Свет
Би-би-си: Мистериозната болест на американски дипломати поврзана со руското разузнавање
Мистериозната болест, наречена Хавана синдром, која ги погодува американските дипломати во светот во последните години, веројатно, е поврзана со руската разузнавачка единица, јавува Би-би-си.
Персоналот стациониран во светот, кој известува за необјаснети симптоми на таканаречениот Хавана синдром, како што се вртоглавица, главоболки, тешкотии со концентрирање и интензивно и болно ѕвонење во ушите, можеби биле цел на руско инфразвучно оружје.
Долго време постои сомнение дека биле нападнати од насочена енергија или микробранови, емитувани од скриени уреди, а новата истрага вели дека оперативците на руската воена разузнавачка единица, позната како 29155, можеби целеле американски дипломати со „насочено енергетско оружје“.
Се вели дека има докази за присуство на припадници на таа единица во градовите во светот токму во времето кога американски персонал известувал за инцидентите.
Официјална Москва негира каква било вмешаност и иако американските власти рекоа дека нема докази за вмешаност на странска сила, нивната минатогодишна процена за ненормални здравствени инциденти, кои не понудија алтернативно објаснување за феноменот, предизвика незадоволство кај погодените.
Овој феномен го добил името по главниот град на Куба, Хавана, каде што е забележан првиот таков случај во 2016 година иако неодамнешните истражувања покажуваат дека првите случаи можеби се случиле во Германија две години порано. До денес се регистрирани над илјада случаи на мистериозната болест, а десетици случаи сè уште официјално се сметаат за необјаснети.
Американскиот Конгрес усвои закон, чија цел е да обезбеди поддршка на жртвите, а лицата со потврдени повреди на мозокот од болеста имаат право на финансиска помош.
Американските официјални лица изјавија за американскиот „Си-би-ес њуз“ дека „ќе продолжат внимателно да ги истражуваат необичните здравствени инциденти“, но го повторија својот претходен став дека „е малку веројатно оти странска сила е одговорна“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Се огласија сирените во Тел Авив, Израел: Го пресретнавме проектилот
Предупредувачките сирени се огласија денеска во трговскиот главен град на Израел, Тел Авив, откако системите за противвоздушна одбрана пресретнаа ракета земја-земја откако беше откриено дека преминува од Либан, соопшти израелската војска.
Нема извештаи за штети или жртви, а војската соопшти дека нема промени во упатствата за цивилна одбрана за централен Израел. Предупредувачките сирени се огласија и во други области на централен Израел, вклучувајќи го и градот Нетања.
Либанското движење Хезболах, поддржано од Иран, истрела стотици проектили и ракети врз Израел во последните денови, бидејќи нагло се интензивираше повеќемесечниот конфликт преку границата со јужен Либан.
Израелската војска ги изведе своите најтешки воздушни напади во војната оваа недела, напаѓајќи ги лидерите на Хезболах и погоди стотици цели длабоко во Либан, убивајќи повеќе од 500 луѓе и рани повеќе од 1.800. Вчера, во напад во Бејрут беше убиен високиот командант на Хезболах, Ибрахим Кубаиси.
Свет
Либан разочаран од прошталниот говор на Бајден: „Единствено вие можете да направите разлика“
Министерот за надворешни работи на Либан Абдалах Бу Хабиб изрази разочарување од изјавите на американскиот претседател Џо Бајден за ескалацијата на кризата меѓу Либан и Израел, но рече дека се надева оти Вашингтон сепак може да интервенира и да помогне.
„Тоа не беше силно. Не ветува и нема да го реши овој проблем. Сè уште се надевам. Соединетите држави се единствената земја што навистина „може да направи разлика“ на Блискиот Исток како што тоа го прави во однос на Либан“, рече Хабиб, коментирајќи го прошталниот говор на Бајден во Обединетите нации.
Хабиб зборуваше за време на настан организиран од Фондацијата Карнеги за меѓународен мир. Се проценува дека околу половина милион луѓе се раселени во Либан, рече тој. Либанскиот шеф на дипломатијата рече дека либанскиот премиер се надева дека ќе се сретне со американски претставници во следните два дена.
Бу Хабиб посочи дека израелската влада не се залага сериозно за договорен крај на борбите и наместо тоа се стреми да победи на бојното поле.
Претходно во својот говор пред Генералното собрание, Бајден се обиде да ги смири тензиите во време кога има изгледи војната меѓу Израел и палестинската исламистичка организација Хамас, која трае речиси една година, да се прелее во Либан во борба против Хезболах.
„Сеопфатна војна не е во ничиј интерес. Дури и ако ситуацијата ескалирала, сепак е можно дипломатско решение“, изјави американскиот претседател на Генералното собрание со 193 земји-членки. Бајден доби аплауз кога ги повика Израел и Хамас да ги финализираат условите за договорот за прекин на огнот и ослободување на заложниците предложени од Соединетите држави, Катар и Египет.
Свет
Поднесено е обвинение за обид за атентат врз Трамп
Човекот осомничен дека со пушка му се заканил на Доналд Трамп, на теренот за голф во Флорида, вчера беше обвинет за обид за атентат врз политичкиот кандидат, објавија федералните обвинители.
Рајан Рут (58) веќе се соочува со две обвиненија поврзани со пиштол, откако властите соопштија дека тој вперил пушка низ оградата во голф клубот Трамп во Вест Палм Бич, Флорида, на 15 септември додека републиканскиот претседателски кандидат играл голф таму. Нему му беше наредено да остане во затвор за да го чека судењето.
„Министерството за правда нема да толерира насилство што го погодува срцето на нашата демократија, а ние ќе ги најдеме и ќе ги повикаме на одговорност оние што го вршат. Тоа мора да престане“, рече во соопштението државниот обвинител Мерик Гарланд.
Обвинението за обид за атентат предвидува максимална казна доживотен затвор.
Рут сè уште не се изјаснил за неговата вина. Неговите адвокати неуспешно бараа негово ослободување со кауција.
Обвинителите во последните денови открија докази за кои велат дека укажуваат на заговор за убиство на Трамп. Тие тврдеа дека неколку месеци пред инцидентот, Рут оставил писмо на неидентификувано лице, алудирајќи на „обид за атентат врз Доналд Трамп“.