Македонија
Џафери: Влогот во образованието е влог за европска иднина на младите, за просперитет и напредок на државата
Претседателот на Владата на Република Северна Македонија, Талат Џафери, го посети Универзитетот во Тетово и во Ректоратот имаше средба со ректорот, проректорите и сенатот на Универзитетот. Потоа премиерот Џафери го посети и студентскиот дом во Тетово кој од ноември минатата година веќе е ставен во функција и во кој во оваа академска 2023/2024 година престојуваат околу 300 студенти.
„Денеска сум тука, во посета на Универзитетот во Тетово, кој во изминатите 29 години докажа дека знае да создава стручни и образовани кадри, високо етаблирани во сите сегменти на општеството. Но, државниот универзитет немаше да биде комплетен без заложбите на Владата за изградба на студентскиот дом, во кој од ноември минатата година престојуваат околу 300 студенти. Студентскиот дом Тетово е најновиот студентски државен дом во нашата земја, и со него е остварена долгогодишна потреба на студентите кои студираат на Универзитетите во Тетово. Тоа е студентски дом кој ги исполнува сите современи стандарди за квалитет. Опремен e со нов инвентар и може да се каже дека овој студентски дом е најмодерниот во државата. Целиот проект чинеше 243.200.000 денари или речиси четири милиони евра“, рече Џафери.
Како што додаде, тетово со овој студентски дом веќе има комплетен универзитетски кампус, а државниот универзитет може да понуди комплетна услуга за академските граѓани.
„Сигурен сум дека ќе привлече значително зголемен број на студенти во следниот период. Создавањето на стручни и образовани кадри кои ќе се надградуваат овде, во нашата држава и своето знаење ќе го преточат во обезбедување позитивни промени тука во државата, е наш врвен приоритет. Пред нешто повеќе од три години, Владата за првпат воведе субвенциониран оброк за студентите, како и нови категории на студентски стипендии. Студентски оброк добиваат околу 30.000 студенти, а студентски стипендии добиваат 6.500 студенти. Студентите се опфатени и со новиот пакет антикризни мерки. Околу 11.000 студенти кои живеат надвор од местото на студирање добиваат ваучер за превоз, за што се предвидени околу 2 милиони евра од буџетот“, истакна Џафери.
Според него, подобрувањето на квалитетот на живот на студентите во земјава останува приоритет, и за тоа се обезбедени средства во износ од 25 милиони евра за реконструкција на сите 9 државни студентски домови во Скопје, Прилеп, Битола, Штип и Охрид.
„На крајот на минатата година беше потпишан договорот за реновирање и реконструкција на сите студентски домови во државата, етапно, почнувајќи од Стив Наумов и Кузман Јосифовски Питу, а потоа и другите. Влогот во квалитетно образование е најдобрата инвестиција која што можеме да ја направиме за сите нас. Дали ќе имаме просперитет и напредок во државата зависи од тоа како ќе ги едуцираме младите во неа. Тие со својот придонес се нашиот основен капитал за раст и развој на државата. Нема да дозволиме тој наш капитал да се одлева надвор, преку границите. Државата сме сите ние заедно, и затоа, секој од нас треба да го даде својот максимум за просперитет, раст и развој дома. Сите заедно да бидеме креатори на позитивните промени во општеството“, заврши Џафери.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
В понеделник дел од Центар без вода
ЈП Водовод и Канализација известуваат дека в понеделник поради санирање на дефект од страна на странка – фирма на улицата Франклин Рузвелт бр.60 во населба Центар без вода ќе останат корисниците на улицата Франклин Рузвелт лоцирани на потегот од улица Орце Николов до булеварот Партизански Одреди.
Водоснабдувањето ќе биде прекикнато во периодот од 09.00 часот па се до отстранување на дефектот.
Скопје
Одбележан 20 септември – денот на Општина Ѓорче Петров
Со положување свежо цвеќе на споменикот на Ѓорче Петров во реонскиот парк и со свечена седница на Советот, општината го одбележа празникот на општината – 20 септември.
Бројни делегации положија цвеќе на споменикот на великанот Ѓорче Петров, а се одржа и свечена седница на Советот на која беа доделени годишната награда, признанија и благодарници за особен придонес. Добитник на Годишната награда на Општината е фудбалската репрезентативка Афродита Салихи.
Градоначалникот Стојкоски во своето обраќање истакна дека останува доследен на заложбата да го направиме Ѓорче Петров модерно и урбано јадро за живеење.
„Во периодот зад нас, успеавме да сработиме проекти со кои затворивме горливи проблеми. Како градоначалник на општината Ѓорче Петров не можам да го сокријам своето задоволство од постигнатото: Работиме на нова детска градинка во Стопански Двор, која се очекува да биде завршена во следните две години, и на уште една локација, односно во Дексион. Завршена е доградбата на ООУ „Димитар Поп Георгиев-Беровски“ во Хром со нови училници, а централното училиште речиси целосно го реконструиравме. ООУ „Тихомир Милошевски“ доби 6 нови училници и тоалети. Интервениравме во сите училишта, како и во училишните спортски сали, а следуваат уште инфраструктурни проекти кои значително ќе ги подобрат условите за настава. Проектот „Првиот центар за ресоцијализација на деца кои го победиле карциномот“ се реализира во Кучково.
Една од најзначајните инвестиции е изградбата на станицата за третман на отпадни води и фекален колектор во село Орман. Реконструиравме над стотина улици, поставивме нова фекална и атмосферска мрежа, ја отворивме новата општинска зграда, ја доградивме градинката „Детелинка“, Кучково доби нов систем за водоснабдување, а на ова место целосно партерно го уредивме и локалитетот „Крст“. Депонијата во Ново Село сега е мега-парк „Даме Груев“ со површина од 31.000 м². Најавуваме изградба и реконструкција на сервисни и станбени улици, водоводни мрежи во руралните области, фекална канализација и нова пречистителна станица преку планот за развојни програми за 2024-2026 година, со вкупен буџет од 90 милиони денари“, истакна градоначалникот Александар Стојкоски, на свечената седница по повод 20 септември.
Градоначалникот го најави и почетокот на изградбата на училишната спортска сала во ООУ „Димитар Беровски“, кој е долгогодишен проблем за реализирање на физичкото образование.
Претседателката Ленче Нелоска, која ја отвори Свечената седница на советот на општината Ѓорче Петров, се осврна на големиот број капитални проекти кои значајно ја подобрија инфраструктурата. Се заблагодари на членовите на советот за сите разумни одлуки и проектите кои беа на дневен ред на седниците.
Недела (22 септември) е затворањето на Деновите на општината Ѓорче Петров со голем семеен концерт под мотото „Музика и забава за сите“, каде ги покануваме сите граѓани пред платото кај Корзото со почеток од 11 часот, а ќе траат се до доцните вечерни часови.
Македонија
Муртезани – Бока: Интегриран Западен Балкан е од суштинско значење не само за стабилноста на регионот туку и за безбедноста и просперитетот на самата Унија
На покана на министерот за ЕУ прашања на Унгарија, министерот за европски прашања на Северна Македонија, Орхан Муртезани, денеска во Будимпешта оствари средба со својот унгарски колега, Јанош Бока. Средбата беше фокусирана на унапредување на процесот на пристапување на Северна Македонија во Европската Унија, кој е еден од клучните приоритети на Унгарија во рамките на нејзиното претседавање со Советот на Европската Унија.
Министерот Муртезани изрази благодарност за континуираната и гласна поддршка од страна на Унгарија кон земјите од Западен Балкан, особено во контекст на политиката на проширување на ЕУ.
Во фокусот на разговорите беа потребата од продолжувањето на пристапните преговори, како и неодамна усвоениот План за раст на Европската комисија за Западен Балкан и Инструментот за реформи и раст. Соговорниците констатираа дека спроведувањето на Реформската агенда е од суштинска важност за напредокот на Северна Македонија во процесот на евроинтеграција и нејзин забрзан економски раст. На состанокот се разговараше и за можностите за унапредување на билатералната соработка преку заеднички проекти во области од заемен интерес . Министерот Муртезани ја нагласи подготвеноста на Северна Македонија за продлабочување на соработката со Унгарија преку ЕУ инструментите на располагање, кои се клучни за градење на институционалните капацитети и усогласување со стандардите на ЕУ, со цел да се забрза процесот на пристапување.
Регионалната соработка исто така беше дел од разговорите, при што беше нагласена заедничката посветеност кон продлабочување на соработката со соседните земји и активно учество во регионалните иницијативи. Муртезани ја подвлече поддршката на Северна Македонија за Берлинскиот процес и имплементацијата на Акцискиот план за Заедничкиот регионален пазар, нагласувајќи дека регионалната соработка мора да биде во целосна усогласеност со европските стандарди и правила, за да се обезбеди успешна интеграција на земјите од регионот во Унијата според идентични критериуми и стабдарди.
На средбата во Будимпешта, министрите за европски прашања на Северна Македонија и Унгарија ја изразија својата посветеност за продолжување на оваа до сега исклучително продуктивна соработка. Тие се согласија дека за време на претседавањето на Унгарија со Советот на ЕУ, ќе се вложат дополнителни напори за забрзување на процесот на пристапување на Северна Македонија и зајакнување на регионалните иницијативи кои ќе придонесат за стабилноста и просперитетот на Западен Балкан.