Свет
Супер вторник во Америка, најголемиот ден од кампањата за претседателските избори
Денеска во САД е „Супер вторник“, најголемиот ден од овогодинешната кампања за претседателските номинации на демократите и републиканците, бидејќи натпреварот се одржува во 16 американски сојузни држави.
Внатрешните партиски избори ќе се одржат од Алјаска и Калифорнија до Вирџинија и Вермонт и тие се клучен момент за актуелниот американски претседател Џозеф Бајден и неговиот претходник Доналд Трамп, кои се главни кандидати за претседателските номинации на Демократската и Републиканската партија, јавува Гласот на Америка.
Повеќе од една третина од вкупниот број делегати се освоени на изборите на „супер вторник“, а републиканскиот кандидат може да освои 854 од вкупно 2.429 делегати, додека демократите можат да освојат 1.420, што е исто така повеќе од една третина од делегатите.
Сепак, ниту републиканците ниту демократите не можат да ја добијат номинацијата по „супер вторник“. Трамп, кој е фаворит за номинацијата на републиканците, сега има 122 делегати и му требаат уште 1.093 за да ја достигне потребната бројка од 1.215, пренесува медиумот.
Бајден, фаворитот на демократите, сега има 206 делегати и има потреба од 1.986. Се предвидува дека Трамп би можел да ја обезбеди номинацијата до 12 март, а Бајден до 19 март.
Според написите, Републиканците можат побрзо да го соберат потребниот број на делегати бидејќи го имаат принципот дека тој што ќе освои најмногу гласови во една држава ги добива сите делегати, додека демократите ги распределуваат делегатите по пропорционален систем. Поранешниот претседател Трамп доминира во трката на републиканците, а неговиот последен голем ривал, поранешната амбасадорка во ОН, Ники Хејли, „се мачи“ да остане во чекор, јавува Гласот на Америка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Валери Залужни назначен за амбасадор на Украина во Велика Британија
Поранешниот врховен командант на украинската армија Валериј Залужни денеска е назначен за украински амбасадор во Велика Британија.
Указот за назначување на Залужни беше потпишан од украинскиот претседател Зеленски, кој претходно во март објави дека ја прифатил неговата кандидатура за функцијата, пренесува UNIAN.
Зеленски на 8 февруари го разреши Залужни од позицијата врховен командант на вооружените сили, наведувајќи го неуспехот на летната офанзива и „стагнацијата“ на ситуацијата на фронтот.
Свет
Поради строгите мерки за штедење во Аргентина, индустриското производство нагло падна
Индустриското производство во Аргентина драстично падна во март, покажаа податоците на заводот за статистика INDEC, што ги одразува последиците од строгите мерки за штедење што ги спроведе новата влада на претседателот Хавиер Мајли.
Во март производството паднало за 21,2 отсто во однос на истиот период лани.
Производството на мебел потона за повеќе од 40 отсто, на електроника и алати за речиси 43 отсто, а на метални производи и машини за речиси 33 отсто. Производството на неметални минерали и основни метали е намалено за околу 35 отсто, а на автомобили и транспортни средства за 25 отсто, покажуваат податоците на INDEC.
На месечно ниво, производството се намали за 6,3 отсто, најсилно од мај во пандемијата 2020 година, кога потона за 26,2 отсто. Во првите три месеци од годинава падна за речиси 15 отсто на годишно ниво, објави заводот за статистика.
Свет
Две украински хидроцентрали онеспособени во руските напади
Две украински хидроцентрали се онеспособени кога руските вооружени сили ги нападнале, соопшти украинската компанија „Укрхидроенерго“.
„На 8 мај беше направена значителна штета на хидроцентралите. Две хидроцентрали беа онеспособени“, се вели во соопштението на каналот „Телеграм“ на компанијата.
Се додава дека хидроенергетското производство на Украина „претрпело огромни штети“ и дека поправката на уништената опрема ќе бара „голем напор и значителни финансиски средства“, пренесува украинската агенција „Унијан“.