Полицијата покрај телефонот, врши увид и во социјалните мрежи и контактите на Ивана Илиќ – мајката на исчезнатото двегодишно девојче во Србија, јавуваат српските медиуми.

Девојчето исчезна во вторникот околу 13 часот, кога мајката, како што изјавила во полицијата, за момент се одвоила од ќерката. Девојчето тогаш исчезнало, а земјата веќе шести ден е на нозе во големата потрага.

Полицијата, пожарникарите, како и локалното население и бројни доброволци ја пребаруваат областа во потрага по девојчето. Вклучени се и кучиња трагачи.

Поранешниот полиграфски испитувач, Зоран Луковиќ  кој беше контактиран од медиумите во соседството објасни која би можела да биде причината што мајката на малата Данка Илиќ (2) не е тестирана на полиграф поради нејзината бременост.

„Причината се повеќекратните импликации на стресот, кој е последица на стравот од резултатите. Затоа при полиграфското испитување се поставуваат различни прашања во врска со случајот, а доколку постои страв може да доведе до голем стрес. Не сум доктор за да можам детално да зборувам за тој механизам, но кога мајката е изложена на стрес, фетусот – бебето – страда, што не сакаме да се случи“, објасни Луковиќ.

Како што додава, тоа не се прави ниту кога е речиси сигурно дека трудницата е виновна за некое дело.

„Можеби навистина е вмешана, тоа не го знаеме, па ако се соочи со прашања кои се проблематични за неа, кои откриваат што се случило или воопшто што ја рекапитулираат целата ситуација, тоа би предизвикало поголем стрес кај неа. А и да е виновна, плодот не е, и не смееме да ризикуваме лошо да се одрази на него“, истакнува полиграфот.

Како што нагласи, оваа метода постои околу 150 години и во соработка со лекарите е констатирано дека бремените жени не треба да се изложуваат на полиграфско тестирање, така што и во овој случај не смее да се менува практиката.

Кога станува збор за таткото на девојчето и фактот дека тој повеќепати бил вратен во полиција и повторно испрашуван, вклучително и на полиграф, Зоран Луковиќ објаснува дека и тоа е стандардна практика:

„Повторното тестирање на испитаниците се врши по и врз основа на новооткриените факти од случајот. Секој нов детал што е откриен отвора нови прашања и затоа процесот се повторува“, објасни тој.

Багери, полиција и пожарникари со денови го расчистуваат дворот и просторот околу дворот каде последен пат била видена Данка. Исто така, проверени се и каналите околу дворот.

Два хеликоптери вчера во текот на целиот ден го обиколија теренот на мала надморска височина, а можеше да се слушне и како моторната пила се користи за расчистување на теренот. Забележани се и полицајци со лопати, а на целата област има тензија дали е пронајдена трага која може да доведе до малото девојче.

Според неофицијални информации, се проверуваат и Фејсбук профилите на Ивана Илиќ.

„Мајката има неколку профили на Фејсбук, се проверуваат сите пораки што ги праќала и примала во претходниот период. Исто така, наводно се проверува и нејзината комуникација со луѓе од Ниш и Зрењанин. Засега нема официјални информации, ниту детали за проверката на нејзините профили на социјалните мрежи, ниту дали има нешто што се коси со истрагата“, вели извор близок до истрагата за „Информер“.

Според одредени српски медиуми, спорна е содржината на телефонот на Ивана, која наводно бришела пораки на денот на исчезнувањето на малото девојче.

„Наредено е детално вештачење на телефонот на Ивана, а според неофицијални информации, пронајдени се и добиени нови оперативни податоци од полицијата. Исто така, се испитуваат и некои нејзини претходни изјави, за кои некои оценија дека се контрадикторни“, додава изворот.