„Зад нас е период во којшто реализиравме огромен број проекти, во изминатите четири години заедно изградивме, заживеавме многу нешта. Заедно изградивме силна, посветена и обединета приказна за нашата општина Зрновци“, истакна кандидатот за градоначалник на ВМРО-ДПМНЕ, Борчо Коцев на денешниот митинг во Зрновци кој е во рамки на кампањата за локалните избори која се води под слоганот „Вистинскиот избор! Твојот човек! Твоето место! За твојата иднина!“.

Коцев посочи дека изминатиот мандат има изградено нови локални патишта, реконструирано улици, како и спортски и културни центри.

„Изградивме нови локални патишта, реконструиравме дваесетина улици, асвалтиравме и проширивме значителни раскрсници, обезбедивме нови паркинг простори на повеќе локации. Жителите добија безбедни улици, земјоделците современ пристап до земјоделски земјишта, а општина Зрновци нов модерен урбан лик. Со новите тротоари и бетонирани пешачки патеки, добивме проширување на улиците, сигурна зона за пешаците, уреден административен влез на општина Зрновци, но уште поважно добивме нов дух и енергија“, посочи Коцев.

Коцев истакна дека во новиот мандат со уште поголема одговорност, Зрновци ќе продолжи да се развива и да оди напред како и дека ќе претставува пример за развој, урбанизација и квалитетен живот.

„Во новиот мандат продолжуваме уште посилно, со уште поголема одговорност и со појасна визија, да ја направиме општина Зрновци пример за развој, урбанизација и квалитетен живот“, вели Коцев.

Тој додаде дека новата програма е сеопфатна и опфаќа инфраструктура, комунални услуги, како и земјоделие, образование, социјална заштита, па се до култура, туризам и екологија. Коцев го претстави проектот етно парк кој ќе претставува уникатен спој на македонската етно традиција со модерни содржини, создавајќи простор за сите генерации и отворајќи нови перспективи за економски развој на општината.

„Проектот претставува уникатен спој на македонската етно традиција со модерни содржини, создавајќи простор за сите генерации и отворајќи нови перспективи за економски развој на општината. Етно паркот ќе вклучува: детско игралиште со современи и безбедни реквизити, велосипедски полигон за деца, сместувачки капацитети,ресторанот со етно кујна и дегустации на локални производи, летна сцена за настани, концерти и манифестации, летна бавча со фонтана“, истакна Коцев.

На крај, Коцев порача граѓаните на 19 октомври да гласаат за својата иднина, за проекти и дела и ги повика да излезат масовно и обединето да гласаат за бројот 9, за него и за советничката листа на ВМРО-ДПМНЕ.

„Ве повикувам на денот на изборите 19 Октомври да излеземе масовно да гласаме за Твојот Човек, за Твоето Место, За Твојата Иднина, да гласаме за развој за развој и просперитет на општина Зрновци, за ВМРО-ДПМНЕ, да гласаме за Македонија“, заклучи Коцев.

Митко Костадиновски, кандидат за градонадалник за општина Виница од редовите на ВМРО-ДПМНЕ, на денешниот митинг во рамките на изборната кампања под слоганот „Вистинскиот избор! Твојот човек! Твоето место! За твојата иднина!“, истакна дека изминатите четири години општина Виница ја карактеризираа позитивни промени проследени со многу реализирани проекти и решени проблеми. Костадиновски вети дека ќе работи одговорно, транспарентно и отчетно, со нулта толеранција за корупција и единствено само во интерес на граѓаните.

Костадиновски појасни дека програмата е изработена согласно потребите и барањата на граѓаните на општина Виница, притоа ги наведе приоритетните проекти како изградба на спортска сала, рехабилитација и реконструкција на градски парк, рехабилитација на зелени површини како и проектите во областа на сообраќајот.

„Од приоритетните проекти ветуваме изградба на спортска сала во ОУ “Гоце Делчев”, кое е единственото училиште во градот кое нема спортска сала. Целосна рехабилитација и реконструкција на градскиот парк. Градскиот парк ќе добие сосема нов лик, ново, модерно и сензорно осветлување, целосна реконструкција на детското катче, многу нови содржини, рехабилитација на зелените површини и ќе биде поставен систем за наводнување за дрвјата и тревата“, рече Костадиновски и додаде:

„За подобрување на сообраќајот во градот ќе изработиме сообраќаен проект со кој ќе се преземат голем број активности, како што се обнова и измена на постоечкиот режим на сообраќај, регулирање на раскрсници, поставување на нова потребна вертикална и хоризонтална сигнализација, обележување на паркинг простор според сите законски регулативи, обележување и проектирање нови пешачки и велосипедски патеки, воведување посебен режим на сообраќај околу училиштата и градинките и слично’’.

Костадиновски потенцира дека во програмата се содржани и проекти за модерна општинска инфраструктура, а кои се однесуваат на реконструкција на градски улици, локални и регионални патишта во општина Виница.

„Во делот на патната инфраструктура ветуваме довршување со реконструкцијата на локалниот пат Блатец-Детлово во должина од 2 и пол километри и реконструкција на регионалниот пат Превалец-Виница-Смојмирово која ќе го опфати нереконструираниот дел од патниот правец Превалец-Виница, кој минува низ градот Виница. Како и реконструкција на 13 најоштетени улици во градот и изградба, асфалтирање и поплочување на улици во населените места во вредност од еден милион евра“, рече тој.

Костадиновски заклучи дека ќе се работи на донесување на нови урбанистички планови и формирање на зона за мало стопанство, а сето тоа во насока на развој на општина Виница.

„Во делот на урбанизмот ќе работиме на донесување на нови урбанистички планови за Виница и населените места што ќе значат развој на Општина Виница, а наскоро ветуваме формирање на зона за мало стопанство во м.в. Скараница- с.Блатец која ќе биде распростанета на површина од 24 хектари и во неа ќе има предвидено 29 градежни парцели за продажба“, кажа Костадиновски.

Пред полн плоштад, со поддршка од сограѓани, сопартијци и граѓани разочарани од досегашното владеење, кандидатката за Градоначалничка на Град Скопје, Каја Шукова, вечерва од Кисела Вода испрати јасна порака: „Скопје заслужува повеќе. Време е за работа, не за шминка и слики.“

Шукова, заедно со Претседателот на СДСМ, Венко Филипче, и кандидатот за градоначалник на Кисела Вода, Горан Трајковски, зборуваа за визијата што ја има за градот и општината, со акцент на конкретни и изводливи проекти.

Таа се осврна на ветувањата на актуелниот градоначалник на Кисела Вода, Орце Ѓорѓиевски, посочувајќи дека над 80% од неговата програма останала само на хартија.

„Нема паркови, нема спортски сали, нема гасификација, нема населба за млади. Има само слики, загадување и крпени улици. А сега истиот човек сака да го води Скопје? Ние велиме НЕ!“, истакна Ралева.

Шукова ја претстави својата визија како патоказ за реална промена. Таа најави 15 нови паркови за 15 месеци, инвестиции во модерен јавен превоз со еко-автобуси, сообраќајни решенија за метежот, како и системско решавање на депонијата Дрисла, која со години го труе воздухот на скопјани.

„Дрисла не е туѓ проблем, тоа е рана на нашиот град. Ќе воведеме модерно управување, 24/7 надзор, и конечно ќе ставиме крај на чадот и дивите депонии. Ова е прашање на здравје, достоинство и правда за сите жители на Кисела Вода,“ истакна таа.

Кандидатката не ги избегна ниту чувствителните теми поврзани со урбаното уредување и грижата за секојдневниот живот на граѓаните:
„Вие заслужувате улици со светло, не во мрак. Патишта без дупки. И градоначалник кој не се сокрива зад ПР, туку излегува меѓу луѓето и ги решава нивните проблеми.“

Шукова ги повика граѓаните да не останат неутрални на овие избори: „На овие избори, ќе одлучуваме дали ќе се вратиме на празни ветувања и заборавени проекти, или ќе тргнеме напред – со план, со енергија, со работа. Ајде заедно да го вратиме Скопје на граѓаните!“.