Регион
Патници од Скопје среде хаос на белградскиот аеродром „Никола Тесла“
Поради грешка во функционирањето на услугите на операторот на аеродромот „Никола Тесла“ во Белград, во неделата околу 17:00 часот во транзитната зона настанало мешање меѓу патници кои пристигнале од Скопје и други патници кои имаат намера да патуваат до европски и светски дестинации, а над кои претходно била извршена контрола и преглед на лица и багаж.
Поради ваквата состојба, а со цел да се обезбедат неопходните услови за безбедност на авионите и патниците, барањата на операторот и персоналот на аеродромот до МВР беа да се запре понатамошната пасошка контрола на излезот од Србија и на влезот на нови патници во транзитната зона, додека транзитната зона не се испразни и не се изврши повторен безбедносен преглед на сите лица во таа зона, што вообичаено го врши персоналот на операторот на аеродромот Никола Тесла, согласно Законот за воздушен сообраќај.
Од наведените причини граничната полиција привремено ја прекина пасошката контрола со цел да се почитуваат безбедносните услови и да се воспостави целосна безбедност на лицата и воздухопловите.
Сето ова предизвика хаод на белградкиот аеродром „Никога Тесла“, а патници паѓале во несвест поради големата концентрација на луѓе на мал простор. Од компанијата Ер Србија најавија дека ќе ги компензираат или пренасочат патниците кои претрпеле штета или пропуштиле понатамошни летови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вучиќ со Фон дер Лајен: Сѐ додека јас сум претседател, Србија ќе остане на европскиот пат
Претседателот на Србија, Александар Вучиќ, денеска изјави дека сѐ додека тој е претседател на државата, Србија нема да ги промени своите главни надворешнополитички цели, а тоа се европскиот пат и определбата за членство во ЕУ.
На заедничката прес-конференција со претседателката на Европската комисија, Урсула фон дер Лајен, која е во дводневна посета на Србија, Вучиќ рече дека европскиот пат е од клучно значење за напредокот на земјата, дека Србија посветено работи на тој пат и се надева на резултати.
Тој истакна дека имал многу долг, крајно отворен и искрен разговор со Фон дер Лајен и дека има работи за кои Европската Унија ја критикува Србија, но дека претседателот на ЕК секогаш бил подготвен да ја сослуша нивната страна.
Како што рече, разговарале за определбите на Србија.
„Јас ѝ го кажав истото тоа што ви го кажав вчера. Колку и да размислуваат поинаку некои луѓе, јас сум претседател на Републиката со највисок легитимитет во државата, избран директно од граѓаните двапати по ред во првиот изборен круг, што никогаш не се случило во нашата историја, а додека јас сум претседател, нема промена на главните цели на нашата надворешна и внатрешна политика. Тоа значи дека нашиот европски пат е и наше застапување за европска Србија и е од клучно значење за нашиот напредок, дека Србија ќе се посвети на работа на тој пат и дека се надеваме на резултати“, изјави Вучиќ.
Тој ѝ честита на Урсула фон дер Лајен за нејзиниот реизбор на функцијата претседател на Европската комисија и ѝ се заблагодари за поддршката што ѝ ја дала на Србија во претходниот мандат и додаде дека се надева оти тоа ќе продолжи да го прави и во овој мандат, пренесува „Танјуг“.
„Има една работа што луѓето во Србија многу ја почитуваат. Кога ни доаѓаат гости, речиси сите доаѓаат во Белград кога се во прашање високи делегации, официјални посети во нашата земја и двапати отидовме далеку од Белград, далеку од урбаните средини, а тоа е нешто што нашите граѓани, нашиот народ, исклучително го почитуваат и ценат, ви благодариме за поддршката и помошта што ни ја дадовте во претходниот период“, рече Вучиќ.
Регион
Eвакуиран aеродромот во Сараево поради дојава за поставена бомба
Поради анонимна дојава дека на Меѓународниот аеродром во Сараево била поставена експлозивна направа, патниците биле евакуирани, пренесува „Кликс“. Во тек е увид на пиротехничарите, кој ќе трае неколку часа.
„По добиената анонимна дојава за наводно поставување експлозивни направи во просториите на меѓународниот аеродром во Сараево, надлежните служби веднаш ги презедоа сите неопходни мерки во согласност со важечките безбедносни протоколи. Се врши детален интервентен преглед. Во соработка со надлежните безбедносни агенции, обезбедена е целосна безбедност на сите патници и на вработените на аеродромот.
Ги молиме граѓаните за разбирање и благодариме за трпението. Меѓународниот аеродром во Сараево ќе продолжи да ја следи ситуацијата и навремено ќе ги пренесеме сите дополнителни информации“, соопштија од аеродромот.
Покрај аеродромот, дојава за бомба добиле и три средни училишта во Сараево, пренесува „Кликс“. Евакуирани се и училиштата, пишуваат локалните медиуми.
Регион
Фон дер Лајен: ЕУ веднаш испраќа 20 милиони евра за подрачјата во БиХ погодени од поплави
Претседателката на Европската комисија, Урсула фон дер Лајен, во Сараево изјави дека Европската Унија веднаш ќе испрати 20 милиони евра во областите во Босна и Херцеговина кои се погодени од поплавите.
Во рамките на посетата на Босна и Херцеговина, Фон дер Лајен оствари средба со претседавачот на Советот на министрите на Босна и Херцеговина, Борјана Кришто, претходно се сретна и со членовите на Претседателството на Босна и Херцеговина, а во четвртокот попладне ја посети Долна Јабланица, која најмногу настрада во неодамнешните поплави и свлечишта, јавува „Анадолија“.
Таа ги посети БиХ и Сараево како дел од својата турнеја во Западен Балкан, од каде што подоцна в петок ќе замине за Белград.
Претседателката на Европската комисија уште еднаш им изрази сочувство на членовите на семејствата на настраданите во неодамнешните поплави во Босна и Херцеговина.
„Беше болно да се видат размерите на катастрофата во областа Јабланица. Сакам да испратам порака до сите дека ЕУ беше со вас и дека ќе продолжиме да даваме поддршка. Го активиравте и механизмот за цивилна заштита на Европската Унија и во рамките на тој механизам веднаш реагираа многу земји, што покажува колку пријатели има БиХ“, рече Фон дер Лајен на прес-конференцијата.
Таа исто така посочи дека ЕУ ќе ја разгледа можноста за обезбедување помош на БиХ од Фондот за солидарност, кој е достапен за земјите членки во случај на природни катастрофи.
„Фондот за солидарност е фонд што редовно го користат земјите членки во време на катастрофи и несреќи, но тој е отворен и за земји штоимаат кандидатски статус. Тоа секако ќе го разгледаме, но дополнително почувствувавме дека ви треба помош и затоа донесовме одлука да го сториме тоа веднаш, без одлагање да се мобилизираат средства во висина од 20 милиони евра, а потоа ќе следува фаза на закрепнување и рехабилитација, која ќе биде поддржана преку Фондот за солидарност“, изјави Фон дер Лајен.
Таа изрази благодарност за посветеноста на БиХ на европскиот пат.
„Оваа земја измина долг пат со напорна работа и, конечно, стигнавте до кандидатски статус. Донесена е и одлука за отворање на пристапните преговори. Има уште многу да се направи, но знам дека напорно работите за да го донесете законот. Затоа најискрено сакам оваа земја да направи чекори на европскиот пат“, рече таа.
Таа нагласи дека е многу важно Босна и Херцеговина да дејствува обединето за поефикасно спроведување на реформите и постигнување резултати на европскиот пат.
„Босна и Херцеговина многупати во минатото покажа дека може да постигне резултати кога се однесувате и настапувате на уникатен начин и се надевам дека во иднина ќе видиме уште повеќе таков уникатен пристап“, рече Фон дер Лејен.
Таа рече дека прашањето за проширувањето на ЕУ ќе биде апсолутен приоритет за време на нејзиниот втор мандат.