Свет
Израел обвинет за убиство на најмалку 29 Палестинци: „Извештаите се лажни“
Војската на Израел убила најмалку 29 Палестинци додека чекале хуманитарна помош во два одвоени напада во Појасот Газа во четвртокот, соопшти Министерството за здравство на Газа.
Во првиот инцидент палестинските здравствени власти во Појасот под контрола на Хамас изјавија дека осум лица загинале во воздушен напад врз центар за дистрибуција на храна во кампот Ал-Нусеират во централниот дел на Појасот Газа.
Во вториот, подоцнежен напад, израелските војници отворија оган врз толпа луѓе што чекаа камиони со помош, на кружен тек, во северниот дел на Појасот Газа, при што загинаа 21 лице, а беа повредени повеќе од 150, соопшти Министерството за здравство на Газа.
Во соопштението израелската војска ги негира нападите врз центрите за помош велејќи дека извештаите се лажни.
„Со оглед дека ИДФ го проценува инцидентот со темелноста што ја заслужува, ги повикуваме и медиумите да го сторат тоа и да се потпираат само на веродостојни информации“, соопшти армијата.
Поради војната во Газа, повеќето од 2,3 милиона жители на енклавата се раселени. За време на дистрибуцијата на хуманитарна помош имаше хаотични сцени и смртоносни инциденти додека очајно гладните луѓе се борат да добијат храна.
Палестинските здравствени власти на 29 февруари соопштија дека израелските сили убиле повеќе од 100 Палестинци додека чекале камиони со храна во близина на градот Газа. Израел соопшти дека мажите загинале среде толпата околу камионите со хуманитарна помош велејќи дека жртвите биле прегазени.
Во бегалскиот камп Ал-Нусеират во централниот дел на Појасот Газа палестинските здравствени власти соопштија дека осум лица биле убиени во израелски воздушен напад што погоди центар за дистрибуција на храна во четвртокот.
Во Деир ал-Балах, исто така во центарот на Газа, израелски проектил погоди куќа, при што загинаа девет лица, соопштија палестинските лекари. Жителите рекоа дека израелските воздушни и копнени бомбардирања продолжија во текот на ноќта врз областите во енклавата, вклучително и Рафа на југ, каде што се засолниле повеќе од милион раселени луѓе.
Војната беше предизвикана од нападот на Хамас врз градовите во јужен Израел на 7 октомври, во кој според израелските податоци загинаа 1.200 луѓе и зедоа 253 заложници.
Оттогаш израелските воени воздушни, морски и копнени напади врз Газа, според палестинските здравствени власти, убиле повеќе од 31.000 луѓе, а раниле повеќе од 71.500.
Напорите за постигнување прекин на огнот меѓу Израел и исламистичкиот Хамас досега пропаднаа. Додека Израел рече дека бара договор што ќе обезбеди ослободување на заложниците во Газа во замена за ослободување на Палестинците што ги држеше Израел, Хамас инсистира дека договорот мора да стави крај на војната.
Доцна во четвртокот Хамас соопшти дека на посредниците им претставил сеопфатна визија за договор за примирје заснован на ставање крај на израелската агресија врз Палестинците во Појасот Газа, обезбедување помош, враќање на раселените жители на Газа во нивните домови и повлекување на израелската армија.
Кабинетот на израелскиот премиер Бенјамин Нетанјаху соопшти дека новиот став на Хамас се заснова на нереални барања.
Како што војната влегува во шестиот месец, ОН предупредија дека најмалку 576.000 луѓе во Газа – четвртина од населението – се на работ на глад, а глобалниот притисок се зголемува врз Израел за да се овозможи поголем пристап до енклавата.
Израел негира дека ја попречува испораката на помош за Газа. Тој ги обвинува одложувањата за неуспесите на хуманитарните агенции и го обвинува Хамас за пренасочување на помошта. Хамас го негира ова и вели дека Израел го користи гладот како оружје во својата воена офанзива.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вучиќ изрази сочувство за смртта на Раиси
Претседателот на Србија, Александар Вучиќ, изрази сочувство до народот и владата на Иран во врска со смртта на претседателот на таа земја, Ебрахим Раиси.
„Изразувам сочувство до народот и владата на Исламската Република Иран за смртта на претседателот Ебрахим Раиси, искрен и доследен пријател на Србија“, напиша Вучиќ на својот профил на мрежата Х.
Хеликоптерот со Раиси и министерот за надворешни работи Хосеин Амир-Абдолахиан се урна во неделата во северозападниот дел на Иран, во областа Верзеган, а покрај двајцата загинаа уште шест лица.
Свет
Хелокоптерот во кој загина иранскиот претседател не емитувал никаков сигнал
Хеликоптерот што се урна додека ги превезуваше претседателот и министерот за надворешни работи на Иран немал вкучено сигнален систем или не поседувал, изјави турскиот министер за транспорт Абдулкадир Уралоглу.
Уралоглу им рече на новинарите дека провериле дали има сигнали од хеликоптерот откако слушнале дека се урнал.
„Но, за жал, мислиме дека најверојатно сигналниот систем бил исклучен или хеликоптерот го немал тој сигнален систем бидејќи ние сигурно ќе ги видиме тие сигнали, но немаше“, рече тој.
Регион
18-годишник е уапсен бидејќи го запалил хрватското знаме и го споделил на социјалните мрежи
Осумнаесетгодишник е уапсен во Славонија бидејќи на 1 мај го запалил хрватското знаме во шумата кај Трпија.
Како што дознала полицијата, тој тоа го снимил и го објавил на социјалните мрежи.
„На овој начин тој јавно го подложи знамето на Република Хрватска на потсмев и грубо омаловажување и на јавноста и стави на располагање видео од тој чин преку компјутерска мрежа, во кое повикува на насилство или омраза насочена кон група луѓе поради нивната национална или етничка припадност“, наведува полицијата во кривичната пријава.
Пријавата го товари младиот човек за јавно поттикнување насилство и омраза и нарушување на угледот на Република Хрватска. За овие злосторства му се заканува затворска казна до три години.
Од полицијата потврдија дека со решение на Жупанискиот суд во Вуковар, на 18-годишникот му е одредена мерка притвор.