Македонија
Меџити и Ковачевски го сменија планот: економските директори нема да се укинат од први јануари туку после изборите

Место од први јануари сегашниот Клинички центар да почне повторно да функционира со еден директор, како што уверуваа министерот за здравство Фатмир Меџити и премиерот Димитар Ковачевски, организациските директори остануваат и ќе земаат плати уште околу половина година. Премиерот Димитар Ковачевски денес извести дека укинувањето на организациските директори, популарно наречени економски директори, ќе се случи по изборите.
„Министерот за здравство веќе поднесе информација до Владата. Тоа се случи пред еден месец. Предложи укинување не само на организациските директори туку и на медицинските директори на клиниките, повторно спојување и да имаме еден клинички центар во кој ќе се знае одговорноста, обврските и надлежностите, нормално низ една хиерархија која што ќе биде договорена низ процесот на имплементација на оваа информација и соодветните заклучоци кои се донесени. Министерот за здравство тоа што го вети и тоа што јас сум го ветил веќе го имаме почнато како процес и тој процес сигурно дека некаде после изборите ќе биде реализиран со оглед на тоа што треба да се направат соодветните реорганизации. Тоа е процес кој е почнат и кој ќе заврши. Да бидеме реални на еден квадратен километар 60 директори, 60 организациски директори, 60 управни одбори, нема никаква потреба од тоа“, рече премиерот Ковачевски.
Како оправдување зошто досега не се укинати економските директори премиерот Ковачевски ги наведе ковид – кризата, економската и енергетската криза и нагласи дека Владата едногласно ја усвоила информацијата за реорганизација на Клиничкиот центар, веднаш откога министерот Меџити им ја доставил.
Министерот Меџити пред седум месеци рече дека подготвил план за укинување на организациските директори кој како информација ќе го достави до Владата. Уверуваше дека од први јануари Клиничкиот центар „Мајка Тереза“ ќе почне да функционира со еден директор, а не можело планот да се спроведе веднаш откако беше изготвен оти пресметките се правеле со почетокот на новата година.
„Едвај чекам тоа да се случи, нема повеќе да имаме загубари кои не знаат што работат. Ќе се прават набавки со цел поголемо количество-пониска цена“, рече министерот Меџити пред седум месеци.
Денес, пак, уверува дека се тече според планирана динамика и организациските директори ќе бидат укинати, но по изборите.
„За ова главните борци за да го дотераме до крај бевме јас и премиерот. Ова ќе биде реалност некаде до крајот на мај или почеток на јуни. Течат сите процедури. Треба да се спојат 33 управни одбори, 33 медицински, 33 организациски директори. Тие заеднички служби, 20 милиони евра загубари кои јас многу ги сакам, нема да ги дозволиме. Сите планови се реализираат со конкретната динамика што ја имавме досега“, рече министерот Меџити.
И тој и премиерот Ковачевски сметаат дека не постои опасност новата Влада да не го продолжи проектот оти се уверени дека ќе биде истата Влада.
Меџити е третиот министер за здравство кој зборува за укинување на економските директори на клиниките. Пред него економските директори ги укинуваа и Беким Сали и Венко Филипче, но само декларативно.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Почина Панчо Минов, поранешен пратеник и градоначалник на Кавадарци

На 67-годишна возраст денеска почина Панчо Минов, поранешен градоначалник на Кавадарци и поранешен пратеник во Собранието.
Панчо Минов беше дипломиран правник и политичка фигура со повеќедецениско искуство. Тој два пати беше избран за градоначалник на Општина Кавадарци – прво како кандидат на Либералната партија (2000–2005), а потоа како независен кандидат (2005–2009).
Минов имаше и пратеничка кариера, учествувајќи во повеќе состави на Собранието.
Првпат беше избран во првиот повеќепартиски состав (1990–1998), а подоцна повторно стана пратеник преку ГРОМ (2016–2020) и СДСМ (2020–2024).
Македонија
Уште колку луѓе треба да настрадаат за Панче Тошковски да почувствува одговорност, прашуваат од СДСМ

Министерот Панче Тошковски без око да му трепне јавно соопшти дека не чувствува никаква одговороност за колапсот на безбедносниот систем и фактот што на улиците се пука како да сме Див Запад, велат од СДСМ.
Според нив, последиците од партизацијата на полицијата и претоварењето во партиски сервис на ДПМНЕ скапо ги чини граѓаните.
„До кога мисли Тошковски да се криe зад политички реторики додека улиците стануваат небезбедни за граѓаните?
Не е само последното пукање во Куманово, непрекинатиот раст на вооружените и насилни инциденти во различни градови е сигнал за целосно системско потфрлање на безбедниот апарат, нема ниту превенција ниту соодветна реакција.
За тоа мора да има одговорност“, додаваат од оваа партија.
Македонија
Парични казни за три градинки и едно училиште по спроведени инспекциски контроли во кујните

Инспекциските служби на Агенција за храна и ветеринарство (АХВ), во септември годинава спроведоа инспекциски контроли во училишните и кујните во градинките на територијата на цела држава. Спроведени беа 91 контрола во градинки и 23 вонредни надзори во училишта.
За утврдените недоследности, издадени се 9 решенија со наредби за нивно отстранување. Во две градинки, хигиената не била задоволителна во кујните, а една градинка немала спроведено задолжителен здравствен преглед на вработениот персонал во кујните. Парични казни изречени се за 3 градинки, и поради несоодветно чување, уништени се 24 килограми храна.
Од спроведените контроли во училиштата, незадоволителни услови констатирани се само во една училишна кујна. Отстапки во однос на добрата производствена и добра хигиенска пракса утврдени се во две кујни. Поради погрешно декларирање, уништени се 59 килограми храна.
Инспекциските служби на АХВ за утврдените недоследности со контролите во училишните кујни изрекле 1 парична казна и донеле 5 решенија со наредба за нивно отстранување.