Спорт
Се подготвува трејд на три екипи во Евролигата

Италијанскиот весник „Супер баскет“, кој веќе подолго време е и интернет портал, носи интересни информации во врска со трансферите на кошаркарите во Евролигата. Овој извор најавува трејд на три клуба. Размената би била реализирана во последните денови од 2023 година.
Како што пренесува „Супер баскет“, Олимпија Милано е заинтересирана за услугите на грчкиот плејмејкер Ник Калатес, кој моментално настапува за Фенербахче од Истанбул.
Во Ломбардија се подготвени да се откажат од Кевин Пенгос, плејмејкер од чии настапи во клубот не се задоволни. Во почетокот Армани сакаше да го испрати Пенгос во Валенсија, но тој трансфер не беше успешен. Пенгос играше за Жалгирис од 2016 до 2018 година и како што тврди „Супер баскет“, тој би можел да се врати во Каунас.
Сепак, за да биде реализиран трејдот на трите клуба, нешто треба да добие и Фенербахче. Турскиот тим го сака најдобриот играч на Жалгирис, Кинан Еванс.
Токму во неделата се појави информација дека раководството на Жалгирис ги слуша понудите за Американецот, кој во Евролигата во просек постигнува по 16 поени по натпревар. Раководството на клубот од Каунас не сака да остане без никакво обештетување на лето, со оглед на тоа што е извесно дека Еванс ќе замине во некој од богатите европски клубови.
Договорите на тројцата плејмејкери истекуваат на 30.06.2024 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Мекенро: Алкараз и Синер би го победиле Надал во неговите најдобри денови

Легендарниот американски тенисер Џон Мекенро го коментираше неверојатното финале на Ролан Гарос.
Шпанецот Карлос Алкараз го победи италијанскиот тенисер Јаник Синер во финалето на Ролан Гарос и ја одбрани титулата. До победата дојде со пресврт, каде што спаси три меч топки, а потоа победи со 3:2 во сетови.
Мекенро беше импресиониран од нивната игра.
„Знам дека сум луд што го кажувам ова, но верувам дека Карлос Алкараз и Јаник Синер, со играта што ја одиграа во финалето, ќе беа фаворити против Рафаел Надал во неговите најдобри денови“, рече легендарниот Американец за „TNT Sports“.
„Свесен сум како звучи она што го кажав бидејќи ерата на тројцата најдобри играчи во историјата што траеше 20 години штотуку заврши. Роџер Федерер, Рафаел Надал и Новак Ѓоковиќ. Исто така, знам дека Надал го освои Ролан Гарос 14 пати“.
Сепак, тој верува дека на Алкараз и Синер ќе им биде тешко да ја насминат големата тројка.
„Дали мислам дека ќе стигнат до 20, 22 или 24 Гренд слем титули? Не верувам во тоа бидејќи тоа ниво е многу високо. Речиси е невозможно бидејќи многу работи можат да се случат. Тоа е како да гледате НБА и да велите дека никој не може да биде подобар од Мајкл Џордан.“
Спорт
Кепа Аризабалага се сели во Арсенал
Шпанскиот голман Кепа Аризабалага (30) ќе ја продолжи кариерата во Арсенал, објавија британските медиуми.
„Топџиите“ бараа резервен голман, а нивната прва опција беше Жоан Гарсија (24) од Еспањол, но таа алтернатива пропадна. Затоа се свртеа кон Аризабалага, чиј договор со Челзи истекува за една година.
Откупната клаузула е шест милиони евра.
Аризабалага пристигна во Челзи во летото 2018 година од Атлетик Билбао во трансфер вреден дури 80 милиони евра, што е највисоката сума платена за голман во историјата на фудбалот.
Последните две сезони ги помина на позајмица, прво во Реал Мадрид, а потоа во Борнмут, каде што беше стандарден во првиот тим.
Сега треба да биде замена за сонародникот Давид Раја во Арсенал.
Спорт
Ф1 го објави календарот за 2026 година

Светската автомобилска федерација го објави календарот на Формула 1 за следната сезона.
Следната година ќе имаме 24 трки, идентични како оваа сезона, со таа разлика што во календарот влегува Големата награда на Мадрид, додека Големата награда на Емилија Ромања во Имола е избришана од календарот.
Ова значи дека ќе имаме две трки што ќе се возат на шпанска територија, додека Италија останува на една.
Сè ќе започне од Австралија на 6 март, додека сезоната традиционално ќе заврши во Абу Даби на 6 декември.
Извршниот директор на Формула 1, Стефано Доменикали, најави незаборавна сезона.
„Годината 2026 означува нова ера за Формула 1, каде што ќе имаме сосема нов сет правила за спортот, автомобили и мотори кои ќе користат 100% одржливо гориво. Многу сме задоволни што го гледаме Мадрид во календарот за прв пат, и што ги гледаме големите автомобилски брендови како што се Ауди, Кадилак и Форд како влегуваат во Формула 1.
Ќе биде незаборавна сезона, каде што повторно ќе имаме 24 фантастични трки низ целиот свет за да ги гледаме најдобрите светски возачи како ги поместуваат границите на своите способности и обезбедуваат неверојатни битки од тркало до тркало за милиони наши фанови низ целата планета.
Сакам да им се заблагодарам на сите наши фанови за нивната страсна поддршка, како и на ФИА, волонтерите, стјуардите и службените лица, како и на промотерите, партнерите, спонзорите, градовите домаќини и локалните авто-мото здруженија за нивната посветеност и поддршка во реализацијата на овој календар, за кој сум уверен дека ќе означи уште една историска година за Формула 1.“
Save the date 🔒
Presenting the 2026 Calendar 🗓️
24 races across the world to crown our champion 🏆#F1 #Formula1 pic.twitter.com/4xe7e8MPM6
— Formula 1 (@F1) June 10, 2025