Свет
Австралија и земјите од Југоисточна Азија повикаа на прекин на огнот во Газа

Австралија и земјите од Југоисточна Азија денеска го завршија тридневниот самит, на кој повикаа на воздржаност во спорното Јужно Кинеско Море и траен прекин на огнот во Појасот Газа.
Австралија беше домаќин на самитот со Асоцијацијата на нациите од Југоисточна Азија (АСЕАН) во Мелбурн за да ја одбележи 50-годишнината од своите врски со блокот, иако остануваат разликите меѓу 10-те членки во врска со плановите на Кина да го прошири своето дипломатско и воено присуство во регионот.
Во заедничкото соопштение на Австралија и АСЕАН се повика на поредок заснован на правила во Индо-Пацификот бидејќи Пекинг се обидува да го зголеми своето присуство во Јужното Кинеско Море.
„Ги охрабруваме сите земји да избегнуваат какви било унилатерални дејства, кои ги загрозуваат мирот, безбедноста и стабилноста во регионот“, се нагласува во соопштението.
Изјавата доаѓа откако Филипините вчера го повикаа заменик-шефот на мисијата на Кина во Манила во знак на протест, како што ја нарече агресивна акција на кинеските поморски сили против мисијата за снабдување на филипинските трупи стационирана во близина на гребен во Јужното Кинеско Море.
Пекинг има право на речиси целото Јужно Кинеско Море, што е главен извор на тензии со Филипините. Земјите се во територијален спор и покрај пресудата на Постојаниот арбитражен суд од 2016 година, која утврди дека барањата на Кина немаат правна основа. Пекинг ја отфрла пресудата.
Во заедничкото соопштение се повторува загриженоста за страшната хуманитарна ситуација во Газа и се бара ослободување на заложниците што се држат во конфликтот меѓу Израел и Хамас.
„Ги осудуваме нападите врз сите цивили и цивилната инфраструктура, што дополнително ја влошува хуманитарната криза во Газа, со ограничен пристап до храна, вода и други основни потреби“, се вели во соопштението. Повикуваме на итен и траен хуманитарен прекин на огнот“, се вели во соопштението.
АСЕАН ги вклучува Малезија, Индонезија и Брунеи со мнозинско муслиманско население, а Австралија му даде силна поддршка на Израел, иако претходно повика на прекин на огнот и беше критичен за бројот на жртви.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Колона долга околу 700 километри забележана на автопат во Франција

Колона долга речиси 700 километри е забележана денеска на автопат во Франција, додека вкупната должина на сите колони на патиштата во земјата изнесуваше 1.051,6 километри во време на зголемен сообраќаен интензитет поради летните одмори и смената на туристи, што колоквијално се нарекува „Црна сабота“.
Како што извести BFM TV, сообраќајот на патиштата во Франција дополнително бил забавен поради две сообраќајни несреќи на автопатот кон Медитеранот и Атлантскиот Океан.
Според податоците на Bizon Futé, француската агенција за следење на состојбата на патиштата, до 7 часот утрово колоните биле подолги од 200 километри, а до 10 часот веќе надминале 570 километри.
Како што беше соопштено, гужвите се во согласност со прогнозите на агенцијата, која предупреди на „исклучително тешки сообраќајни услови“ за оваа сабота, а врвот на метежот се очекува околу пладне.
Сообраќајот во правец кон Алпите исто така е интензивен и загушен, со задржувања од час и 45 минути во тунелот Мон Блан во правец кон Италија
Свет
Газа: 169 луѓе починаа од глад, над 320.000 деца се соочуваат со акутна неухранетост

Министерството за здравство во Газа денес објави дека уште седум Палестинци, меѓу кои и едно дете, починале од глад и неухранетост.
Новите смртни случаи, регистрирани во последните 24 часа, го зголемија вкупниот број на смртни случаи поврзани со глад од октомври 2023 година на 169, вклучувајќи 93 деца, се вели во соопштението.
Министерството предупреди дека хуманитарната криза во Газа се влошува и повторно апелираше до меѓународната заедница и хуманитарните организации веднаш да интервенираат за да се стави крај на страдањето и да се достави итна помош, пренесува Анадолија.
Заменик-извршниот директор на УНИЦЕФ, Тед Чајбан, денесka изјави дека Газа се соочува со сериозен ризик од глад и дека она што може да се види на терен е „шокантно“.
„Повеќе од 320.000 мали деца се изложени на ризик од акутна неухранетост. Во стабилизацискиот центар во градот Газа , сретнав акутно неухранети бебиња чии тела беа само кожа и коски. Нивните мајки седеа во близина, очајни и исцрпени. Една мајка ми кажа дека нејзиното тело повеќе не произведува млеко затоа што самата е премногу гладна. УНИЦЕФ прави сè што може за да ја реши ситуацијата – поддржува доење, обезбедува формула за бебиња и лекува деца со тешка акутна неухранетост. Но, потребите се огромни по 22 месеци војна и два месеци блокада, која сега е олеснета, но сè уште има влијание, а помошта сè уште не пристигнува доволно брзо или во потребниот обем“ рече Чајбан.
Тој нагласи и дека повеќе од 18.000 деца се убиени во Газа од почетокот на војната, што е во просек по 28 деца дневно.
Свет
Нов земјотрес на Камчатка, регистриран афтершок со јачина од 6,1 степен според Рихтеровата скала

Земјотрес со интензитет од 6,1 степен според Рихтеровата скала е регистриран денес на Камчатка, на растојание од 196 километри од регионалниот главен град Петропавловск-Камчатски, соопшти огранокот на Геофизичката служба на Руската академија на науките (РАН) на Камчатка.
Како што е наведено, земјотресот е регистриран на длабочина од 59,8 километри, пренесува РИА Новости.
Директорката на подружницата на оваа служба во Камчатка, Данила Чебров, претходно за агенцијата РИА Новости изјави дека се очекуваат силни, но не и разорни потреси по силниот земјотрес што го погоди регионот на 30 јули.
Според регионалните служби за вонредни состојби, во последните 24 часа се регистрирани околу 146 последователни потреси со јачина помеѓу 3,2 и 6,2 степени, од кои многу се почувствувани, со јачина од 2 до 5 степени според Меркалиевата скала.
Во среда, на 30 јули, Камчатка беше погодена од најсилниот земјотрес од 1952 година, со јачина од 8,8 степени.
По земјотресот, во делови од Русија и низ Тихиот Океан беше прогласена закана од цунами, а населението беше повикано да се држи подалеку од брегот во ризичните области.
Вечерта, предупредувањето беше укинато.