Спорт
Мурињо за Салах и Де Брујне: Немаа трпение, тие побараа да си заминат од Челси
Жозе Мурињо конечно откри зошто Челзи ги продаде идните суперѕвезди Кевин Де Брујнe и Мохамед Салах. Египјанецот и Белгиецот со години се меѓу најдобрите играчи во светот, но не ja добија вистинската шанса на „Стемфорд Бриџ“.
Мурињо, кој донесе три шампионски титули на Стемфорд Бриџ во 2005, 2006 и 2015 година во два мандати, беше менаџер кога Челзи реши да го продаде Де Брујне на Волфсбург, а Салах на Рома.
Откако заминаа од западен Лондон, нивните кариери започнаа да се движат по нагорна линија и двајцата станаа легитимни кандидати за Златната топка.
Мурињо сега откри дека Де Брујне и Салах немале трпение да ја чакаат шансата на „Стемфорд Бриџ“.
„Да бидам искрен, тие заминаа затоа што сакаа да заминат, заминаа затоа што не сакаа да чекаат“, рече Мурињо како гостин во подкаст и продолжи:
„Минатото покажа дека направија добар избор. Но, понекогаш децата ги носат тие одлуки затоа што не сакаат да чекаат или немаат трпение да ја добијат вистинската шанса. Понекогаш нивните кариери одат во погрешна насока“.
Мурињо тврди дека клубот ја донел одлуката да ги пушти Салах и Де Брујне.
„Кога луѓето велат дека го пуштив Салах, јас го кажувам спротивното. Јас го донесов Салах. Ливерпул сакаше да го донесе од Базел, а јас влегов во војна за да го доведам.
Де Брујне имаше одлична предсезона. Беше стартер на почетокот на Премиер лигата, а во Суперкупот на Европа против Баерн беше на клупата. Следниот ден побара да си замине”, изјави Мурињо.
Во секој случај, Мурињо ќе остане запаметен во светот како еден од најдобрите тренери во историјата, додека Салах и Де Брујне изградија репутација на фудбалски шампиони.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Новинар на „Евроспорт“ му испратил навредливи пораки на полскиот селектор
Полска и Хрватска од 20:45 часот на Националниот стадион во Варшава ќе одиграат натпревар од четвртото коло од групата А1 во Лигата на нации.
Хрватите во овој меч влегуваат како втори во групата со шест бода, додека Полјаците се на три бода, што значи дека според сегашниот поредок треба да одат во плеј-офот за опстанок во елитната дивизија во Лигата на нации.
Полскиот новинар Пјотр Квјатковски кој работи за „Еуроспорт“ е незадоволен од резултатите на репрезентацијата.
„Пржеглад Спортови“, откри дека Квјатковски му испратил навредливи пораки на полскиот селектор Михал Пробијеж (52) во 4 часот и 20 минути, ноќта по поразот на Полска од Португалија.
Полските медиуми ги објавија пораките што Квјатковски ги испрати до селекторот.
„Ретко со години функционираат луѓе кои се целосно несоодветни за одредена област, а вие сте апсолутно неподобни за тренер. Апсолутно не сте способни да бидете тренер“.
„Вашите прес-конференции се трагедија“.
„Ти си олицетворение на полскиот фудбал. Не си доволно добар, што никој не ви го кажал, но вие мислите дека сте доволно добар“.
Квјатковски се извини за своето однесување во изјава за „Пржеглад Спортови“: „Ме обземаа емоции по уште еден лош натпревар. Му се извинувам на селекторот и му посакувам многу среќа против Хрватска“.
Во септември 2023 година, Пробијеж ја презеде репрезентацијата на Полска, со која во 14 натпревари оствари седум победи, три нерешени и четири порази.
Претходно во кариерата раководеше со голем број полски клубови и со полската репрезентација до 21 година. Со Краковија и Јагелонија го освои Купот на Полска во 2010 и 2020 година, а со истите клубови го освои националниот Суперкуп во 2011 и 2021 година.
Спорт
Гвардиола демантира дека ќе биде селектор на Англија
Дел од англиските медиуми објавија дека по завршувањето на актуелната сезона тренерот на фудбалерите на Манчестер сити, Пеп Гвардиола ќе ја преземе англиската репрезентација.
„Дали ќе го напуштам Манчестер сити на крајот на сезоната? Се уште не сум се одлучил. Мојата иднина е отворена и немам точни одговори. Се е можно во фудбалот, но гледајќи од оваа перспектива можам да кажам дека нема да бидам следниот селектор на Англија“, рече 53-годишниот Гвардиола, со години еден од најдобрите светски стручњаци.
По завршувањето на Европското првенство, кое Англија го загуби од Шпанија, селекторската функција ја напушти Герет Саутгејт. На негово место дојде Ли Карсли, но само како вршител на должноста, до изборот на новиот селектор.
Англиската фудбалска асоцијација се обидува да најде долгорочно решение, планот е на клупата на националниот тим да седне реномирано тренерско има. Засега, според бројните извештаи моментално прв фаворит е Томас Тухел.
Актуелниот договор на Гвардиола со Манчестер сити истекува на крајот од оваа сезона, а според некои извори во текот на летото Англиската фудбалска асоцијација веќе му понудила работа на Шпанецот. Овие наводи не се потврдени.
Англија минатата сезона испадна од елитната Лига на нации и оваа сезона игра во Лига Б По четири кола е на второто место во својата група со девет бодови. Грција има три повеќе.
Гвардиола е тренер на Манчестер сити од 2016 година, а покрај доминацијата во англискиот фудбал, пред две сезони на клубот му ја донесе и премиерната титула во Лигата на шампионите. Претходно работеше во Барселона и Баерн.
Спорт
Четири европски великани го следат вундеркиндот на Црвена звезда
Европските медиуми не престануваат да пишуваат за Андрија Максимовиќ, младиот напаѓач на Црвена звезда. По добрите игри во дресот на српскиот шампион и неговото репрезентативно деби, момчето родено во Нови Пазар е блиску до преселба во некој од најдобрите клубови во светот.
„Скај Спортс“, открива кои клубови се заинтересирани за Максимовиќ.
„Борусија Дортмунд е насочена кон Андрија Максимовиќ, 17-годишен играч на Црвена звезда. Овој викенд стана најмладиот играч во историјата на српската сениорска репрезентација. Тој има договор со црвено-белите до 2027 година. Цена, најмалку 15 милиони евра. Засега нема конкретни понуди, само се испитува теренот за евентуалните преговори“, пренесува новинарот на „Скај Спортс“, Патрик Бергер.
Меѓу заинтересираните за Максимовиќ, според наши извори, се уште Јувентус, Манчестер сити и Ливерпул“, вели германскиот новинар.