Свет
Мажот од САД кој си го смени името во „Буквално било кој друг“ се кандидира за претседател
Мажот од американската држава Тексас кој си го смени името во Буквално било кој друг (Literally Anybody Else) ја објави својата кандидатура за претседателските избори во 2024 година, јавуваат американските медиуми.
Елс ја објави својата возачка дозвола од Тексас на својата страница на Фејсбук за кампањата, докажувајќи дека навистина го сменил своето име во Буквално било кој друг.
Елс, порано Дастин Ебеј, работи како наставник по математика во областа Форт Ворт и е воен ветеран.
Тој добива пошта во градот Норт Ричленд Хилс, Тексас, каде што ќе ја заснова својата кампања, а предизборниот штаб доаѓа наскоро, според веб-страницата на Елс.
„Америка не треба да биде заглавена во изборот меѓу „кралот на долгот“ (како што самиот Трамп изјави) и 81-годишник“, пишува на страницата. Ова се однесува на поранешниот претседател Доналд Трамп и актуелниот претседател Џо Бајден, кои ги добија номинациите на нивните партии.
„Буквално било кој друг не е само личност, тоа е борбен крик“.
Сепак, објавувањето кандидатура за претседателските избори е едноставно, но нешто покомплицирано е всушност да се појави на гласачките ливчиња. Елс треба да собере 113.151 потписи од регистрирани гласачи во Тексас кои не гласале на првичните избори на почетокот на овој месец, а тоа е само во Тексас.
Секоја сојузна држава има различни барања за официјална кандидатура.
Сепак, Елс би можел да се регистрира како таканаречен “write-in” кандитат, така што неговото име нема да стои на гласачките ливчиња, но гласачите сепак можат да го допишат и на тој начин да гласаат за него.
Кампањата на Елс привлече внимание низ целата земја и беше покриена од неколку национални медиуми.
Претседателскиот кандидат во вторникот на Фејсбук објави дека дал бројни интервјуа и дека има 660 непрочитани мејлови, со кои се занимава покрај редовната работа.
„Ми треба менаџер за кампања“, напиша Елс во објавата.
„Сакам да испратам порака до Вашингтон во која се вели: „Еј, од 300 милиони луѓе, можевте да изберете подобри (кандидати)“, рече Елс на „Тик-Ток“, мислејќи на Трамп и Бајден.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Објавени први снимки од Асанж на слобода
Џулијан Асанж (52) вчера го напушти затворот со максимална безбедност Белмарш во Велика Британија, откако таму помина 1.901 ден.
Високиот суд во Лондон му одреди кауција, а во текот на попладнето беше пуштен на аеродромот Стенстед, каде што се качи во авион и полета од Велика Британија.
Викиликс го објави првото видео на Асанж по излегувањето од затвор.
„По повеќе од пет години вo ќелија oд 2 на 3 метри, изолиран 23 часа дневно, тој наскоро повторно ќе се соедини со сопругата Стела и нивните деца, кои го познаваат само нивниот татко зад решетки“, објави Викиликс на Икс.
Julian Assange boards flight at London Stansted Airport at 5PM (BST) Monday June 24th. This is for everyone who worked for his freedom: thank you.#FreedJulianAssange pic.twitter.com/Pqp5pBAhSQ
— WikiLeaks (@wikileaks) June 25, 2024
Асанж се согласи да се изјасни за виновен по една точка од обвинението за заговор за добивање и откривање доверливи документи за национална одбрана на САД, според поднесоците во Окружниот суд на САД на Маријанските острови, американска територија во Тихиот Океан.
Основачот на Викиликс, Џулијан Асанж, оваа недела треба да се изјасни за виновен за кршење на американските закони за шпионажа, во договор што ќе му стави крај на неговото затворање во Британија и ќе му овозможи да се врати дома во Австралија.
За се проговори и мајката на Асанж. Таа рече дека е „благодарна“ што го видела крајот на судењето на нејзиниот син.
„Благодарна сум што на страдањата на мојот син конечно му се ближи крајот. Ова ја покажува важноста и моќта на тивката дипломатија“, рече Кристин Асанж, пренесува Скај Њуз.
Инаку, Асанж помина седум години во самоизолација во амбасадата на Еквадор во Лондон, пред да биде задржан во затвор со високо обезбедување во Лондон уште пет години.
Свет
Германија: Ние сме крајно загрижени, се заканува целосен конфликт на Блискиот Исток
Германија е крајно загрижена поради порастот на насилството на израелско-либанската граница и зголемениот ризик од целосен регионален конфликт, изјави министерката за надворешни работи Аналена Баербок за време на посетата на регионот на Блискиот Исток.
Говорејќи на безбедносната конференција, Баербок, како пријател на Израел, предупреди дека Тел Авив може да изгуби во војната против Хамас и дека зголемениот гнев поради положбата на цивилите во Газа ја поткопува израелската безбедност.
Се зголемуваат стравувањата дека војната, во која веќе загинаа десетици илјади луѓе во Газа, може да се прошири и во соседните земји.
Израелскиот премиер, Бенјамин Нетанјаху, во неделата навести дека Израел може да премести повеќе војници на север, каде што борбите против проиранската милиција Хезболах ескалираа на границата со Либан.
Хезболах почна да разменува оган со Израел на 8 октомври, еден ден откако неговиот палестински сојузник Хамас, кој владее со Газа, го нападна јужен Израел, што предизвика војна во Појасот Газа. Десетици илјади луѓе избегаа од двете страни на границата.
„Ние сме крајно загрижени поради зголемувањето на насилството на северната граница. Утре ќе го посетам (либанскиот главен град) Бејрут токму поради оваа причина“, рече Баербок.
„Заедно со нашите партнери работиме напорно за да најдеме решенија кои можат да го спречат понатамошното страдање. Ризикот од ненамерна ескалација и сеопфатна војна расте секој ден“.
Германија чувствува историска одговорност кон Израел во нејзината желба да се искупи за геноцидот на европските Евреи во нацистичкиот холокауст, забележува Ројтерс.
Но, како и во другите западни земји, војната во Газа доведе до јавно негодување поради порастот на бројот на убиени Палестинци, кој сега изнесува над 37.600, а владата на германскиот канцелар Олаф Шолц ја заостри реториката за акциите на Израел.
Баербок ја истакна хуманитарната ситуација во Газа, велејќи дека најмалку 17.000 деца таму останале сирачиња или одвоени од своите родители.
Свет
ЕУ ќе ја снабдува Украина со приходите од замрзнатиот руски имот, блокадата на Унгарија е заобиколена
Министрите за надворешни работи на ЕУ во Луксембург се договорија за правна рамка за користење на приходите од замрзнатиот руски имот за помош на Украина, заобиколувајќи ја унгарската блокада, изјави шефот за надворешна политика на ЕУ, Жозеп Борел.
Борел рече дека ЕУ нашла начин да ја заобиколи унгарската блокада и дека веќе следната недела ќе испрати 1,4 милијарди евра приходи од замрзнатиот руски имот за да и помогне на Украина со оружје и муниција.
„Законски гледано, бидејќи една земја-членка не учествуваше во одлуката за користење на приходите од замрзнати руски средства, нема право да учествува во одлучувањето за кои цели ќе се користат тие средства. Сега ќе ја забрзаме работата без блокади. “, рече Борел.
Според некои извори, приходот од замрзнатите руски средства би бил проследен до некои земји-членки на ЕУ, кои потоа би го купиле она што и е потребно на Украина и ќе го испорачаат.
Во однос на исплатата на средствата од Европскиот мировен фонд (ЕПФ), Унгарија сè уште блокира 6,6 милијарди евра помош за Украина, бидејќи за тоа е потребен консензус од сите земји-членки.
Меѓутоа, од ова всушност не беше директно оштетена Украина, туку земјите-членки кои ја снабдуваа Украина со оружје и муниција од нивните залихи, а за тоа треба да бидат платени од ЕПФ, вонбуџетски фонд кој има за цел да ја зајакне способноста на ЕУ за спречување на конфликти, градење и зачувување на мирот и зајакнување на меѓународната безбедност и стабилност.