Паркираното „порше“ во Дебар маало не било на полицаец, туку било во сопственост на Срѓан Керим, ексминистер за надворешни работи, амбасадор на Македонија во Обединетите нации и во Германија.

Неговите иницијали се најдоа и во информација од МВР, каде стои „на возачот на возилото С.К. издаден му е платен налог“.

Керим во писмен допис до одредени медиуми кажал дека нема потреба од никакви коментари и дека било постапено според позитивните прописи што важат во вакви случаи.

Видеото со неговиот автомобил наиде на бројни реакции во јавноста, откако надлежните се повлекоа со екипата од ПОЦ со намера да не го санкционира сторителот.

МВР информираше дека настанот се случил на 22 март.

„Ве информираме дека предметното возилото не е на полициски службеник“, велат од МВР откако се појавија и реакции дека споменатото возило било на полицаец.

Министерот за надворешни работи и надворешна трговија, Тимчо Муцунски, вчера и денес учествуваше и се обрати на министерскиот состанок на земјите-членки на НАТО, што се одржа во седиштето на Алијансата во Брисел.

На состанокот беше потенцирана важноста на Западен Балкан како регион од стратешко значење за НАТО и Европската Унија, со акцент на потребата од побрза интеграција на регионот во Унијата како суштински елемент за регионална и европска стабилност. Министрите ја реафирмираа важноста на стратешкото партнерство меѓу двете организации и нивната комплементарност во напорите за обезбедување траен мир и стабилност во евроатлантската област.

Од страна на министрите беше нагласено дека посилен европски столб во рамките на силна НАТО Алијанса ќе придонесе за дополнително зајакнување на трансатлантската стабилност. Во оваа насока беа поздравени новите иницијативи на ЕУ за јакнење на одбранбените капацитети, при што беше нагласена потребата од вклучување на сојузниците од НАТО кои не се членки на ЕУ.

Дополнително, беше изразена силна поддршка за напорите на САД за постигнување траен мир во Украина преку дипломатски пат и дијалог. Потврдени беа и заложбите за зголемување на буџетските издвојувања за одбраната, како и зајакнување на капацитетите и способностите за градење колективна безбедност и одбрана, со цел поефикасен одговор на заедничките закани и предизвици.

На маргините на состанокот, министерот Муцунски оствари кратки билатерални средби со генералниот секретар на НАТО, Марк Руте, како и со колегите министри од Обединетото Кралство, Холандија, Романија, Германија, Италија и Црна Гора. Разговараа за прашања поврзани со регионалната стабилност, безбедност и мир.

Драган Ковачки како шеф на Делегацијата од Македонија во Парламентарното собрание на НАТО ќе биде домаќин на Постојниот комитет на Парламентарното собрание на НАТО, соопшти ВМРО-ДПМНЕ.

Ова, како што појаснуваат од партијата е првпат Македонија да е домаќин на парламентарна активност на НАТО.

На настанот се очекува да се обрати и премиерот Христијан Мицкоски и министерот за одбрана Владо Мисајловски.