Македонија
Зибери јавно им одржа лекција на извршителите и на судиите: Член 93 од Законот за извршувањето е правниот основ за бришење на долговите
![](https://makfax.com.mk/wp-content/uploads/2024/03/ziberi-izvrshiteli.jpg)
Народниот правобранител Насер Зибери јавно им одржа лекција на извршителите и судиите, кои седум месеци одбиваат да ги применуваат измените на Законот за облигационите односи и на Законот за извршувањето и не ги бришат застарените долгови кон извршителите под разни изговори. Им покажа како во согласност со нивниот закон, Законот за извршителите, треба веднаш кога ќе примат барање од граѓаните, да ја сопрат постапката поради застарување.
Правобранителот Зибери констатирал дека од усвојувањето на измените на законите лани во јули досега извршителите не направиле ниту едно отпишување долг поради застареност иако граѓаните речиси секојдневно поднесуваат такви барања оти поминале повеќе од десет години од извршителскиот налог. Непостапувањето по законите секој извршител го оправдувал на свој начин.
„Се повикуваат на ненадлежност за постапување, се повикуваат на неможноста да постапуваат бидејќи ова прашање не е уредено и со процесен закон, односно не е уредено со самиот Закон за извршувањето, туку само во Законот за облигационите односи или се прогласуваат за ненадлежни од причина што во согласност со нашиот правен систем извршителот за застареноста не е должен да постапува по службена должност, односно да проверува“, вели правобранителот Зибери.
Понатаму, незадоволните граѓани имаат можност да се жалат од одлуката на извршителот во надлежниот суд. Но, и повеќето судови ги одбиваат приговорите. Зибери вели дека исклучок се судот во Куманово и судот во Битола, но сите други, генерално, ги одбивале приговорите од граѓаните.
И граѓаните што на суд добиле одлука да им се избрише долгот не им е избришан поради можноста за жалба во апелациските судови, кои ги укинуваат одлуките на основните судови и повторно ги ставаат во сила одлуките на извршителите за продолжување на постапката за извршување.
Правобранителот Зибери на прашањето зошто ги одбиваат барањата на граѓаните од основните и од апелациските судови добил одговор дека извршителите не се должни по службена должност да оценуваат застареност, дека извршителите не може да постапуваат бидејќи прашањето на застареноста и донесувањето на заклучокот за запирање на постапката за извршување не е уредена со Законот за извршувањето и така натаму. Ваквото оправдување Зибери смета дека е неидзржано, но му потврдило дека измените на Законот за облигационите односи во делот на застарувањето не даваат никаков ефект за граѓаните.
Кога ги слушнал и оправдувањата на Комората на извршителите за непостапувањето, Зибери вели дека самиот седнал, ги отворил законите и утврдил дека ако извршителите постапуваат по член 93 од Законот за извршувањето и ги применат измените на Законот за облигационите односи, нема апсолутно никаква пречка да ги избришат застарените долгови.
„Во членот 93 од Законот за извршувањето, во кој е уредено прашањето на запирањето на извршувањето, меѓу другото, во став 1 алинеја 1, точно е кажано дека ‘извршната исправа е правосилно укината, преиначена поништена или ставена вон сила, е основ за запирање на извршувањето, односно извршувањето се запира доколку настане една од овие елементи. Покрај другите случаи предвидени со овој закон, извршителот ќе го запре извршувањето по службена должност и ако извршната исправа е правосилно укината преиначена, поништена или ставена вон сила’. Ова го истакнувам поради фактот дека со измените на Законот за облигационите односи ваквите извршни исправи се надвор од сила бидејќи настанал апсолутниот рок на застареност. Ова е правниот основ извршителите да постапуваат во согласност со член 93 од Законот за извршувањето. Извршителот, едноставно, треба да констатира дека со заклучок се запира извршувањето“, посочи Зибери.
За надминување на ваквата непримена на законите, Зибери предлага Собранието, место немо да ја следи состојбата, да организира јавна дебата за ефектите од законите и да се бара решение оти не смее да се дозволи должниците да бидат жртви на игра меѓу институциите.
За отпис или намалување на каматата во моментот кога ќе го достигне основниот долг, Зибери вели дека се изретчиле претставките до нив, што им укажува дека извршителите во тој дел ги почитуваат законските измени, но нагласи дека е неопхдоно во обрасците од извршителите во правната поука да се додаде дека незадоволната страна има право на приговор пред надлежниот суд од три дена. Тој побарал, но Владата и Министерството за правда одбиле да се додаде рокот за приговор кај обрасците од извршителите иако стои кај сите слични обрасци од институциите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Дождот не го изгасна целосно, но го стави под контрола големиот пожар во Мариово
![](https://makfax.com.mk/wp-content/uploads/2024/09/pozar-mariovo-2.jpg)
Дождот кој заврна попладнево помогна да се стави под контрола големиот пожар во Мариово, но сепак сѐ уште не е целосно изгаснат. Гори на неколку места со слаб интензитет, информираше вечерва директорот на Центарот за управување со кризи (ЦУК), Стојанче Ангелов.
„Дождот кој заврна во прилепско помогна во гаснењето на пожарот во мариовскиот крај. За жал с уште не е изгaснат целосно, има горење со слаб интезитет на неколку места“, информираат од Центарот за управување со кризи (ЦУК).
Временските прилики им помогнаа на лицата кои веќе една недела на терен учествуваа во борбата со огнената стихија, која беше со периметар од над 100-тина километри и зафати површина од околу 15.000 хектари. Под контрола се и останатите два пожара во прилепско.
Македонија
За една недела 25 нови случи на голема кашлица
![](https://makfax.com.mk/wp-content/uploads/2024/02/IJZ-testovi-golema-kaslica.jpg)
Институтот за јавно здравје (ИЈЗ) информира дека од 30 август до 5 септември во Македонија пријавени се 25 нови случаи на голема кашлица, што е за 47,1% повеќе во споредба со претходниот седмодневен период, кога беа регистрирани 17 новозаболени.
Најголем број заболени се во Скопје -14 каде случаи се регистрирани во сите скопски општини; во Тетово – 5, Кратово – 3, Куманово – 2 и еден случај во Крива Паланка.
„Возраста на заболените се движи од 1 месец до 60 години, а најголем број на случаи се од возрасната група под една година. Во однос на вакциналниот статус на заболените, 18 лица се некомплетно вакцинирани, невакцинирани или имаат непознат вакцинален статус, 6 се комплетно вакцинирани и еден е вакциниран согласно возраста. Од новите случаи 5 заболени се хоспитализирани“, велат од Институтот за јавно здравје.
Македонија
Неисправни се двата полициски хеликоптери и двата ер-трактори, се чека дождот да го изгасне пожарот кај Мариово (ВИДЕО)
![](https://makfax.com.mk/wp-content/uploads/2024/09/pozar-mariovo-1.jpg)
Неисправни се двата полициски хеликоптери и тие не можат да учествуваат во големиот пожар во прилепскиот дел од Мариово чиј периметар се прошири на 110 километри, а е во должина од над 30 метри, се гасне од земја. Директорот на ЦУК, Стојанче Ангелов изјави дека пред неколку часа на помош на пожарникарите од Прилеп и од повеќе други градови, како и на војската и полицијата пристигна еден ер-трактор. Другите два ер-трактори кои ги има државата, за жал, се неисправни, изјави Ангелов. Директорот на ЦУК соопшти дека заврна дожд во Мариово и дополнително ќе извести дали пожарот е целосно изгаснат.
Ангелов изјави дека е тежок пожарот над викенд населбата во скопско Катланово. Тој нагласи дека пожарот создава голем чад и дека тешкотија претставува непристапниот терен. Како што рече, вчера гаснел еден армиски хеликоптер, а денеска пожарникарите од скопската бригада.
Во продолжение е видео-изјавата од Ангелов и за другите пожари во земјава.