здраворазумски и воспитан човек“, напиша Апасиев на Фејсбук.