Свет
На вселенската станица пристигнаа четворица астронаути на НАСА, меѓу кои и еден Русин
Тројца американски астронаути и руски космонаут денеска пристигнаа на Меѓународната вселенска станица (МВС).
Двостепена ракета Falcon 9, која носи автономно управувана капсула Crew Dragon, наречена Endeavor, беше лансирана од вселенскиот центар „Кенеди“ на НАСА во Кејп Канаверал на брегот на Атлантикот на Флорида. Четворицата новопристигнати астронаути беа пречекани на нивната дестинација од сегашниот седумчлен екипаж на станицата, објави американската вселенска агенција НАСА.
Тие требаше да пристигнат на ISS во саботата, но полетувањето беше одложено поради силниот ветер.
За време на нивниот шестмесечен престој на ISS, тие планираат да спроведат повеќе медицински експерименти. Екипажот ќе остане на вселенската станица до крајот на август и ќе изврши околу 250 експерименти во микрогравитациската средина на орбиталната платформа.
Ветеранот на НАСА, Мајкл Барат, е на ISS третпат, а Метју Доминик, пилот на американската морнарица, Жанет Епс, воздухопловна инженерка и поранешен технички разузнавач на ЦИА, и космонаутот Александар Гребјонкин, поранешен инженер за воени авиони, се на ISS првпат.
Меѓународната вселенска станица е едно од ретките места каде што САД и Русија сè уште соработуваат и покрај руската агресија врз Украина. За станицата се грижат вселенските агенции на САД, Русија, Канада, Европа и на Јапонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Нетанјаху: Израелските тимови ќе ги продолжат разговорите за прекин на огнот во Либан
Израелските тимови одржаа состаноци за да разговараат за предлозите на САД за прекин на огнот во Либан и ќе продолжат со разговорите во наредните денови, изјави денеска израелскиот премиер Бенјамин Нетанјаху, додавајќи дека ги цени американските напори.
„Нашите тимови се состанаа вчера, четврток, за да разговараат за иницијативата на САД и како можеме да ја постигнеме нашата заедничка цел – безбедно враќање на нашиот народ во нивните домови. Ќе продолжиме со нашите дискусии во наредните денови“, рече Нетанјаху.
Соопштението доаѓа откако израелскиот министер за надворешни работи Израел Кац вчера ги отфрли американските и француските предлози за 21-дневен прекин на огнот, велејќи дека нема да има прекин на огнот на северот каде што израелските бомбардери ги напаѓаат позициите на проиранската шиитска милиција Хезболах.
Вчера, откако Нетанјаху го напушти Њујорк каде што присуствуваше на седницата на Генералното собрание на ОН, неговиот кабинет објави соопштение дека премиерот им наредил на израелските војници да продолжат со сета своја сила да се борат против Хезболах во Либан.
Во изјавата на Нетанјаху не се споменува изјавата на Кац или други израелски политичари кои исто така го отфрлија прекинот на огнот, велејќи дека имало „многу погрешно известување за иницијативата за прекин на огнот предводена од САД“.
„Израел ги споделува целите на американската иницијатива да обезбеди безбедно враќање на луѓето во нивните домови долж нашата северна граница“, се вели во изјавата на израелскиот премиер. „Израел ги цени американските напори во ова прашање бидејќи улогата на САД е суштинска во промовирањето на стабилноста и безбедноста во регионот“, се додава во соопштението.
Свет
(Видео) 40 лица се спасени од поплавените области во Флорида
Околу 40 луѓе се спасени откако ураганот Хелен предизвика поплави во округот Паско, Флорида.
Members of the Pasco Sheriff’s Office, including Sheriff Chris Nocco, and our partners at Pasco County Fire Rescue continue water rescue efforts along the US19 corridor. pic.twitter.com/d7qPYzXcDJ
— Pasco Sheriff (@PascoSheriff) September 27, 2024
Луѓето беа извлекувани од поплавените патишта.
Approximately 40 people have been removed from rising water along the US19 corridor, with the assistance of our partners at Pasco County Fire Rescue. Rescue boats continue to be loaded into the water to continue answering rescue related calls for service. pic.twitter.com/VdzO85peKu
— Pasco Sheriff (@PascoSheriff) September 27, 2024
„Спасувачките чамци се спуштаа на поплавените патишта за да се извлечат сите на кои им е потребна помош“, се вели во соопштението на шерифот.
Свет
Човекот осомничен дека продавал пејџери на Хезболах отишол во САД и оттогаш му се губи трагата
Норвешката полиција издаде меѓународна потерница за маж поврзан со продажба на пејџери на милитантната група Хезболах.
39-годишниот Ринсон Хозе, основачот на Норта Глобал, бугарска компанија наводно вклучена во синџирот на снабдување со пејџери, исчезна за време на службено патување во САД минатата недела.
„Вчера добивме дојава дека исчезнало лице поврзано со пејџерите. Отворен е случај за исчезнато лице и по него распишавме меѓународна потерница“, соопшти полицијата во Осло.
Хозе одби да зборува за пејџерите кога Ројтерс го контактираше на 18 септември и ја спушти слушалката откако беше прашан за работењето на компанијата во Бугарија. После тоа повеќе не одговараше на повиците и пораките на новинарите. Покрај тоа што има своја компанија, Хозе работи и во одделот за продажба на норвешката медиумска компанија DN Media Group.
Работодавецот потврди дека Хозе патувал на конференција во Бостон на 17 септември, но изгубил контакт со него следниот ден. Според бугарскиот корпоративен регистар, Хозе во 2022 година ја основал Норта Глобал, компанија со седиште во главниот град Софија.
Бугарските власти ја испитуваа улогата на компанијата во снабдувањето на пејџерите, но не најдоа докази дека тие биле произведени или извезени од Бугарија.