Македонија
Зибери го повика МВР да биде поефикасно: Голем број исправи се ставени на страна и граѓаните не може да си ги подигнат
До Народниот правобранител пристигнуваат преставки на граѓаните во однос на неможноста да си ги подигнат личните документи. Во изминатите два месеца стигнале 50 претставки за лични документи по разна основа – неможноста да се подигне документот, да се закаже термин или за надомест на трошок бидејќи рокот на важноста на старите не е истечен.
Народниот правобранител Насер Зибери на брифинг со новинарите се осврна на групата граѓани што веќе го поминале процесот на фотографирање, потоа и процесот на обработка и одобрување, но документите не им се издаваат, што е проблематично.
„Предводејќи се од претставките, народниот правобранител во два наврата ги посети главните пункови во Скопје, при што се потврдија наводите во претставките дека сериозен број исправи – лични карти, дозволи, па и патни исправи, се ставени на страна и органот нема увид за нивното распределување, односно издавање“, рече Зибери.
До него стигнале и претставки од граѓани што имаат итна и неодложна потреба за патување поради здравствени, научни, студиски, деловни причини. Во неколку наврати тимот на народниот правобранител во соработка со службите во МВР успешно ги реализирал барањата, но Зибери вели дека станува збор за неприродна ситуација.
„МВР треба тоа да го прави, а не по наше барање дека ‘тој и тој има итна потреба од патување’, па да ја бараме личната исправа.
Зибери порача до МВР да направи добра реорганизација и процесот на издавање готови исправи да тече нормално и да нема доцнење.
Тој говореше и за проблемот со граѓаните што наполниле или ќе наполнат 18 години, а немаат лични карти, ниту патни исправи и во прашање е доведено нивното уставно загарантирано право на учество во изборниот процес.
Некои од тие лица имаат патна исправа, но со стар образец, и во согласност со регулативата се невалидни за учество во изборниот процес.
„Владата веднаш да го разгледа проблемот, да утврди редослед на приоритет. Да ја детектира оваа група граѓани и да им даде прироритет за личните карти да им бидат обезбедени“, повика Зибери.
Во одонс на личните карти со трајна важност, народниот правобранител рече дека иако правото е загарантирано во Законот за личните карти, тоа не се спроведува.
„Ако МВР го примени членот, ќе се надмине притисокот во иднина за обновување на личните карти, граѓаните над 65 години ќе имаат трајна лична карта“, порача Зибери.
Апелира до МВР да ја примени оваа одредба.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Министерката Јаневска ќе учествува на „Глобалниот конгрес за популација, здравје и човечки развој“ во Каиро
Министерката за образование и наука проф. д-р Весна Јаневска од 12 до 15 ноември ќе учествува на „Глобален конгрес за популација, здравје и човечки развој“ што по трет пат се одржува во Каиро, под покровителство на Претседателот на Египет, Абдел Фатах Ел – Сиси.
Предвидено е учество на министерката Јаневска на повеќе панел дискусии посветени на човечкиот развој, развој и примена на иновации со фокус на вештачката интелигенција, а ќе биде и воведен говорник на сесија посветена на неформалното образование како концепт на доживотно учење.
За време на конгресот, Јаневска ќе оствари билатерална средба со египетскиот министер за високо образование и научни истражувања, Мохамед Ајман Ашур.
Македонија
Неколку улици во Скопје денеска без вода
Од ЈП Водовод и Канализација известуваат дека денеска поради промена на затворач ф-125мм на крстосницата Индира Ганди/Гвадалахара, прекинато водоснабдување ќе имаат следниве улици; Гвадалахара, Индира Ганди, Метохиска, Јован Хаџи Шишко и Гарсија Лорка, општина Шуто Оризари.
Водоснабдувањето ќе биде прекинато од 09:00 часот до завршување со работните активности.
Од ЈП Водовод и Канализација исто така информираат дека денеска поради уличен дефект од ф 1” на улицата Прашка бр.50, со прекинато водоснабдување ќе бидат дел од корисниците од улицата Прашка од 09:00 часот до завршување на санацијата на дефектот.
Македонија
Претпладне услови за магла, преку денот сончево со умерена локална облачност
Претпладне по одделни котлини ќе има услови за појава на магла. Преку денот времето ќе биде сончево со мала до умерена локална облачност. Ќе дува слаб до умерен ветер од северозападен правец. Минималната температура ќе биде во интервал од -2 до 6, а максималната ќе достигне од 13 до 19 степени.
Во Скопје, претпладне во делови од котлината со услови за појава на магла. Преку денот времето ќе биде сончево со мала до умерена облачност и со слаб северен ветер. Минималната температура ќе се спушти до 2, а максималната ќе достигне до 16 степени.
Времето во наредните денови
Следува период на стабилно и суво време со постудени утра. Во текот на денот ќе преовладува сончево со мала до умерена облачност. По одделни котлини ќе има услови за појава на магла.

