Македонија
Османи: Одбранбен геополитички штит за одбрана на либералната демократија преку забрзана евроинтеграција на регионот
Министерот за надворешни работи Бујар Османи, денес, учествуваше на дискусијата, организирана од страна на Европскиот совет за надворешни односи (ЕЦФР) на тема „Како да се убедат Европејците за проширувањето на ЕУ“. Како повод на дискусијата, на која Османи учествуваше заедно со Лике Фрис, копретседавач со ЕЦФР и директор на данскиот тинк тенк Еуропа и Енѓељуше Морина, виш политички аналитичар на ЕЦФР, е истражувањето на ЕЦФР, кое е објавено денес, а спроведено во шест земји членки на ЕУ (Германија, Франција, Данска, Австрија, Полска, Романија) пред овонеделниот Самитот на Унијата на кој ќе се расправа за проширувањето.
„Денес, повеќе од кога и да е, постои геополитички императив за проширувањето на ЕУ. Да не заборавиме дека и Балканот е на „линијата на огнот“ бранејќи ги либералните вредности на Западот, истовремено, станувајќи мета на странски малигни влијанија со далекусежни последици за целиот европски континент. Затоа пристапот на ЕУ треба да се преиспита и да овозможи забрзан ЕУ процес со непосредни и опипливи придобивки за оние кандидати кои ги исполнуваат условите. Со овој чекор, ЕУ ќе започне да гради одбранбен геополитички штит за одбрана на сопствената демократија преку вклучување на преостанатите земји од Југоисточна Европа“, истакна Османи.
Осврнувајќи се на истражувањето на јавното мислење во земјите членки на ЕУ, министерот Османи упати повик до лидерите на ЕУ, но и до земјите кандидати, со заеднички напори, да се убедат граѓаните и пошироката европска јавност во нивниот сопствен интерес од влезот на идните земји членки.
Османи ги сподели и резултатите од истражувањата на јавното мислење во нашата држава, подвлекувајќи дека долготрајноста на евроинтеграцискиот процес и претходните услови од билатерална природа доведоа до надолен тренд на поддршката на нашите граѓани за пристапувањето во ЕУ. Во тој контекст, Османи ја презентираше тезата дека одолговлекувањето на пристапниот процес има негативни последици по социјалната динамика, при што ефектот од забавената ЕУ интеграција раѓа тнр. „развојна зависност“ меѓу преговорите и реформите, со негативен предзнак.
„Загрижувачкиот тренд треба да се избегне со промена на наративот, но и со правилата на игра. Наместо фокусот да ни е насочен кон членството како краен исход, ЕУ треба да им понуди на нашите граѓани што е можно повеќе среднорочни цели и опипливи придобивки – затоа се залагам за поголема интеграција пред членство како наш одговор на концептот на постепена интеграција“, посочи Османи.
Воедно предочи дека овој концепт на етапно пристапување, за кој се дебатира во сите европски метрополи и во Брисел, неопходно е да се материјализира во одлуките на Советот следните денови и да почне да се спроведува. Основниот пакет подразбира најмалку присуство на секторските состаноци на Советот на ЕУ без право на глас (статус на набљудувач) и учество на Единствениот пазар, како и достапност до структурните и кохезиските фондови на ЕУ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на министерот Муцунски со шефот на Мисијата на ОБСЕ во Скопје, Вал
Министерот за надворешни работи и надворешна трговија, Тимчо Муцунски, денеска оствари средба со шефот на Мисијата на ОБСЕ во Скопје, амбасадорот Килиан Вал. На средбата беше потврдена долгогодишната соработка со ОБСЕ во различни области, при што беше изразена поддршка за напорите на Организацијата насочени кон зајакнување на соработката и одржување на мирот во регионот на ОБСЕ, извести МНР.
Двајцата соговорници изразија задоволство од досегашната соработка помеѓу ОБСЕ и македонските институции, и ја потврдија подготвеноста за нејзино продолжување. Тие разменија мислења и за тековните активности на Мисијата и заеднички ја реафирмираа посветеноста на продолжување на проектите кои ги поддржуваат реформските процеси на новата Влада.
Македонија
ЛДП со реакција за изјавата градоначалникот на Кисела Вода: Сепак има надеж
ЛДП реагираше на изјавите на Орце Ѓорѓиевски во врска со можноста за отповикување на градоначалници, нагласувајќи дека оваа иницијатива не е нова, туку е дел од нивните заложби кои претходно не биле поддржани ниту јавно ниту во Собранието.
„ЛДП ја истакна потребата за воспоставување на механизам за отповикување на градоначалници преку референдум, со цел поголема отчетност и одговорност на локалните лидери. Оваа иницијатива, која партијата ја поддржува подолг период, се заснова на примери од европските земји како Обединетото Кралство, Полска и Молдавија, каде ваквите механизми веќе се применуваат.
Според нив состојбата во која градоначалниците можат да ги поминат своите мандати без да одговараат за несработеното, ги оштетува општините и граѓаните. Иницијативата за отповикување на градоначалници се споменува како начин за подобрување на транспарентноста и одговорноста на локалната власт кон оние кои ја избрале“, велат од ЛДП.
Од партијата потсетија дека уште изминатата година кога ја пласираа идејата за доверба или отповикување на градоначалник истата беше отфрлена.
„Воедно минатата недела поднесовме амандман на измените во законот за локална самоуправа, кој за жал не беше поддржан во Собранието. Но, добро е што само по неколку дена доаѓаат позитивни реакции и изјави по однос на нашата заложба. Подаваме рака да го изработиме предлогот и да го усвоиме сите заедно во интерес на граѓаните“, истакнуваат од ЛДП.
ЛДП почнува серијал на јавни трибини со сите засегнати страни, а пред се со граѓаните затоа што предлогот ги има нив во фокусот: да добијат отчетни институции кои ќе им служат лично нив, а не на сопствените и партиски интереси. Институции исклучиво по европски стандарди и хармонизација со европското законодавство. ЛДП го повикува претседателот на ЗЕЛС и Министерот за локална самоуправа да се приклучат на оваа иницијатива.
Македонија
Претседателката Сиљановска Давкова се обрати на дискусијата „Младите и внатрепартиската демократија“
Претседателката Гордана Сиљановска Давкова се обрати на дискусијата „Младите и внатрепартиската демократија“, што се одржа во Кабинетот на Претседателот по повод 15 септември – Меѓународниот ден на демократијата.
Во дискусијата учествуваа подмладоци од политичките партии во земјава кои ги претставија своите погледи и искуства за улогата и положбата на младите во политичките партии кадешто членуваат и разменија идеи и препораки за подобрување на внатрепартиската демократија и за поттикнување на младинскиот ангажман во политиката.
Претседателката Сиљановска Давкова во обраќањето пред политичките подмладоци посочи дека демократизацијата на политичките партии е клучна за демократизацијата на политиката. Таа се осврна на процесите на внатрепартиското одлучување, на процесите на кандидирање и избор на партиските функционери, посочувајќи дека е неопходна децентрализираност на партиите, почитување на различни тенденции и мислења внатре во партиите и поавтентичен настап на локалните партиски организации.
Во таа насока, таа говореше за потребата од одговорност внатре во партијата, неопходноста од реформи, партиципативна политичка култура и промени во пристапот и комуникацијата на партиите со јавноста.
Претседателката во своето обраќање се осврна и на структурата на партиите и нивното претставување од аспект на родовата застапеност, истовремено посочувајќи дека дејствувањето на политичките партии во голема мера зависи од етичкиот капацитет на водството и на лидерот.
Претседателката ја поддржа потребата од поголема вклученост на младите во носењето на партиските одлуки, истакнувајќи дека тие треба да бидат најсубверзивниот елемент којшто ќе влијае на демократизацијата на овие процеси и на партиското одлучување.
Истакнувајќи ја важноста на внатрепартиската демократија, младите ги разгледаа можностите и начините за нивно поголемо влијание врз политичките процеси, преку активно учество и инклузија во партиските структури.
Политичките подмладоци како генератори на идното партиско лидерство ја истакнаа важноста од едукација и сензибилизирање за демократијата и нејзините сфаќања помеѓу младите.