Регион
„Политико“: Босна и Херцеговина ќе добие препорака за почеток на преговорите со ЕУ

Босна и Херцеговина ќе добие зелено светло за почеток на преговорите за влез во ЕУ, а Европската комисија треба да ја објави таа вест во вторник, со што ќе се отвори патот земјата конечно да стане членка на Унијата, пишува Политико.
ЕУ ѝ додели на Босна и Херцеговина кандидатски статус во декември 2022 година, пренесува „Н1“.
Европската комисија сега ќе ѝ даде на таа земја позитивна препорака за почеток на официјалните пристапни преговори, изјавија за Политико двајца претставници на ЕУ и еден дипломат, а пренесува „Н1“.
Украина и Молдавија, исто така, треба да направат чекор понатаму во процесот на проширување.
Европската комисија во вторник ќе ги предложи таканаречените преговарачки рамки кои ги одредуваат насоките и основните принципи на нивните пристапни преговори. Потоа останува на земјите од ЕУ да разговараат за овие текстови. Дипломати и претставници на ЕУ предупредуваат дека договорот меѓу 27-те европски земји, кој е неопходен за официјален почеток на преговорите, најверојатно нема да биде постигнат пред европските избори во јуни.
За некои земји од ЕУ, вклучително и Австрија, од витално значење беше напредокот во Украина и Молдавија да оди рака под рака со напредокот во идното пристапување на Босна и Херцеговина.
Следниот чекор сега е лидерите на ЕУ да разговараат за препораката за Босна и Херцеговина на нивниот состанок во Брисел следната недела, пренесува Политико.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Србија ќе се приклучи на развојот на руската вакцина против рак

Претседателот на Србија, Александар Вучиќ, изјави дека разговарал со Александар Кецман, директор на Институтот „Гамалеја“ во Москва, кој го информирал дека во Русија се развива вакцина против рак.
„Ми објаснија одредени работи. Имаме голем процент на заболени од рак. Оваа вакцина е поинаква, бидејќи им помага на веќе болните луѓе — не е превентивна. Може да биде успешна до 85 проценти,“ рече Вучиќ.
Тој додаде дека Србија ќе се вклучи во проектот веднаш штом Русија го дозволи тоа:
„Ќе подготвиме целосна инфраструктура за да бидеме спремни за два до три месеци. Не можеме уште да ја произведуваме, но ќе направиме сè за да бидеме подготвени.“
Вучиќ нагласи дека во Србија има повеќе случаи на малигни заболувања отколку во другите земји, што, според него, е поврзано со последиците од бомбардирањето во 1999 година.
Регион
Возачот на автобусот приведен по тешката несреќа кај Сремска Митровица: две жртви и 80 повредени

Возачот на автобусот кој денеска се преврте кај Сремска Митровица е приведен и му е одредено задржување до 48 часа, соопшти српското Министерство за внатрешни работи (МУП), пренесе „Н1“.
Во несреќата загинаа две лица, а околу 80 се повредени. 35 повредени лица се згрижени во Општата болница во Сремска Митровица, една личност е пренесена во Клиничкиот центар на Војводина, а уште една е во операциона сала. За останатите се врши дијагностика.
Автобусот на компанијата „Сирмиум бус“, кој превезувал работници од фирмата „Хелткеар“, излета од патот и се преврте на кров од засега непознати причини. Несреќата се случи околу 14:45 часот.
Полицијата го затвори патот и не дозволува пристап до местото на несреќата, а на лице место излезен е и јавен обвинител за да ја утврди причината за трагедијата.
Регион
Автобус со работници се преврте кај Сремска Митровица, има жртви

Тешка сообраќајна несреќа се случи попладнево околу 14:30 часот на излезот од Сремска Митровица, кај поранешната фабрика „Матроз“, кога автобус на „Сирмиумбус“ што превезувал работници од фабрика се превртел на кров, јави Нова.рс.
Според првичните информации, најмалку две лица загинале, а повеќемина се повредени и се пренесени во Општата болница во Сремска Митровица. На местото на несреќата се полицијата и противпожарните служби, а сообраќајот е блокиран поради увидот.
Фотографии од местото на настанот покажуваат долги колони возила на патот Сремска Митровица – Јарак. Истрагата за причините е во тек.