Македонија
(Видео) Талат Џафери денес мандатар, в недела премиер
Претседателот на Македонија, Стево Пендаровски денеска му го врачи мандатот на Талат Џафери за состав на техничката влада, чиј мандат ќе трае до парламентарните избори закажани за 8 мај.
Како што соопштија од кабинетот на Пендаровски, македонскиот претседател му додели мандат на Џафери да ја формира привремената влада врз основа на Уставот на РСМ и согласно Законот за Влада.
Мандатот на Џафери го доби врз основа на претходен меѓупартиски договор, а преодната влада има задача да ги спроведе претстојните парламентарни избори кои ќе се одржат на 8 мај.
„За претставник за состав на преодната влада за спроведување на парламентарните избори го назначувам господинот Талат Џафери“, рече Пендаровски.
Ова е и првпат Албанец да се најде на чело на македонската влада.
Претходно, на денешната собраниска седница, откако беа констатирани оставките на Димитар Ковачевски и Талат Џафери, беше избран нов претседател на Парламентот. За оваа функција со 64 гласа „за“ од присутни 104 пратеници, беше избран Јован Митрески. Против предлогот гласаа 40 пратеници, а воздржани немаше.
Џафери претходно поднесе оставка од функцијата претседател на македонското Собрание. На неговата оставка и претходеше оставката на лидерот на СДСМ, а сега поранешен премиер Димитар Ковачевски.
Со давањето на мандатот за состав на техничката влада заврши делот од процедурата која беше предвидена за денеска. Според највеното, утре Џафери треба да достави програма и состав на Владата.
Седницата за гласање на техничката влада е закажана за в недела и треба да заврши најдоцна до полноќ, кога и официјално треба да бидат избрани носителите на извршната власт во наредните 100 дена, до 8 мај, односно до официјалното прогласување на резултатите од страна на Државната изборна комисија.
Опозициската ВМРО-ДПМНЕ, иако предложи кандидати за министри и дополнителни заменик-министри, стои на ставот дека нема да гласа за Влада на чие чело ќе биде кадар на ДУИ.
Претходно Џафери рече дека до Собранието ќе предложи целосен состав на новата влада ако од ВМРО-ДПМНЕ достават до него предлози за министри и дополнителни заменик-министри.
За тоа, како што рече Џафери, нема пречка бидејќи таков е законот.
Претходно минатата недела, Димитар Ковачевски кажа дека министерските и дополнителните заменик-министерски места кои со закон ѝ следуваат на опозицијата во техничката влада треба да останат празни ако ВМРО-ДПМНЕ не даде глас за таа влада.
„Сметам дека ВМРО – ДПМНЕ согласно закон како и сите други политички партии што имаат министри во техничката Влада треба да ги даде своите кандидати и да гласа за таа Влада. Доколку реши да не гласа за таа Влада, тогаш сметам дека тие места треба да останат празни мандатарот да предложи Влада во која што тие места ќе бидат упразнети“, кажа Ковачевски.
Ова ќе биде трета техничка влада по Пржинскиот договор. Додека на чело на Владата беше Зоран Заев договори премиер Албанец, а СДСМ остана на тој договор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Меџити-Вал: заедничка цел зајакнување на правната држава, борбата против корупцијата
Првиот вицепремиер и министер за животна средина и просторно планирање Изет Меџити денеска беше домаќин на работна средба со амбасадорот на Мисијата на ОБСЕ во Република Северна Македонија, Килиан Вал.
Меџити и Вал разговараа за можностите за соработка во континуирано партнерство со цел унапредување на приоритетните реформи во согласност со заложбите на ОБСЕ.
Двајцата соговорници се согласија дека имаат за цел зајакнување на правната држава, борбата против корупцијата, родовата еднаквост и зајакнувањето на младите, додека промовирањето на транспарентноста, човековите права и одржливиот развој за доброто на сите граѓани остануваат заедничка цел.
Меџити повтори дека е максимално посветен на напредокот на интеграциската агенда на земјата кон зачленување во Европската унија, како единствено решение и со масовна поддршка од граѓаните.
Македонија
(Видео) Во Прилеп утре Ден на жалост, по трагичната несреќа во која загинаа три медицински лица
Во Прилеп, утрешниот ден се прогласува за Ден на жалост поради трагично загинатите медицински лица, кои утрово ги загубија животите во тешка сообраќајна несреќа на магистралниот пат Прилеп-Битола.
Одлуката беше донесена од страна на Советот на Општина Прилеп на вонредна седница.
Прилепскиот градоначалник Борче Јовчевски во своето обраќање рече: „Како градоначалник, како лекар, но пред се како човек утрово со тага ја примив веста за прераната смрт на нашите сограѓани, на еден прекрасен тим на специјалисти и медицински кадар. Еден тим кој животот го посвети во давање на помош и спасување на животи. Дури и на тој пат одеа да спасат животи. Прилеп и Македонија губат врвни луѓе, посветени на својата професија“, нагласи тој.
Несреќата се случила утрово при судир на автомобил во кое биле медицинските лица и товарен камион.
Македонија
Ковачки: Работите во судството се катастрофално лоши, потребни се оставки во судски совет, генерален ремонт и реизбор
„Работите во судството ни се лоши, катастрофално лоши и тоа е оценка на сите од надвор и од внатре“, истакна пратеникот од ВМРО-ДПМНЕ Драган Ковачки на денешната собраниска Комисија за политички систем и односи меѓу заедниците.
Тој посочи дека поради нула ажурност на судовите резултатите се катастрофални.
„Резултатите се катастрофални со ажурност нула на судовите. Од одредени судови се праќаат по други, од едни апелациони подрачја во други се праќаат на испомош затоа што нема судии“, вели Ковачки.
Правдата генерално во Република Македонија, според него ја нема, судство, обвинителство, како што вели, „таа спрега е скапана и тука ние не може да направиме исчекор без генерален ремонт. Мора да имаме генерален ремонт и реизбор“, потенцираше Ковачки.
Тој е дециден дека сите во судскиот совет треба да си дадат оставки.
„Судски совет како што сега е поставен треба да си дадат оставки затоа што доведоа до тие 2% доверба“, укажа Ковачки.