Свет
Си-Ен-Ен: Кинески хакери се инфилтрирале во клучната американска инфраструктура

Кинеските хакери кои стојат зад кампањата за инфилтрирање во клучната американска инфраструктура имаат пристап до компјутерските мрежи на некои од нивните цели најмалку пет години, се вели во новиот извештај на американските и сојузничките безбедносни агенции што го виделе Си-Ен-Ен, а се очекува официјално да биде објавен ова недела.
Американските власти рекоа дека кампањата е дел од долгорочните напори на кинеските хакери да се позиционираат себеси за потенцијално штетни сајбер напади кои би можеле да го нарушат снабдувањето со вода и електрична енергија.
Шефовите на американското разузнавање го информираа Конгресот за заканата минатата недела, велејќи дека Пекинг може да ги искористи хакерските напади за да го попречи американскиот одговор во случај на можен кинески напад врз Тајван.
Директорот на американското Федерално биро за истраги (ФБИ), Кристофер Вреј, им кажа на конгресмените минатата недела дека кинеските хакери би можеле да предизвикаат хаос и штета на американската инфраструктура, според Си-Ен-Ен.
Разузнавачкиот извештај на речиси 50 страници е најдетално откривање на техниките за хакирање до сега, и има за цел да им помогне на приватните сопственици на критичната инфраструктура да ги забележат кинеските хакери во нивните мрежи.
Извештајот јасно покажува дека активностите на кинеските хакери започнале многу порано отколку што се знаело, со тоа што хакерите пристапиле до ИТ системи пред многу години, истакнува Си-Ен-Ен.
Се вели дека хакерите поддржани од Пекинг истражуваат пристап до системи кои го контролираат греењето, ладењето и снабдувањето со вода за да предизвикаат „значајни дефекти во инфраструктурата“.
Американските власти потврдија дека хакери упаднале во компјутерските мрежи во енергетските, транспортните и водните капацитети на континенталните и неконтиненталните американски и прекуокеанските територии, вклучувајќи го и „Гуам“, се вели во извештајот.
Во документот, според извештаите на медиумот, се наведува дека хакерите упаднале и во безбедносните камери на неименувани критични објекти.
Сè уште нема знаци дека Кина одлучила да го искористи присуството на хакерите за да ја наруши американската инфраструктура, велат американските власти, но тие се загрижени дека тоа може брзо да се промени во случај на криза.
Кина според написите,ги негира американските наводи за хакирање.
ФБИ, Националната агенција за безбедност и Агенцијата за сајбер безбедност и инфраструктура се меѓу американските агенции кои го составија извештајот, заедно со агенциите за сајбер безбедност од Австралија, Канада, Нов Зеланд и Обединетото Кралство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
40 ранети во Израел, двајца критично

Вкупно 40 лица побарале медицинска помош по вечерашниот ирански ракетен напад врз Израел, соопштија локалните здравствени служби. Двајца од повредените се во критична состојба.
Најголем број пациенти се лекуваат во болницата Ичилов во Тел Авив – 18 лица.
Според лекарите, пријавените повреди вклучуваат рани од шрапнели, вдишување чад и состојба на шок.
Свет
Израелската војска: Иран истрела помалку од 100 балистички ракети, повеќето ги пресретнавме

Портпаролката на израелската војска, Ефи Дефрин, рече дека помалку од 100 балистички проектили биле истрелани од Иран кон Израел.
Дефрин рече дека „повеќето од ракетите биле пресретнати од воздушната одбрана или паднале пред да стигнат до израелска територија“.
„Регистрирани се ограничен број погодоци на згради, а дел од штетата е предизвикана од фрагменти од пресретнати проектили“, додаде тој.
Според израелските медицински служби, во нападот биле ранети 40 лица.
Свет
Нетанјаху: Ова е можност за иранскиот народ да се спротивстави на режимот

Израелскиот премиер Бенјамин Нетанјаху вечерва и порача на јавноста дека можат да ги напуштат засолништата, откако новиот бран ирански ракети прелета над израелска територија.
„Иранскиот режим никогаш не бил послаб. Ова е можност за иранскиот народ да се спротивстави на режимот“, рече Нетанјаху во вечерашното обраќање.
Тој директно им се обрати и на граѓаните на Иран: „Јас сум со вас, израелскиот народ е со вас“, рече тој.
Министерот за одбрана на Израел, Израел Кац изјави дека Иран „ја преминал црвената линија со лансирање ракети кон израелските цивилни области“ и најави: „Техеран ќе плати висока цена“.
Оваа иранска одмазда следеше по израелските воздушни напади на иранска територија, при што беа погодени нуклеарни постројки и беа убиени високи команданти и научници.