Свет
Потресни сведоштва на раселените жители на Газа: Живееме во кошмар

Абу Ибрахим, раселениот Палестинец кој живее во трошен шатор во градот Рафах во јужниот дел на Појасот Газа, вели дека „живееле во кошмар и се надеваат дека ќе се разбудат од него“.
Ибрахим (50) смени неколку места на живеење во текот на повеќе од два месеци кога почнаа израелските напади врз Газа и им беше кажано да ги напуштат своите домови.
Пред 80 дена тој го напушти својот дом во Абасан Ал-Џадид, источно од градот Кан Јунис во јужната енклава.
Екипата на Анадолу откри каде тој се обидува да направи храна за своите деца и сопруга.
„Погледнете ги моите раце, моите очи и моето лице. Сè е црно од овој оган бидејќи не можеме да најдеме ништо друго да го запалиме огнот освен хартија, слама и најлон. Црниот чад ми ги пече очите“, изјави Ибрахим.
Израел започна напади врз Појасот Газа по нападот на палестинската група Хамас на 7 октомври, при што според локалните здравствени власти загинаа најмалку 21.110 Палестинци, главно жени и деца, а ранети се 55.243 други.
„Пиеме загадена вода и јадеме загадена храна, а тоа го знаеме затоа што најчесто ја готвиме користејќи најлон, кој ја покрива храната со својот црн чад. Но, ние немаме друга опција бидејќи имам деца да ги хранам. Посакувам да го сонувам ова и да се разбудам. Во секој момент се прашувам дали ова е сон или реалност?“, рекол Ибрахим.
Тој посочи дека се во состојба на хистерија поради нехуманите услови во кои живеат.
„Никогаш не очекувавме дека ќе доживееме таков ден. Ова е кошмар. Секогаш кога се движиме, израелските сили ги бомбардираат областите каде што бараме засолниште и ни велат да продолжиме понатаму“, рече Ибрахим.
Не знае во каква состојба е неговата куќа, но се надева дека ќе се врати во неа.
„Сакам да се вратам во мојата куќа и да живеам како нормален човек, оставајќи го бездомниот живот зад себе“, изјави Ибрахим.
Во еден дел од шаторот седат сопругата и децата на Ибрахим.
„Не можам да верувам дека сме во оваа ситуација, не можам да се навикнам. Се чувствувам како да живеам во кошмар“, рече таа, прашувајќи се себеси: „Дали навистина ова е нашиот живот?“.
Во друга блиска област во Рафах, Ахлам Шалх седи со своите деца откако беше раселена од бегалскиот камп Нусејрат.
„Јас сум од градот Газа. Бевме во кампот Нусејрат на почетокот на војната, а вчера израелската армија побара од нас да го напуштиме кампот и да одиме во Деир ал Балах или Рафах“, рече Ахлам.
Тие решија да заминат во најјужниот дел на Појасот Газа, но не најдоа засолниште.
„Седиме овде без храна, вода, па дури и без ќебиња“, рече Ахлам.
Хинд Абдел Наби, друга раселена Палестинка, чија ситуација не е многу поинаква, рече дека дошла во градот Рафа со своето дете, кое боледува од срцеви заболувања.
„Не можам да најдам никакво засолниште, дури ни ќебиња. Ладно е ноќе. Барав шатор за моите деца, но не успеав да го најдам“, изјави Наби за „Анадолу“.
Како резултат на израелските напади, Газа е во урнатини. Околу 60 отсто од инфраструктурата на енклавата е уништена или оштетена, а речиси два милиони луѓе се раселени и се соочуваат со недостиг од храна, чиста вода и лекови, пишуваат медиумите во светот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Трамп: Го прашав Путин дали е тигар од хартија

Американскиот претседател Доналд Трамп изјави дека во еден од неговите разговори со рускиот претседател Владимир Путин отворено ја довел во прашање моќта на Русија, велејќи му дека изгледа како „хартиен тигар“.
Обраќајќи се вчера кон американските генерали, Трамп повторно изрази разочарување од рускиот лидер за тоа што, како што рече, брзо не ја завршил војната во Украина.
„Му реков: ‘Знаеш, не изгледаш добро. Четири години водиш војна што требаше да трае една недела. Дали си тигар од хартија?’“, рече Трамп.
На 23 септември, Трамп јавно ја спореди Русија со „тигар од хартија“, велејќи дека земјата води војна повеќе од три години без никаква цел. Според него, вистинска воена сила во таква ситуација би победила во рок од една недела.
Претседателот на САД, исто така, нагласи дека Украина може целосно да го врати својот територијален интегритет бидејќи Русија се соочува со сериозни економски проблеми.
Портпаролот на Кремљ, Дмитриј Песков, реагираше на изјавите на Трамп, велејќи дека Русија почесто се поврзува со мечка отколку со тигар. „Нема мечка од хартија“, рече Песков.
фото: принтскрин
Свет
Германија го запре, а потоа повторно го одобри извозот на оружје во Израел

Германија одобри извоз на оружје за Израел во вредност од најмалку 2,46 милиони евра откако беше воведена делумната забрана за извоз, покажува одговорот на Федералното министерство за економија на парламентарната истрага на Левичарската партија. Пратките вклучуваат „друга воена роба“ и не вклучуваат воено наоружување, соопшти министерството.
Канцеларот Фридрих Мерц на 8 август нареди привремено запирање на извозот на воена опрема што може да се користи во конфликтот во Газа. Овој потег беше одговор на сè поагресивните воени дејствија на Израел и означи промена во германската политика кон земјата. Пред тоа, Берлин постепено ги засили критиките кон владата на премиерот Бенјамин Нетанјаху, но се воздржа од санкции.
Не беа издадени дозволи за извоз во првите пет недели по забраната. Сегашните дозволи, кои го опфаќаат периодот до 22 септември, покажуваат дека пратки во вредност од 2,46 милиони евра се извршени помеѓу 13 и 22 септември. За споредба, од 1 јануари до 8 август 2024 година, дозволите за извоз за Израел изнесуваа вкупно околу 250 милиони евра.
Точната природа на стоката останува нејасна. Во одговорот на министерството се наведени осум категории, вклучувајќи ракети, торпеда, воени бродови и поморска опрема. Но, бидејќи извозот не е класифициран како оружје за војна, а вкупната вредност е релативно мала, пратките веројатно вклучуваат прибор или опрема.
Делумното запирање предизвика критики во Израел. Нетанјаху ја обвини Германија дека ја наградува палестинската милитантна група Хамас за тероризам, изразувајќи го своето разочарување директно до Мерц.
фото: принтскрин
Европа
Експлозии и пукање во Минхен: едно лице загина, друго е повредено

Голема полициска и противпожарна операција е во тек од раните утрински часови во северен Минхен откако се слушнале експлозии и пукотници. На местото на настанот биле распоредени специјални сили и одреди за деактивирање бомби, а бил видлив и густ облак од чад, објавува „Билд“.
За време на интервенцијата, пронајдено е тело на маж, а според неофицијални информации, се сомнева дека тој поставил експлозивни направи во куќата на своите родители, ја запалил, а потоа си го одзел животот.
Die Toni-Pfülf-Schule bleibt für die Dauer des Einsatzes geschlossen. https://t.co/qpYQtATM4O
— Polizei München (@PolizeiMuenchen) October 1, 2025
Дополнително, пронајдено е уште најмалку едно лице со прострелни рани. На местото на настанот бил видлив целосно изгорен автобус.
Инцидентот се случил на улицата Лерхенауер, а полицијата го оградила поширокото подрачје. Властите апелирале до граѓаните и учесниците во сообраќајот да го избегнуваат тој дел од градот.
фото: принтскрин