Македонија
АСОМ: Класична злоупотреба на европското знаменце во Законот за игри на среќата
Асоцијацијата на спортски обложувалници на Македонија (АСОМ) најостро реагира за злоупотребата на европското знаменце во Законот за игри на среќа.
„Во повеќе наврати се обраќавме до јавноста и институциите и посочувавме дека во предложените измени воопшто не постои усогласување на одредбите од Законот за игри на среќа со некоја ЕУ директива, со што сериозно се поткопува интегритетот на ЕУ и нејзините вредности. Потребата од европско знаменце се наметнува при законски постапки каде е неопходно усолгасување со некоја од регулативите на европското законодавство, со цел побрз интегритет на земјата во Европската Унија. Во ваков случај, законот се спроведува по брза постапка, но со истото се ускратува и постапката од јавна расправа“, велат од АСОМ и додаваат:
„Ние кои сме директно засегнати и кои чиниме 95% од пазарот на игри на среќа во ниту еден момент немавме можност да ги дадеме нашите забелешки и коментари на законот, со што беше целосно оневозможено нашето право за јавна дебата. Ова е големо преобликување на индустријата и не може да се направи без редовна процедура и дискусија. Исто така, овој закон не постои во ниту една европска држава, ниту пак досега е користено вакво законодавство во ЕУ каде што нашата земја има за цел да интегрира“.
Ги повикуваат институциите, но и претседателот Стево Пендаровски да не го потпишува овој контроверзен закон, кој помина во кратка постапка под знамето на ЕУ, само за да се истуркаат нечии матни бизнис интереси.
„Претседателот и самиот изјави да не се брза процедурата со европско знаменце без сеопфатна и стручна дебата, па оттука, уште еднаш го повикуваме Претседателот да застане на страната на граѓаните и оние 54.000 лица кои ќе останат без основен приход доколку овој закон се спроведе на терен“, завршуваат од АСОМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЕСМ назначи тројца нови директори на подружниците за парно греење
АД ЕСМ објави дека назначи нови тројца директори на филијалите, односно фирмите-ќерки, што претставуваат системи за топловодно загревање.
Според одлуката на Управниот одбор, Марјан Милошевски, дипломиран машински инженер, е именуван за директор на подружница Енергетика.
Али Исмаиљ, дипломиран инженер по компјутерски науки, ќе раководи со ЕСМ Снабдување со топлина.
Александар Мирчевски, електроинженер, е поставен за директор на ЕСМ Топлификација Битола.
Македонија
Министерот Мисајловски на состанок на Северноатлатнскиот совет на НАТО, на ниво на министри за одбрана
Министерот за одбрана Владо Мисајловски од денеска учествува на дводневениот состанок на Северноатлантскиот совет на НАТО, на ниво на министри за одбрана, во Брисел.
Ова е прв состанок на НАТО на високо ниво по Самитот во Вашингтон и воедно прв состанок што го води новиот генерален секретар Марк Руте.
На одделните сесии, главни теми за дискусија се: одвраќањето и одбраната на Алијансата, поддршката за Украина, и зајакнувањето на соработката со земјите од Индо-пацификот.
Целта на состанокот е преглед на имплементацијата на одлуките од Самитот во Вашингтон во насока на зајакнување на капацитетите на Алијансата за одговор на растечките закани и предизвици.
Денеска беше оддржан и Состанок на земјите членки на Глобалната коалиција за борба против ИСИС, во организација на САД, со која претседаваше секретарот за одбрана Лојд Остин. Од страна на Министерот Мисајловски беше потенцирано дека справувањето со тероризмот останува од суштинско значење за колективната одбрана, во рамките на која македонската Влада ќе продолжи да соработува со своите сојузници.
На сесијата со глобалните партнери, покрај висок претставник на Европската Унија, за прв пат се поканети и министрите за одбрана на Австралија, Јапонија, Нов Зеланд и Република Кореја, на која се разговараше за тековните предизвици и неделивоста на глобалната безбедност.
Посебна сесија е посветена на јакнењето на соработката со Украина и јакнењето на глобалните партнерства. Во присуство на претседателот Володимир Зеленски и министерот за одбрана Рустем Умеров, ќе се разговара за новата НАТО Команда за координација на помош и обука за Украина, финансиската поддршка и за другите иницијативи што ќе овомзможат долгорочна помош.
На маргините на состаноците, министерот Мисајловски оствари одделни билатерални состаноци со своите колеги од Албанија, Норвешка и Словенија, и се заложи за понатамошно зајакнување на билатералната соработка во областа на одбраната.
Македонија
МАНУ: Во Македонија постои само една национална академија
Претседателството на МАНУ укажува дека Академијата никогаш не се занимавала и нема да се занимава со дневнополитички расправи и партиски дискусии, кои ја оптоваруваат редовната дејност на Академијата, односно со работи кои спаѓаат во доменот на Законодавниот дом и на државните институции, се наведува во соопштението од МАНУ во однос на најавите од некои политички партии за основање на академија на етничките Албанци во Македонија.
– Напоменуваме дека во Македонија, како и во земјите во регионот и во светот, постои само една национална академија која ја претставува државата во европската и во други меѓународни асоцијации на академии. Постојат примери во државите во регионот и пошироко за формирање на т.н. струкови академии во рамките на соодветни стручни здруженија (Академија за архитектура, Академија за медицински науки и др.), како и други научно-уметнички друштва во поголемите градови и во регионалните центри, но нема примери за формирање на паралелни национални академии, се подвлекува во соопштението од Претседателство на МАНУ.
„МАНУ секогаш била отворена за сите граѓани кои ги исполнуваат високите научни и уметнички критериуми за членство во неа, независно од етничката, верската и од каква било друга припадност. За политичките партии и нивните влијанија никогаш немало место во неа. Од нејзиното основање до денес, членови во Академијата биле припадници на македонскиот народ, но исто така и на сите етнички заедници. Меѓу другото, во последните петнаесетина години, во составот на МАНУ членуваа четири члена со албанска етничка припадност (од коишто, во трите последователни раководства, еден од нив ја извршуваше функцијата научен секретар, а двајца беа потпретседатели на Академијата, од кои еден и со мандат во актуелното раководство на Академијата), како и четири члена надвор од работниот состав“, посочуваат оттаму.
МАНУ, се наведува во соопштението, претставува најзначајна национална научна и уметничка институција од посебен општествен интерес во нашата држава, формирана во 1967 година, во согласност со највисоките универзални научни и уметнички стандарди и критериуми. Таа, повеќе децении наназад, со својата научно-истражувачка дејност, преку своето творештво и со советодавната улога, претставува столб во градењето и во зачувувањето на идентитетот и на државноста на македонскиот народ и на деловите од другите народи кои живеат во земјата.