Македонија
Ангеловски: Овој амандман е за да се видиме в лице и да видиме кој е за тоа луѓето да си ги земат своите плати, а кој е за чиста политика
„Јас сум еден од тие кој инсистираше на овој амандман и јас со чист образ, со лице стојам пред сите овде дека не се изигрувам со никого. Ќе ви кажам една дефиниција дека вие пред два часа овде водевте политичка војна, секој со свој став и секој со обид токму неговото кажано да биде вистина и го доведовте Градот, не доведовте сите овде да се срамиме од сопственото присуство во оваа сала“, истакна советникот Страшо Ангеловски од коалицијата за „Обнова на Македонија“ во Советот на Град Скопје на денешната вонредна седница.
Ангеловски додаде дека во една таква војна па макар и политичка секогаш нештата завршуваат со компромис или со договор.
„Бидејќи очигледна беше конфронтацијата на една, две, три или пет струи во оваа сала, идејата на овој амандман беше како да им се излезе во пресрет на вработените во ЈСП. Она за што нели кубевте коси сите дека луѓето не можат да земат плата за декември месец. Идејата е и како да им обезбедиме уште два или три месеци мирна работа знаејќи дека ќе имаат плата и за тие наредни месеци“, нагласи Ангеловски.
„Мене лично зборувам за себе ме доведовте во една дилема според која јас знам дека некаде во октомври месец гласав, јас лично кренав рака и гласав за субвенции од 110 милиони со кои ќе се реши проблемот во ЈСП за месеците ноември и декември“, нагласи тој.
Советникот посочи дека денес од него се бара повторно да гласа за она што еднаш веќе се изјаснил и бил ЗА.
„Оттука бидејќи таа дилема не само што никој не ми ја разјасни туку заплеткувајќи се во обидите секој да биде на страна на својата вистина и на своето право, таа дилема уште кај мене лично зборувам уште ја зголемивте“, појасни Ангеловски.
Тој укажа – „Овој амандман е за да се видиме в лице и да видиме кој е навистина за луѓето да си ги земат своите плати и нивните дечиња да не останат дома без млеко и леб, а кој е за чиста политика односно да го истера своето по секоја цена дека мора да биде така“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицотакис: Очекувам од новиот премиер изјава дека името на неговата земја е Северна Македонија и тоа ќе го користи во и вон неговата земја
„Очекувам од новиот премиер да даде јасна изјава дека го почитува Договорот од Преспа и дека името на неговата земја е Северна Македонија и тоа ќе го користи во и вон неговата земја“ рече грчкиот премиер Кирјакос Мицотакис во интервју за телевизијата Стар.
Говорејќи за надворешната политика, тој се осврна и на односите со Северна Македонија, посочувајќи дека Атина се стреми кон добри односи, но неопходно е почитување на Договорот од Преспа.
„Видов некои изјави на претседателката на Северна Македонија и мислам дека направи некои чекори назад од првичните изјави. Ние се стремиме кон добри односи со Северна Македонија, но многупати имаме кажано дека добрите односи поминуваат преку почитувањето на јадрото на Договорот што го потпишаа двете земји“, истакна тој.
„Договорот одреди едно име за сите и ова соседите мора да го почитуваат. И очекувам од новиот премиер, кога и штом ќе положи заклетва да даде јасна изјава дека го почитува Договорот од Преспа и дека името на неговата земја е Северна Македонија и тоа ќе го користи во и вон неговата земја“, кажа грчкиот премиер.
Македонија
Маричиќ – Бока: Европската интеграција на Северна Македонија мора да продолжи со превземање на одговорноста и обврските на патот кон ЕУ
Првиот заменик претседател за европски прашања Бојан Маричиќ денес оствари средба со Јанос Бока, министерот за европски прашања на Унгарија.
На средбата се говореше за приоритетите на унгарското претседателство со цел зајакнување и поддршка на процесот на европските интеграции на Северна Македонија во периодот што следи. Унгарија како претседавач ќе биде фокусирана на проширувањето на Европската Унија со земјите кои се дел од пакетот за проширување со фокус на Западен Балкан и Северна Македонија и со посебен акцент на спроведување на реформите.
Унгарија претседава со Советот на Европа од 1 Јули 2024 до крајот на годината.
Маричиќ изјави дека државата мора да го продолжи процесот на евроинтеграција, кој е дел од меѓународните заложби и обврски за просперитет на регионот, Европа и сите граѓани на државата.
Превземањето на обврските и исполнувањето на долгорочните планови со Европската Комисија се од витално значење за прогрес на државата, меѓународните стратешки партнери и за развојот на геополитичката мапа на регионот и Европа.
Маричиќ ја истакна важноста од носење на важни одлуки за понатамошно реализирање на стратешките цели на Северна Македонија и регионот за која се залагаат и земјите членки на ЕУ, регионот на Западен Балкан и сите стратешки партнери на државата.
На средбата во фокус беше и одлучноста односно заложбата на Европската Комисија за Планот за раст за земјите на Западен Балкан, можностите и конкретните мерки со кои земјите кои се дел од Планот за раст ќе ги почувствуваат придобивките од неговата имплементација во претпристапниот период се до полноправно членство во унијата, каде што природно, географски и идеолошки припаѓаат.
Маричиќ и Бока се сложија дека во последните 2 години беа постигнати значајни резултати во процесот на евроинтеграција на Северна Македонија, со реализација на скрининг процесот, отпочнувањето на преговорите за државата и комплетната подготовка за реализација на европската агенда на државата.
Европската интеграција мора да продолжи со превземањето на обврските на патот кон ЕУ со кои државата ќе се движи во правец на прогрес и значаен развој. Реализацијата на Планот за раст е исклучително важен процес, бара детално и вредно вклучување на сите капацитети со големи придобивки за државата и за сите граѓани во неа – рече Маричиќ.
Македонија
Мицкоски на средба со Мануел Сарацин: новиот пратенички состав и идната влада ќе бидат силно посветени на реформите и трансформацијата на Македонија
Претседателот на ВМРО-ДПМНЕ Христијан Мицкоски заедно со потпретседателот Тимчо Муцунски и пратениците и членови на ИК, Марија Митева и Антонијо Милошоски оствари средба со специјалниот претставник на Сојузна Република Германија за Западен Балкан, Мануел Сарацин.
Во духот на одличната соработка беше и оваа средба, како што информираат од ВМРО-ДПМНЕ, во која се потенцираше важноста за реформските процеси како и можностите за продлабочување на соработката помеѓу Македонија и Германија.
Мицкоски истакна дека новиот пратенички состав и идната влада ќе биде силно посветена на реформи и трансформација на Македонија.