Антикорупциската комисија jа запре постапката за имотниот анкетен лист на пратеникот и претседател на СДСМ, Венко Филипче.

По проверките во Катастарот, Централниот регистар, МВР, УЈП и повеќе банки, утврдиле дека анкетниот лист на Филипче бил целосен и нема прикривање на податоци за имот.

Антикорупциската комисија лани ја отвори постапката за проверка на имотниот лист на опозицискиот лидер. Претходно владеачката партија ВМРО-ДПМНЕ обвинуваше дека имотниот лист на претседателот на СДСМ бил поголем и тој имал повеќе станови сега како пратеник отколку претходно кога беше министер за здравство. Становите не ги пријавил кога требало и најавија дека ќе поднесат претставка до Антикорупциската комисија.

Левица ги демантира, како што велат, паушалните обвинувања на премиерот Мицкоски и неговата криминогена партија, кои во обид да го амортизираат нивното катастрофално работење, шират невистини и спинови за единствената легитимна опозиција Левица.

Ваквата реакција доаѓа откако Валентин Манасиевски, член на ЦК на ВМРО-ДПМНЕ, го обвини Димитар Апасиев дека купил деловен простор во Центар за 721 евра м2.

„Покрај обидот на Мицкоски да направи сензација од непостоечка тема, мислејќи дека ареолот на криминал кој тие го имаат воспоставено во политиката во однос на нивната Бела палата, ќе се преслика на другите политички партии – ја информираме јавноста дека Левица преку хипотекарен кредит ги обезбеди своите први простории откако постои, како централа за сите политички активности на Партијата. Односно, купените простории се под залог. Цената на квадратот, како и во сите случаи на купопродажба, е дефинирана со деловни преговори помеѓу продавачот и купувачот. Се работи за подрумски простории, кои се во руинирана состојба. Со спомнуваната банка Левица нема никаква деловна соработка, освен како продавач на овој имот кој бил под стечај веќе две години и пропаѓал“, велат од партијата.

Од Левица додаваат дека документите за купопродажба се јавно достапни во Катастарот на недвижности, иако, како што велат, премиерот на собраниската говорница мафташе со документи како да се службена тајна. „Имено, кога станува збор за тајни документи, нам како опозиција повеќе не’ загрижува вмешаноста на високите владини функционери во излевањето на државни тајни кон картели преку своето обезбедување“, се наведува во демантот од Левица.

Обвинетиот Влатко Кешишев за грабнувањата и убиствата на Вања и Панче денес одговараше и на прашањата на првообвинетот Љупчо Палевски, кој беше свртен со грб, откако на минатото рочиште рече дека се плаши од него.

Палевски го праша дали некогаш му се заканувал или лошо се однесувал кон него или дали евентуално му се заканувал на обвинетиот Велибор Манев. Кешишев негира.

Понатаму, Палевски продолжи: Кажавте дека сте биле домаќин во штабот. Може ли кој било да изнесува што и да било од штабот без јас да дадам дозвола?

„Не, првин требаше да се праша Палчо пред да се изнесе. Зад негов грб ништо не се работело, без да знае тој“, одговори Кешишев.

Го запраша и оти во 3 искази на ОЈО не споменал ранец, син ранец, кога и зошто сега се сетил да кажува сознанија на таа околност.

„Се сетив бидејќи сите видовме на видеоснимката и не можев да го побијам тоа. Се гледаше дека го земам и го носам ранецот во гаражата“ рече Кешишев.

„Каде во штабот сте виделе син ранец?“, пааша Палевски.

„Не се сеќавам“, рече Кешишев.

Палевски го праша: Во штабот, освен мојот пиштол, кој ми беше одземен во ваше присуство 6 месеци пред настаните, сте виделе ли друго оружје?

„Не знам, не сум видел, не знам каде стоел ранецот, но главно Палчо го носеше“, одговори Кешишев.

Кешишев на денешното рочиште рече и дека за таткото на Вања, Александар Ѓорчевски, не чул Палевски некогаш да разговара или да се договара со него.

На прашањето кога првпат дознал за таткото на детето, тој одговори: Па мислам кога го доведоа во ‘Беко’ слушнав дека разговараат со родителот на детето.

Прашан од адвокатот дали знаел дека има фотографија од конкретната личност што требало да биде грабната во Скопје, тој негира. Вели првпат ја видел фотографијата кога се вратиле од настанот во штабот кога почнал да отвора „Фејсбук“ и ја видел фотографијата од детето. Дотогаш немал видено никаква фотографија.