Свет
Сеул: Северна Кореја им испрати на Русите 6.700 контејнери полни со муниција
Северна Кореја испратила околу 6.700 контејнери со милиони муниција во Русија од јули за да ја поддржи војната против Украина како дел од договорот за размена на оружје, објавија јужнокорејските медиуми цитирајќи го министерот за одбрана.
На вчерашната конференција за локални медиуми јужнокорејскиот министер Шин Вон-сик рече дека контејнерите може да содржат повеќе од 3 милиони артилериски гранати во калибар од 152 мм или 500.000 гранати во калибар од 122 мм.
„Исто така, можно е да се работи за комбинација, а може да се заклучи дека се испратени најмалку неколку милиони гранати“, изјави министерот Шин, пренесе агенцијата „Јонхап“.
Стотици севернокорејски фабрики за муниција работат со речиси 30 отсто од својот капацитет поради недостиг на суровини и електрична енергија, а оние што произведуваат артилериски гранати за Русија работат со полна пареа, додаде тој, без да го наведе изворот на информацијата.
Сеул и Вашингтон ги обвинија Пјонгјанг и Москва за трговија со оружје и ја осудија Северна Кореја за снабдување на Русија со оружје за употреба против Украина. И Русија и Северна Кореја го негираа ова иако ветија дека ќе ја зајакнат воената соработка.
Американскиот Стејт департмент во петокот објави дека Северна Кореја од септември ѝ испорачала на Русија повеќе од 10.000 контејнери со муниција или слична опрема. Во замена Северна Кореја добила околу 9.000 контејнери, чија содржина е главно храна. Шин вели дека тоа помага да се стабилизираат цените таму.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Ердоган по повод Денот на Европа: Односот на некои земји кон кризата во Газа ја разниша вербата во европските вредности
Претседателот на Турција, Реџеп Таип Ердоган, објави порака по повод Денот на Европа, во која посочи дека политиката што ја спроведуваат некои европски институции и земји во контекст на кризата во Газа ја разнишаа вербата во европските вредности.
Ердоган изјави дека 9 мај, кога беше објавена декларацијата на Шуман, со која беа поставени темелите на европската интеграција, во Турција се доживува како Ден на Европа од 1999 година кога Анкара го доби статусот на кандидат за членство во Европската Унија.
„Денот на Европа, 9 Мај, не само што го означува почетокот на политичкото и економското единство на Европа туку ги означува и мирот и стабилноста, кои се плод на децениските заеднички напори“, посочи тој.
Свет
ОН: 109 Палестинци убиени, 296 ранети во Појасот Газа од понеделник до среда
Најмалку 109 Палестинци беа убиени, а 296 ранети во израелските напади врз Појасот Газа од понеделник до среда попладне, вклучително и жени и деца кои беа убиени во нападите на станбени куќи во Рафах, соопшти канцеларијата на Обединетите нации за координација на хуманитарни прашања (UNOCHA) врз основа на податоците добиени од Министерството за здравство во Газа контролирано од Хамас.
УНОЧА соопшти дека 32 лица биле убиени во шест израелски напади врз Рафах, меѓу кои 11 деца и осум жени.
Девет лица, меѓу кои четири деца и две жени, загинаа во израелски напад врз бегалски камп југоисточно од Рафах.
Девет лица загинаа во нападот во Источен Рафах, меѓу кои четири деца и три жени.
Две деца и две жени загинаа кога беше погодена нивната куќа во источниот дел на Рафа.
Пет лица, меѓу кои една жена и едно дете, загинаа во израелски напад врз куќа во Западен Рафа.
Според УНОЧА, во два одделни напади на истокот и западот на Рафах загинаа уште пет лица, пренесе Ал Џезира.
Свет
Евровизија 2024: Публиката ја исвирка израелската претставничка Еден Голан на пробата пред полуфиналето
Израелската претставничка на Евровизија изјави дека „ништо нема да ја спречи“ откога беше исвиркана за време на пробата во средата.
Еден Голан ја испеа песната „Ураган“ пред полуфиналето в четврток во Малме, Шведска.
Таа во изјавата наведе дека е „се гордее што ја претставува сопствената земја“.
Досега имаше неколку иницијативи за забрана на Израел да настапи на годинешниот натпревар поради војната во Појасот Газа, која трае од октомври.
Сепак, Европската радиодифузна унија (ЕБУ), организатор на Изборот за песна на Евровизија, одлучи дека Израел може да се натпреварува.
По пробата во средата, на социјалните мрежи се појавија голем број видеа направени од гледачи во публиката, на кои се гледа како поединци од толпата ја исвиркуваат израелската претставничка.
Израел во моментот спроведува воена операција во Газа, која ја почна како одговор на прекуграничниот напад на Хамас врз јужен Израел на 7 октомври. Тогаш беа убиени околу 1.200 луѓе, а 252 беа киднапирани.
Оттогаш повеќе од 34.840 луѓе се убиени во Појасот Газа, според Министерството за здравство на Хамас.
Израел, заедно со други неевропски земји како Азербејџан, Грузија и Австралија, може да се натпреварува како членка на ЕБУ.
Жан-Филип де Тендер, заменик-генерален директор на ЕБУ, во средата рече дека ако го исклучите израелскиот јавен сервис од натпреварот, тоа ќе биде политичка одлука, која како таква не може да ја донесат бидејќи ЕБУ е аполитична организација.
„Ги разбираме загриженоста и силните ставови што многумина ги имаат за војната на Блискиот Исток. Мислам дека никој не може да остане имун на длабокото страдање на сите што се во војна“, додаде тој.
Од Еден Голан беше побарано да ја смени оригиналната песна со наслов „Октомвриски дожд“ откога таа предизвика контроверзии.
Се сметаше дека песната алудира на убиствата и киднапирањата на Израелците од Хамас, па затоа е сменета во „Ураган“, што ЕБУ го одобри.
Од тимот на пејачката изјавиле дека 20-годишната Голан не ја напушта хотелската соба бидејќи израелската делегација добила низа закани.
Организаторите се извинија затоа што еден учесник во полуфиналето покажа пропалестински симбол во вторникот.
Ерик Саде од Шведска, кој настапи во воведниот ревијален дел од шоуто, носеше кефије околу зглобот – вид шал што луѓето го користат за да покажат дека се пропалестински настроени.
„Евровизија е ТВ-шоу во живо. Сите изведувачи се запознаени со правилата на натпреварот и жалиме што Ерик Сад реши да ја загрози неполитичката природа на настанот“, рече портпаролката на ЕБУ, организатор на настанот.
Пред натпреварот во „Малме арената“ гледачите беа предупредени да не носат палестински знамиња и други симболи.
Ирската пејачка Бамби Таг им кажа на новинарите дека добиле „наредба“ да ги отстранат сите политички пораки од облеката што планирале да ја носат во полуфиналето.
Тие замислиле делови од својата облека на сцената да бидат стилизирани во древното келтско писмо на зборот огам – за кој велат дека може да се толкува како „примирје“ и „слобода за Палестина“.
Оли Александар, кој ја претставува Велика Британија, претходно повика на „непосреден и траен“ прекин на огнот во Газа, но ги отфрли повиците за бојкот на натпреварот.