Македонија
„Каде се 50 милиони евра годишно од еколошката такса на Заев“, прашува партијата Левица
„Граѓаните повторно ја дочекаа зимата обвиени во токсичен воздух, а Скопје достигна и во топ 10 градови кои се најзагадени во светот. Владата на СДС во два мандати покажа тотална неспособност да се справи со овој горлив проблем, кој чини неколку илјади животи годишно!“, велат од партијата Левица.
„Иако, СДС ветуваше дека до 2024 година нема да постои ниту една институција која загадува, фактот е дека над 500 јавни објекти уште користат мазут. Гасификацијата, како клучен сегмент за решавање на овој проблем, остана само како предизборно ветување, додека токму Владата на СДС ја укина акцизата за увоз на нафтен кокс, под притисок на силното бизнис – лоби.
Токму владата на Заев воведе еколошка такса за возилата кои загадуваат, каде помпезно беше најавен милионскиот Зелен фонд. Тогашниот премиер Зоран Заев најави дека преку оваа такса годишно ќе се влеваат 54 милиони евра во буџетот – пари кои беа најавувани дека ќе завршат за државна помош за најсиромашните семејства“, соопшти партијата Левица.
„Очигледно е дека милионите од т.н. Зелен фонд завршија во нечии приватни џебови, додека социјал-демократите повторно удрија врз грбот на најсиромашните. Наместо да воведат еколошка такса за крупните индустриски загадувачи кои увезуваат нафтен кокс, СДС повторно се стави во служба на олигархијата и дозволи непречено да загадува додека остварува милионски профит!
Токму СДС го стави во употреба загадувачот ТЕЦ Неготино, каде беше откриено дека се користи канцерогено гориво, прикажано со лажни фактури како мазут. Во овој скандал беше инволвирана компанијата на поранешниот функционер од ДПМНЕ, Ратко Капушевски. За неказнивоста на ваквите геноцидни компании говори фактот што на компанијата уште не ѝ е одземена лиценцата. Бирократските процедури и недореченостите во регулативите доведуваат до тоа задоцнето да се откријат ваквите загадувачи.
Левица се залага за зајакнување на капацитетите на Државниот инспекторат за животна средина, како и проширување на надлежностите овој инспекторат да врши проверка уште во фаза на увозот на горивото. Оваа надлежност моментално е во рацете само на Царина и Пазарниот инспекторат, што во пракса се покажа како нефунцкионално.
Без целосна гасификација на Македонија и субвенционирање за надминување на енергетската сиромаштија, граѓаните ќе продолжат да се гушат во токсичен воздух. Токму изградбата на ХЕЦ Чебрен, како стратешки проект, е од суштинско значење за транзицијата кон обновливи извори на енергија и значително редуцирање на загадувањето. Токму заради ова, Левица е против катастрофалната идеја на Владата Чебрен да се даде на приватен капитал, со што енергетската независност на Македонија целосно ќе зависи од профит-интересите на странскиот капитал“, се додава во соопштението на партијата Левица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.
Македонија
(Видео) Битиќи: Над 75% од граѓаните се за членство во ЕУ, власта да каже која е алтернативата
Во сите анкети над 75% од граѓаните велат дека се за членство во ЕУ. Политичарите имаат обврска да носат одлуки, за да одговорат на нивното очекување. Владата треба да каже кој е нивниот план. Очигледно гледаме сценарио во кое за жал продолжува стариот манипулативен приод на оваа гарнитура, да изманипулираме што можеме за избори а после кога ќе ја добиеме власта ништо од тоа не важи, рече пратеникот на СДСМ, Фатмир Битиќи во одговор на новинарско прашање.
На власта беше да ги подобри условите како што ветуваше, додаде тој.
-И сегашната партија ВМРО-ДПМНЕ нема добиено повеќе од 25% од вкупниот број граѓани на изборите Легитимитетот на изборите не мора да значи дека се носат добри одлуки. Но и да прифатиме дека е тоа така, нивно беше да ги сменат условите. Да го сменат и Францускиот предлог, да ја сменат и преговарачката рамка, и да го вратат името. Очигледно гледаме сценарио во кое за жал продолжува стариот манипулативен приод на оваа гарнитура, да изманипулираме што можеме за избори а после кога ќе ја добиеме власта ништо од тоа не важи, додаде Битиќи.
Која е алтернативата? Власта треба да каже како понатаму после одвојувањето на европскиот пат, рече Битиќи.
-Наредната недела изминуваат 100-те дена и убаво на следните пратенички прашања Владата да дојде со план каде ќе се движи Македонија во наредните години, кога е очигледно одвојувањето на европскиот пат од другите земји.