Свет
Шолц: Европа мора да ја зајакне својата одбрана без разлика кој ќе победи на изборите во САД
Европа мора да ја зајакне својата одбрана без разлика кој ќе победи на претседателските избори во САД или како ќе заврши војната во Украина, изјави германскиот канцелар Олаф Шолц на Минхенската безбедносна конференција.
Тридневниот годишен глобален собир на политичари, дипломати и воени офицери доаѓа откако во Европа расте загриженоста за посветеноста на Соединетите Држави да и помогнат на Украина да се одбрани од руската инвазија и пошироката одбрана на нејзините сојузници.
Поранешниот американски претседател Доналд Трамп изјави дека нема да ги брани сојузниците од НАТО кои не трошат доволно за одбрана, доколку тој повторно влезе во Белата куќа.
И републиканците во Конгресот кои го поддржуваат Трамп ја блокираат помошта за Украина во одбрана од Русија.
„Ние Европејците мора многу повеќе да се грижиме за сопствената безбедност, сега и во иднина“, рече Шолц на вториот ден од конференцијата наречена „Одбрана на Давос“.
Германија, најголемата европска економија, ги зголеми трошоците за одбрана на два отсто и ќе продолжи да ја исполнува таа цел на НАТО, рече Шолц.
Германија е во преговори со сојузниците Франција и Британија за развој на прецизно оружје со долг дострел за да се осигура дека нејзината стратегија за одвраќање останува врвна, рече германскиот канцелар.
Но, Шолц ја критикуваше изјавата на Трамп и рече дека „секое релативизирање на одбранбената клаузула на НАТО им служи само на оние кои сакаат да не ослабат, како што е рускиот претседател Путин. Трансатлантската врска остана силна“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Ученик донел бомба во училиште во БиХ
Полициските службеници од Полициската администрација Приедор дејствувале по пријава на директорот на основното училиште „Петар Петровиќ Нјегош“ во близина на Приедор, дека од страна на просветен работник на тоа училиште била одземена рачна бомба од еден ученик.
Постапувајќи по пријавата, полицајците утврдиле дека се работи за бомбата „М75“ (т.н. црна бомба) без почетен дел за детонација, и како таква се смета за неупотреблива и не може да биде опасност.
За настанот бил информиран и Окружниот јавен обвинител на Приедор под чиј надзор ќе се преземаат понатамошни мерки и активности.
Информациите за споменатиот настан ќе бидат доставени до Центарот за социјална работа Приедор, пренесуваат медиумите во регионот.
Свет
ОН ги повикуваат сите земји да ја признаат Палестина
Група експерти на Обединетите нации денеска ги повикаа сите земји да ја признаат палестинската држава за да се постигне мир на Блискиот Исток.
Повикот доаѓа по една недела во која Шпанија, Ирска и Норвешка официјално ја признаа палестинската држава, што го налути Израел, кој стана се повеќе изолиран на меѓународно ниво поради војната во Газа.
Експертите, вклучително и специјалниот известувач на ОН за човекови права на палестинските територии, рекоа дека признавањето на палестинската државност е важно за правата на палестинскиот народ и неговите напори за слобода и независност.
„Тоа е предуслов за траен мир во Палестина и на целиот Блиски Исток и започнува со итно објавување на прекин на огнот во Газа и запирање на натамошните воени упади во Рафа“, нагласија тие.
„Решението за две држави останува единствениот меѓународно договорен пат кон мир и безбедност и за Палестина и за Израел и е излез од генерациските циклуси на насилство и гнев“.
Со нивното признавање, Шпанија, Ирска и Норвешка сакаат да го забрзаат постигнувањето мир во Газа. Трите земји изразија надеж дека тоа ќе го забрза признавањето на другите западни земји. Данскиот парламент подоцна одби да го стори тоа, а Словенија ќе го разгледа во вторник. Израел се противи на признавањето на Палестина, тврдејќи дека тоа го зајакнува Хамас.
Свет
Шефот на Ербас: Проблемите на Боинг се товар за целиот сектор
Проблемите со безбедноста и квалитетот на американскиот производител на авиони Боинг би можеле да ја разнишаат довербата на патниците во воздушниот транспорт, предупреди извршниот директор на европскиот конкурент Ербас.
„Проблемите во Боинг се товар за целиот сектор“, изјави извршниот директор на бизнисот со комерцијални авиони на Ербас, Кристијан Шерер, за германскиот деловен неделник WirtschaftsWoche.
„Поради проблемите на Боинг, луѓето ќе почнат да ја доведуваат во прашање безбедноста на летањето“, објасни Шерер.
Боинг повторно е под лупа откако авионот од серијата 737 MAX остана без врата на летот на Алјаска ерлајнс на почетокот на годината. Пред пет години, регулаторите ширум светот го повлекоа Боинг 737 MAX поради две тешки несреќи во кои загинаа 346 луѓе.
Шефот на европскиот производител на авиони тврди дека не планираат да ја искористат можноста за поскапување на авионите.
„Ги зголемуваме цените само кога побарувачката ја надминува понудата“, рече Шерер, додавајќи дека е тешко да се предвиди како ќе се развиваат работите.
„Би рекол дека конкурентот во неволја може да се однесува релативно непредвидливо. Доколку, поради неповолни околности, авионите се натрупаат во неговите хангари, тој може да се одлучи на распродажба“, објасни шефот на Ербас.