Македонија
Посета на министерот за внатрешни работи Панче Тошковски на Центарот за обука на МВР
Денес, министерот за внатрешни работи Панче Тошковски оствари работна посета на Центарот за обука на министерството за внатрешни работи.
На средбата, од страна на раководството на Центарот за обука, детално беше запознат со начинот на функционирање и активностите кои во моментот се спроведуваат во Центарот.
Центарот за обука е акредитиран преку ИАДЛЕСТ од Соединетите Американски Држави, а во моментов тече процесот за негова реакредитација. Во таа насока министерот Тошковски изврши увид на исполнувањето на стандардите од кои зависи реакредитацијата, најголем дел од нив зависат од исполнување на материјално-техничките капацитети кои согласно стандардите треба да бидат на високо ниво за истите да бидат исполнети.
Тука спаѓаат сместувачките капацитети, училниците, стрелиштата, салите за физичко, бројот на учесници/кандидати во тимовите за обука, начинот на спроведување на наставата, човечките ресурси итн.
Состојбата која е затекната не е во целост задоволителна, но министерот Тошковски истакна дека е потребно да се вложат максимални напори со цел исполнување на стандардите. Во таа насока министерот потврди дека до сега се завршени сите правни процедури за отпочнување со реконструкција на Центарот за обука, но согласно предвидената документација потребно е да се направат дополнителни реконструктивни зафати со цел затекнатите проблеми да не се повторуваат во иднина.
Дополнително, министерот Тошковски потенцираше дека е потребно итно решавање на статусот на редовните обучувачи во Центарот за обука. Недозволиво е овој кадар да нема полициски овластувања согласно видот на наставата и обуките кои ги изведува, како што впрочем е тоа регулирано во сите полициски академии и центри за обука во соседството и во Европа.
Стожерот на сите реформи во полицијата и министерството за внатрешни работи се наоѓа токму во Центарот за обука. Само преку ефикасна и квалитетна основна и континуирана обука се постигнува висок професионализам – истакна министерот Тошковски.
Воедно, оваа посета беше искористена и за увид во активностите кои се вршат во насока на отворање на новиот пункт за фотографирање и издавање на лични документи кој ќе функционира во рамки на Центарот за обука во Идризово. Овој пункт значително ќе го олесни процесот и ќе им овозможи на жителите на околните населени места во однос на нивните барања за лични исправи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК ги соопшти местата на кои ќе се прегласува на 22 мај
Државната изборна комисија (ДИК) денеска, на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1.194 и 1.202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино. Гласањето ќе се одржи идната среда, на 22 мај 2024 година.
ДИК на седницата ги разреши и претседателите на избирачките одбори, членовите и нивните заменици во избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга, 1272 во Општина Охрид и 2101 во Општина Желино.
Со оглед дека се кратки роковите за избор на нови избирачки одбори, за да биде регуларно прегласувањето, општинските изборни комисии (ОИК) ќе треба да ангажираат некои од веќе постојните избирачки одбори, или од најблиските избирачки места или некои други, и за тоа ќе треба да достават известување до ДИК.
Кампањата за повторното гласање ќе трае до понеделник, 20 мај, 00.00 часот. Притоа, ќе важат истите листи за болни и немоќни лица, ќе нема можност да се пријавуваат нови.
Според ДИК, има можност за измени и предлози за овластени претставници на кандидати. Тоа важи и за членовите на избирачките одбори кои се предложени од политичките партии.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.
Македонија
Утре затворени неколку улици во Скопје
Утре од 08.30 до 12.30 часот, поради одржување на натпревар „Стопански триоги триатлон”, со стартно-целна позиција кај Спортскиот центар „Борис Трајковски” во дел од градот ќе има изменет режим на сообраќај, соопшти СВР Скопје.
Посебниот режим на сообраќај ќе опфати дел од уличната мрежа околу СЦ „Борис Трајковски” и дел од булеварот Илинден (десна коловозна лента), потоа на потегот од крстосницата со булевар 8 Септември до крстосницата со улицата Никола Парапунов и обратно.
Утре исто така со почеток во 09.45 часот, поради одржување на спортско-рекреативен настан „Прв до врв” ќе има посебен режим на сообраќај во делот од градот каде што ќе се реализира манифестацијата.
Настанот почнува пред Музеј на град Скопје – улица Св.Кирил и Методиј, потоа лево по булеварот Св.Климент Охридски, во продолжение право по булеварот Мајка Тереза, па лево по улицата Тодор Александров и по локалниот пат за Средно Водно до врв на Водно („Милениумски крст”).