Македонија
Николов: Пациентите со малигни заболувања во болницата во Битола трета недела се без терапија

Владата на СДСМ и ДУИ и Министерството за здравство не само што не ги решаваат проблемите на пациентите, туку и дополнително активно работат на нивното продлабочување, вели Игор Николов, претседател на Комисија за здравство на ВМРО-ДПМНЕ.
„Не само што нема системско решение за континуирано обезбедување на терапија за болните од малигни заболувања гледаме дека истите овие ликови 7 години не мрднаа со прст за ветувањето за дисперзија во лекувањето на пациенти со малигни заболувања и не воспоставија услови со кадар и опрема. Со тоа, остана нереализирано и ова ветување како и низа други ветувања. И на крај за да биде иронијата поголема, истите овие ликови држат партиски трибини за здравство како на пример онаа партиската трибина на СДСМ во Битола и во Штип кои се еклатантен пример за негрижа и нерешавање проблемите, туку нивно создавање“, вели Николов.
Денеска, додава тој, гледаме дека партиската трибина посветена на здравјето во Битола не ги реши проблемите на онколошките пациенти, па така да согласно информациите кои ги добиваме од пациентите во онколошкиот оддел на оваа Клиничка болница трета недела по ред нема:
1.Tаблети Letrozole при што се кумулира голем број на пациенти што се на листа на чекање.
2.Понатаму, втора недела нема и Oxaliplatin, две недели го нема лекот Zoladex.
Пациентите кои се обратија до Комисијата за здравство реагираат и за недостиг на основни информации во однос на тоа кога ќе се набават овие лекови, единствено добиваат одговор дека ќе бидат контактирани и дека се ставени на листа на чекање.
Како што посочува, токму дисперзија на лекувањето на малигни заболувања треба да биде во Битола со оглед дека таму има акцелератор – радиотерапевтски апарат кој не работи 7 години и фаќа прашина.
„ Во Клиничките болници во Штип и во Тетово иако има специјалисти радиотерапевти онколози, сепак истите овие партиски функционери без срам денес се појавуваат на партиски трибини за здравство во овие градови, без да ги исполнат ветувањата и без да преземат системски мерки за една од најранливите категории пациенти, а тоа се малигните заболувања“, вели Николов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Целосно реновирани управните служби во зградата на МРТВ: „Веќе нема да има хаос“

Министерот за внатрешни работи Панче Тошковски денеска заедно со раководството на Министерството го пушти во употреба реконструираното Одделение за управни работи – Скопје кое се наоѓа во зградата на МРТВ.
Тошковски образложи дека реконструкцијата почна кон крајот на месец октомври минатата година, и според него, била една од стратешките планови на ова раководството на МВР со цел граѓаните да добиваат брзи и ефикасни услуги кои ги плаќаат и ги заслужуваат.
„Веќе нема да има хаос, неред и граѓани со нарушено достоинство кога е потребно да се извади личен документ или било која услуга која ја дава овој Оддел. Целта на реконструкцијата е граѓаните да имаат можност за брзи и ефикасни услуги, да го штедат своето време и сето тоа да биде на достоинствен начин како што заслужува секој македонски граѓанин. Со реконструкцијата и реновирањето засега опфатени се 20 т.н. кабини за сликање кои ќе извршуваат повеќе работни функции и ќе даваат повеќе услуги на граѓаните, реконструирана е големата шалтер сала која во наредниот период ќе ги опслужува граѓаните во делот на издавањето на пасошите по итна и редовна постапка, личните карти по итна постапка, возачките дозволи, уверенија за државјанства заедно со сите останати постапки во врска со барањата за прием и отпуст од државјанства, промена на лично име и други, како и услуги од областа на возилата“, потенцираше министерот Тошковски.
Министерот за внатрешни работи Тошковски истакна дека заедничкиот простор кој е наменет и за граѓаните и за вработените е опремен на начин кој ќе овозможи секој граѓанин да се чувствува пријатно за времетраењето на давањето или чекањето на конкретната услуга.
Во реконструкцијата во оваа фаза се реконструирани и 15-на канцеларии за вработените, санитарните чворови, инсталиран е целосно нов централен систем за ладење и греење и извршено е целосно сервирање на надворешните окови, во насока објектот да биде што повеќе енергетски ефикасен.
Тошковски на крајот подвлече дека паралелно со процесот на дигитализација во кој многу од услугите кои ги дава МВР ќе бидат достапни и дигитално, ќе се продолжи со отворање на нови канцеларии на управни служби онаму каде што тие не се достапни за граѓаните, а веќе се отворени шест нови, како и реконструкција и модернизација на други каде што е потребно.
Македонија
ГРОМ бара обештетување на настраданите во Кочани и оставка од Мицкоски

Сведоци сме дека состојбата во Кочани полека но сигурно ескалира. Оправданиот револт на потесните и пошироките семејства на починатите и повредените е повеќе од оправдан. Големата болка на родителите се искажува преку тешки зборови упатени до претставниците на власта и уште потешки квалификации на апологетите на актуелната владејачка гарнитура, велат од ГРОМ.
Според партијата, Владата не се снашла најсоодветно со трагедијата и не е спремна да понесе политичка одговорност, да направи обид да ги смири тензиите и да најде начин да ја ублажи болката на семејствата.
„Затоа ГРОМ смета дека е потребно друга влада која ќе има повеќе разбирање за болката на овие наши граѓани. Предлагаме актуелните владетели да се обидат да придонесат кон деескалација на состојбите, и тоа Владата на Република Македонија предводена од Христијан Мицкоски веднаш да си поднесе неотповиклива оставка и ВМРО-ДПМНЕ да даде нов мандатар за состав на Влад. Новата Влада на Р. Македонија да донесе одлука со која на секое семејство од загинатите ќе им исплати 500.000 евра како мал надомест за големата болка и затоа што дел од родителите не се ни способни веќе за работен ангажман“, велат од ГРОМ.
Партијата предлага повредените лица од пожарот од дискотеката Пулс да се поделат во три категории согласно лекарските наоди и лицата со тешки и трајни оштетувања да добијат исто така по 500.000 евра и секоја година до крајот на животот, министерството за труд и социјална политика да им исплаќа по 30.000 евра, заради трајните животни последици и нивната неспособност за функционирање.
Во втората група да влезат лица со умерени оштетувања за кои ќе има потреба од подолгорочна рехабилитација и хируршки интервенции, да им се исплатат по 300.000 евра еднократно и до крај на животот да примаат по 15.000 евра годишно.
Лицата со лесни оштетувања кои биле болнички хоспитализирани, да им се исплати по 100.000 евра и наредните 3 години по 10.000 илјади евра како надомест за потребни рехабилитации.
Во исто време сите овие граѓани да имаат право да отворат судска постапка пред граѓанскиот суд доколку се незадоволни од обесштетувањето од страна на државата.
ГРОМ бара и Обвинителството и надлежните судски институции да продолжат со гонење и да дадат ефективна завршница на директно одговорните за овој страшен настан.
„За жал одговорноста за овој проблем, владата до сега се обидува само да го персонализира, без да преземе одговорност, но ако владата е неодговорна, државата мора да биде на ниво кон секој граѓанин кој го изгубил животот или има трајни последици како резултат на неодговорното функционирање токму на институциите кои ја претставуваат државата“, велат од ГРОМ.
Македонија
Ѓорѓиевски: Кисела Вода секој ден се менува, да ги чуваме новите реквизити, вандалското однесување да се пријави веднаш

Градоначалникот на општина Кисела Вода Орце Ѓорѓиевски, информираше дека во изминатиот период работеле на промена на старите и поставување на нови детски катчиња, реквизити и урбана опрема. Тој истакна дека се работи за нови нови подови кои се користат за летните Олимписки игри, нови клупи, фонтана и реквизити.
-Кисела Вода секој ден сѐ поубава, модерна и зелена. Изминатиов период работевме на обнова на старите, како и поставување на нови детски катчиња низ нашата општина. Се работи за нови детски катчиња, нова урбана опрема, клупи, фонтани, нови подлоги на игралиштата со полипропиленски под кој официјално се користи за летните Олимписки игри. За најмладите наши жители, за нивната детска игра непречено да тече добиваат модерни и безбедни простори, а повозрасните генерации ќе можат да уживаат во зеленилото и урбаната опрема кои ги нудат овие места. Сето ова, хортикултурно уредено за да естетски изгледа уште поубаво.
Апелирам до родителите и дечињата да ги чуваме овие нови реквизити, а доколку забележат вандалско однесување веднаш да пријават до надлежните полициски служби“.
Нашата Кисела Вода се менува секој ден и тие промени се насекаде околу нас“, рече Ѓорѓиевски.