Скопје
Општина Центар со богата хуманитарна програма за помош на Лео
Општина Центар во соработка со „Рамстор“ почна со одржување низа хуманитарни настани со цел да му се помогне на младиот Леонид Игнов да продолжи со лекувањето и да ја добие најголемата животна битка.
Првата хуманитарна ликовна изложба што ја подготвија талентираните и креативни основци од општината се одржа вчера во трговскиот центар „Рамстор“, а на настанот настапија и „златните славејчиња“.
Градоначалникот Герасимовски им се заблагодари на учениците, нивните родители и на наставниците што се одѕваа во толку голем број за да помогнат и да ја покажат својата хуманост и солидарност на дело.
„Хуманоста вечерва сите нè сплоти на едно место. Со помош на овие млади уметници и прекрасните гласови на ‘златните славејчиња’, но и со поддршка на нашиот пријател ‘Рамстор’, се собравме за да донираме за младиот Лео кому му е потребна нашата помош за да продолжи со својот живот. Упатувам апел до сите наши сограѓани да ни се приклучат и да подадат рака“, изјави Герасимовски.
Средствата што беа собрани од продажбата на ликовните творби на учениците ќе се донираат за медицинскиот третман на Лео, кој доби тешки повреди на ‘рбетот во несреќен случај пред неколку месеци.
Општина Центар во наредните недели, на 20, 27 и на 29 декември, на вториот кат во „Рамстор“, ќе организира уште три хуманитарни настани за помош на младиот Леонид, на кои ќе учествуваат младите центарци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
(Видео) Партијата Левица ги поддржа граѓаните: Протест за поништување на ДУП што предвидува висококатница во Лисиче
Граѓани од скопско Лисиче протестираа пред седиштето на Општина Аеродром, откако на седница на Совет беше изгласан ДУП со кој се предвидува и висококатница во населбата Лисиче. Партијата Левица им даде поддршка на граѓаните, а нивните советници гласаа против спорниот ДУП.
Советникот Горан Костовски од Левица истакна дека се прекршени повеќе процедури, така што ДУП-от за Лисиче ќе биде оспорен. Освен што е ставен вон Деловникот, ДУП-от бил донесен и како „итна точка“, а немало итност, велат од партијата Левица.
– Не помина на Комисија за урбанизам каде јас сум член. И затоа ќе следува претставка. Исто така, по Деловникот на Општина Аеродром, кога се носи ваква „итна“ точка, било кој советник може да побара пауза од неколку часа, доколку сака да спреми амандмани. Меѓутоа, мене тоа деловничко право не ми беше овозможено од претседателот на Советот, Дејан Митески. Дополнително, планот добил и позитивно мислење од Министерството за транспорт и врски од досегашниот министер Благој Бочварски. Меѓутоа, одобрувањето е ден пред седницата, а министерот е во оставка и не може да одобрува ДУП. Така што, ова ќе се спори и на Уставен суд, посочи Костовски.
Според него, ако се изгради зграда од 12 ката, тогаш Лисиче ќе биде под канџите на градежната мафија, која ќе почне да им ги откупува бараките на локалните староседелци.
„Жителите на Лисиче сакаат да им се зачува карактерот на населбата, кој е со семејни куќи и не сакаат згради, не сакаат дополнителна урбанизација. Сметаат дека со овој ДУП, дополнително ќе се бетонизира населбата, ќе се создаде урбанистички и сообраќаен хаос.
Советниците од Левица најавуваат дека следи кривична пријава за несовесно работење во службата до претседателот на Совет, Дејан Митевски, поради одземање на советничкото право за поднесување амандмани и прекршување на Деловникот.
ДУП-от беше усвоен со 16 гласа „за“ од страна на советниците на ВМРО-ДПМНЕ“, додаваат од партијата Левица.
Скопје
Дел од Центар утре без струја
Регионалниот центар за управување со кризи на Град Скопје, по добиеното известување од ЕВН, информира дека утре поради планирани технички интервенции во електро-дистрибутивната мрежа, без електрична енергија ќе остане дел од општина Центар.
Утре, од 09:00 до 15:00 часот, дел од улицата Даме Груев – Блок 10 згради и деловни објекти во општина Центар ќе бидат без струја.
Скопје
Градски паркинг: Од утре започнува летното сметање на работното време на јавните површини за зонско паркирање
Јавното претпријатие Градски паркинг – Скопје ги известува граѓаните дека од 01.06.2024 (сабота) започнува летно сметање на работното време на јавните површини наменети за паркирање- зонско, со кои стопанисува претпријатието.
Работното време во зоните А, Б, Ц и Д ќе биде:
– Од понеделник до сабота: 07:00- 23:00 часот.
„Исто така, им апелираме на сите корисници на нашите услуги да бидат внимателни и навремено да извршат наплата при паркирање согласно наведеното работно време“, додаваат од Градски паркинг.