Регион
Европските ревизори: Треба подобра контрола за помошта од шест милијарди евра за Западен Балкан
Предложениот план за реформи и раст на Западен Балкан од шест милијарди евра треба да им помогне на овие земји да ги исполнат условите за влез во ЕУ. Во мислењето објавено од Европскиот суд на ревизори, се посочува дека дополнителните пари на Унијата треба подобро да се заштитат, соопштуваат од институцијата.
Економското зближување на шест западноевропски земји: Албанија, Босна и Херцеговина, Косово, Црна Гора, Северна Македонија и Србија, и ЕУ со години се сметаше за неефикасно, се додава во соопштението.
Како одговор, во ноември минатата година Европската комисија предложи формирање на посебен финансиски инструмент, Планот за реформи и раст на Западен Балкан, како дел од новиот план за раст на регионот.
Целта на овој план е стимулирање на економскиот раст, зголемување на социо-економското зближување со земјите од ЕУ и забрзување на усогласувањето со европските вредности и законодавство, имајќи го предвид идното членство, се наведува во соопштението, пренесуваат медиумите во регионот.
„Европските ревизори го поздравуваат воведувањето построги услови за финансирање, поврзувајќи ги плаќањата со исполнувањето на условите што ќе бидат поставени во реформските агенди за различни земји. Сепак, постои ризик дека условите за плаќање не се доволно амбициозни и дека индикаторите не се доволно јасни и мерливи. Исто така, останува тешко да се осигура дека реформите се одржливи, особено во однос на слабите административни капацитети на регионот“, рече членот на Европскиот суд на ревизори Лаима Лиучија Андрикиене.
Таа додаде дека Европската комисија не само што треба да набљудува, туку и да може да бара од владите на Западен Балкан да ги разгледаат и соодветно да ги променат нивните реформски агенди.
Европските ревизори предложија и изработка на соодветен водич за проценка на задоволително исполнување на условите за финансирање предвидени во реформските агенди.
„Поддршка од шест милијарди евра (две милијарди грантови и четири милијарди заеми) е предвидена во планот за периодот од 2024-2027 година. Имајќи предвид дека 14 милијарди евра се веќе ставени на располагање на претпристапните земји (вклучувајќи ја и Турција) од тековниот буџет на ЕУ, ревизорите истакнаа дека средствата што ќе се обезбедат со овој план претставуваат значително зголемување (повеќе од 40 проценти) во финансирањето предвидено за Западен Балкан до 2027 година., се посочува во соопштението.
Ревизорите констатираа и дека предложените мерки за раст објаснуваат зошто економиите од Западен Балкан треба да продолжат да се приближуваат кон ЕУ.
Планот ги истакнува и различните придобивки што ќе ги донесат предложените мерки за регионот, се посочува во соопштението.
„Меѓутоа, во отсуство на проценка на влијанието или аналитички документ, европските ревизори не беа во можност да оценат до кој степен проектираните шест милијарди евра помош веројатно ќе придонесат за постигнување на главните цели на планот. И, на крајот, ревизорите предлагаат допрецизирање на одредени одредби од предлогот што се однесуваат на ревизорските права на Европскиот суд на ревизори и пристап до податоци и документација за да се обезбеди соодветен надзор“, се наведува во соопштението.
Високиот претставник на ЕУ за надворешна политика и безбедност, Жозеп Борел, претходно го нарече планот за раст за Западен Балкан „важна понуда, која дава поттик за постигнување напредок во релевантните реформи“.
„Оваа понуда може да го забрза напредокот во нормализацијата на односите меѓу Косово и Србија преку Дијалогот што го води ЕУ. Секоја од партнерските земји од Западен Балкан има можност да поттикне економски раст и пристап до единствениот европски пазар, уште пред проширувањето – тоа е во интерес на целата ЕУ“, изјави Борел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Градоначалникот на Белград му се закани на маж и му го фрли мобилниот: Се чувствувал загрозен, објавија српските медиуми
Александар Шапиќ, градоначалник на Белград и кандидат за нов мандат на СНС, денеска предизвика инцидент и му го скрши мобилниот телефон на маж.
Имено, Шапиќ се појави на прес-конференција на која требаше да зборува за отстранување на сплавовите на савскиот насип, а потоа почна да разговара со граѓаните, што набрзо доведе до инцидентот.
По краток разговор тој почнал да си оди, кога еден од граѓаните почнал да го снима. Во тој момент Шапиќ му го зел мобилниот телефон и го скршил, пренесува Нова.рс.
Prostački napada @AcaSapic na aktiviste- otimanje telefona, razbijanje o beton i salva pretnji i uvreda tzv. gradonačelnika danas na Savskom keju. pic.twitter.com/6ImjFn9JQ1
— Petar Djuric (@Petar__Duric) May 9, 2024
Имено, како што пишува српскиот портал, мажот прашал до која година може да се легализираат дивоградбите, по што Шапиќ бурно реагирал.
На снимката се слуша како еден човек вели дека Шапиќ почнал да се заканува, со неколку пцовки, по што Шапиќ му го скршил мобилниот телефон.
Не е првпат неговите конференции да бидат обележани со физички инциденти и навреди.
Човекот кому Шапиќ му го скрши мобилниот телефон е активистот Александар Цвркотиќ, кој за Данас изјави дека го прашал кандидатот на СНС до кога може да се легализираат објектите. „Слушнав дека неговата куќа е изградена по годината пропишана со закон“, рече Цвркотиќ.
Регион
Кси Џинпинг му подари скулптури на Вучиќ кои го симболизираат кинеско-српското пријателство
За време на официјалната посета на Белград, кинескиот претседател Кси Џинпинг на српскиот претседател Александар Вучиќ му подари скулптури на Небесниот храм во Пекинг и Храмот на Свети Сава изработени од челик.
Фотографија на Кси Џинпинг и Вучиќ во присуство на нивните сопруги кои ги гледаат подароците беше објавена на интернет од страна на помошничката министерка за надворешни работи на Кина, Хуа Чунјинг, а пренесена од Спутник.
President Xi gifted President Vučić sculptures made of steel produced by the HBIS Smederevo steel plant. pic.twitter.com/66Mh5cae5v
— Hua Chunying 华春莹 (@SpokespersonCHN) May 9, 2024
Таа во најавата наведе дека на скулптурите се претставени небесниот храм во Пекинг и храмот Свети Сава во Белград, кои го симболизираат кинеско-српското пријателство.
Регион
Вучиќ до Силјановска-Давкова: Уверен сум дека ќе продолжиме да работиме на зајакнување на врските меѓу Србија и Македонија
Српскиот претседател Александар Вучиќ ѝ ја честита победата на Гордана Силјановска-Давкова во вториот круг од претседателските избори во Северна Македонија.
„Ѝ честитам на Гордана Силјановска-Давкова за нејзиниот избор за претседател на Северна Македонија и ѝ посакувам успешно да ја извршува одговорната должност што ја презема. Уверен сум дека ќе продолжиме да работиме заедно за зајакнување на врските меѓу Србија и Македонија, со цел напредок и благосостојба на нашите народи, како и просперитет на целиот регион“, изјави Вучиќ на платформата „Икс“.
„Многу ми значат вашите честитки“, му одговори Силјановска-Давкова на Вучиќ по упатената честитка.
„Вашите искрени честитки ми значат многу, претседателе Вучиќ. Очекувам дека ќе продолжиме да работиме на подобрување на одличните македонско-српски односи. Ви благодарам многу, претседателе Вучиќ“!, напиша таа во својот одговор на социјалната мрежа X.