Скопје
(Видео) Димитриевиќ: Стефковски продолжува немилосрдно да троши народни пари
„Продолжува немилосрдното трошење народни пари за партиските вработувања на ДПМНЕ. Институциите што се под палката на градоначалникот Стефковски се преплавени со партиски кадри. Над 23 милиони денари се потрошени за вработувања за неполни три години во ЈКП ‘Гази Баба 2007’. Сето ова е поткрепено со фактографски докази“, рече Александар (Саша) Димитриевиќ, координатор на советничката група во Советот на Општина Гази Баба од СДСМ.
„23 милиони денари и тоа како ќе беа добредојдени за осовременување на механизацијата и замената на старите и дотрајани униформи на вработените.
Не е розова состојбата ниту во детската градинка „25 Мај“. И таму се потрошени повеќе од 12 милиони денари, а се подготвува уште едно ненаменско трошење за згрижување на членството на ВМРО-ДПМНЕ. Замислете колку ќе им беше полесно на родителите кога немаше да имаат обврска да трошат екстра пари за нормално функционирање на градинките и доколку овие 200.000 евра беа директно дисперзирани во подобрување на условите за најмладите.
Уште една голема лага на градоначалникот Бобан Стефковски, наместо намалување, имаме сериозно зголемување на сумата за вработувања.
Партијата и Бобан Стефковски, актуелен претседател на општинскиот комитет на ДПМНЕ Гази Баба, се од иста матрица, која парите на граѓаните, наместо на проекти, ги троши за свој лични интереси и партиски вработување“, изјави Димитриевиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Без струја Карпош, Бутел и Сопиште
Регионалниот центар за управување со кризи на Град Скопје, по добиеното известување од ЕВН, ги известува граѓаните дека, поради технички зафати во електро дистрибутивната мрежа, денеска без електрична енергија ќе останат делови од општините Бутел, Карпош и Сопиште.
– Од 09:00 до 11:00 часот, дел од корисниците на улица Александар Урдаревски, околу ресторан Бон Бон во општина Бутел;
– Од 12:00 до 14:00 часот, корисниците на улицата Борка Талевски, бр.60 во општина Карпош;
– Од 09:00 до 12:00 часот, корисниците од село Чифлик во општина Сопиште.
Скопје
Поништена е одлуката за изградба на 12 габаритни згради во Црниче, рече Ѓорѓиевски
Стопирана е иницијативата за измена на ДУП реон Ј, градска четврт Ј20, блок Ј20.03, со која во времето на претходниот градоначалник на општина Кисела Вода, се предвидуваше изградба на 12 згради, извести градоначалникот Орце Ѓорѓиевски.
-Ја стопиравме иницијативата за измена на ДУП реон Ј, градска четврт Ј20, блок Ј20.03, со која во времето на мојот претходник, се предвидуваше изградба на 12 згради! Како што ветив и ги исполнив своите ветувања за Расадник, како што ја донесовме и целосно ја спроведуваме одлуката за забрана за изградба на станбени објекти со повеќе од 4 станбени единици во Пржино и Црниче, од денес е во сила и оваа одлука и наместо гигантски зданија, на посочената локација во Црниче, на сопственикот ќе му биде дозволена само реконструкција на објектот, старата печатница и тоа во постоечкиот габарит, кажа градоначалникот Орце Ѓорѓиевски.
„Воедно, сакам да инфомирам дека скалите кои со измената на ДУП-от требаше да бидат отстранети, ќе останат и ќе бидат надополнети со пропратна урбана опрема, онака како што бараа нашите жители.
Одговорно тврдам дека нови одобренија за изградба на згради во Пржино и Црниче нема да има, како што е зацртано во мојата одлука, која што е поддржана и од страна на Советот на општината, а и од сите жители од овој дел на градот.
Во Пржино и Црниче ќе можат да се градат само куќи, кои што можат да имаат максимум 4 станбени единици!
Времето во кое што под маската на А1 – куќи се градеа габаритни згради е завршено!
Ова е ново време во кое живее општина Кисела Вода.
Нема да дозволам поради лични интереси на поединци мојот народ во Црниче и Пржино да се гуши и тие прекрасни населби под срцето на Скопје, Водно, да се бетонизираат.
Испишуваме нова приказна, заедно и според вашите потреби“, изјави градоначалникот Орце Ѓорѓиевски.
Скопје
Презентиран прирачникот за развој на вештини за вработување на младите карпошани
Претставници од невладината организација ТАКТ денеска во просториите на гимназијата „Никола Карев“ во Карпош 3, одржаа низа работилници со ученици од различни возрасни групи, при што го презентираа и прирачникот кој е креиран за потребите на проектот „Млади и вработување – Развој на вештини за вработување на младите во општина Карпош“.
Станува збор за проект којшто го реализира невладината ТАКТ со поддршка на Општина Карпош, а истиот има за цел да ги едуцира младите карпошани да развијат стручни вештини, кои потоа ќе им помогнат при процесот на вработување. Вредно за напоменување е дека овој проект е особено фокусиран кон младите карпошани кои се припадници на одредени маргинализирани групи, а исто така е насочен кон развојот на вештини на младите девојки кои живеат во Карпош. Наскоро, прирачникот ќе биде достапен на официјалната веб страница на невладината ТАКТ, како и на нивните профили на социјалните мрежи.