Регион
Отворена новата база на НАТО во Албанија
Претседателот на Албанија, Бајрам Бегај, денеска, официјално ја прогласи за отворена воздушната база на НАТО во Кучово.
Според неговите зборови, оваа база „ќе му служи на Северноатлантскиот сојуз за оперативни и тактички цели“, пишува „Албанијан пост“.
Бегај оцени дека отворањето на воздухопловната база во Кучово е голема привилегија за Албанија и една од најголемите инвестиции на НАТО во таа земја.
„Базата на НАТО го симболизира мостот што ги поврзува минатото и сегашноста. Таа е и симбол на безбедноста, а Албанија не е случајно избрана. Тоа е неопходна и добредојдена инвестиција бидејќи руската агресија врз Украина и ситуацијата на Блискиот Истокот се сегашните предизвици“, рече Бегај и нагласи дека отворањето на НАТО-базата во Кучово е доказ за довербата на сојузниците, кои во Албанија гледаат достоен и посветен партнер.
Албанскиот премиер Еди Рама изрази голема благодарност до сите фактори што помогнаа да се отвори оваа база, од НАТО до локалното население, за кое, како што рече, отсега ќе има повеќе работни места.
Албанија претходно вети дека ќе инвестира во оваа база со цел да ја модернизира и да може да служи како база на албанското воздухопловство.
Покрај воената намена, оваа база ќе им даде помош на соседните земји во борбата против природните катастрофи или други несреќи, затоа, според албанските власти, базата во Кучово е важна не само за Албанија, туку и за целиот регион.
Реконструкцијата на базата во Кучово почна во јануари 2022 година, а оттогаш се работи на оградување и обезбедување, како и на заштита на околината, каде што се наоѓа овој воен објект.
Реконструкцијата на воздухопловната база е дел од билатералните договори што ги постигнаа албанскиот премиер Еди Рама и американскиот државен секретар, Ентони Бликен.
Американскиот државен секретар потврди дека оваа база ќе има помош од сите земји партнери во НАТО за да се опреми со најнова технологија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Поставен рекорд во центарот на Белград: 1.000 гитаристи свиреа истовремено
Концертот на „Guitar Art“ денеска собра 1.000 гитаристи на плоштад во Белград, кои поставија национален рекорд во присуство на инструменталисти кои свират на гитара и слични инструменти, пренесе српска „Политика“.
Концертот „1.000 гитари“ ги привлече пред се во центарот на Белград најмладите гитаристи и нивните учители, но заедно свиреа цели семејства, составени од три генерации: дедо, татко и син…
Имаше мајки и ќерки кои „замавнаа“ со белградскиот блуз квартет и специјалните гости на концертот, меѓу кои Дејан Цукиќ, Ју групата, Кики Лесендриќ и Пилотите, Срѓан Гојковиќ Гиле, Бојана Стаменов, Никола Чутурило – Чутура. „Ова е конечно моментот кога барем на еден час ги заменуваме силиконите за витамини на ’Трг Републике’. Ова е сеќавање на мојата младост и почетоци во рокенролот. Среќен сум“, изјави Никола Чутурило Чутура за Танјуг.
За неколку минути неколку илјади љубопитни луѓе се собраа на плоштадот да уживаат во првокласен музички настан.
Регион
Загинаа две лица, а пет се водат како исчезнати по судар на чамец и крузер во Дунав кај Будимпешта
Две лица го загубија животот доцна синоќа, а пет се водат за исчезнати во судар на мал моторен чамец и крузер на реката Дунав северно од Будимпешта, соопшти денеска унгарската полиција.
Телата на возрасен маж и жена се пронајдени северно од главниот град, а властите се уште трагаат по пет исчезнати лица.
Сома Чечи, портпарол на полицијата во Будимпешта, на прес-конференција рече дека, според досегашните сознанија, во чамецот имало вкупно осум возрасни лица и потврди дека две лица загинале, а пет се водат како исчезнати. Тројца мажи и две жени моментално се бараат со глисери и дронови, јавуваат унгарските медиуми.
Полицијата соопшти и дека во градот Комаром бил запрен поголем брод, а од увидот било откриено дека му е оштетен страничниот дел. Се врши увид и во тек е истрага за опасноста по водениот пат и смртта на неколку лица.
Регион
По обидот за атентат словачкиот премиер Фицо е надвор од животна опасност
Словачкиот премиер Роберт Фицо е надвор од животна опасност по обидот за атентат, изјави денеска министерот за одбрана и вицепремиер Роберт Калинак за словачката новинска агенција ТАСР.
Состојбата на Фицо се подобрува, а лекарската комисија утре треба да одлучи дали тој ќе биде префрлен. Фицо моментално се опоравува во универзитетската болница во Банска Бистрица.
Фицо беше тешко повреден на 15 мај, по седницата на Владата во градот Хандлова, кога 71-годишниот писател Јурај Цинтула, од непосредна близина неколку пати пукаше со пиштол во него. Специјалниот кривичен суд во словачкиот град Пезинок, со силно полициско обезбедување вчера му одреди притвор на Цинтула.