Македонија
(Видео) Костадиновска-Стојчевска: Сѐ е јасно во решението, 12 проценти повисоки плати на културните работници, кратење нема да има
Министерката за култура, Бисера Костадиновска-Стојчевска, по реакциите на Синдикатот на културата на Република Македонија за наводни нејасности во решението за плата изготвено од Министерството за култура и неоснованите обвинувања за кратење на платите во културата, одржа прес-конференција на која јасно соопшти дека нема никаква опасност од кратење на платите, напротив, платите во март повторно се покачуваат.
„Би сакала да не се шират дезинформации, некакви теории на заговор, дека Министерството за култура сака нешто да скрие. Напротив, секогаш сме работеле одговорно и транспарентно, во служба, пред сè, на културните работници. Сè е јасно во решението за плата, платите на културните работници ќе се покачат 12 проценти“, рече министерката за култура објаснувајќи го образецот на решението што Министерството за култура преку официјална е-пошта го достави до установите за пресметка на платите.
Таа појасни дека последниот пат кога било добиено 10 проценти покачување во септември 2023 година, според член 14 став 1 од Општиот колективен договор, а во текот на целата 2023 година имало вкупно 21 процент покачување на нивните плати.
„Фер е да кажеме дека во изминатите 4 години, од 2020 до септември 2023 година, кога беше последното покачување, покачувањето на платите на културните работници, почитувајќи го колективниот договор, склучен на 30 декември 2019 година, и Општиот колективен договор, изнесува 40 отсто. Со ова последно покачување во март покачувањето на платите во културата е 52 отсто“, информира министерката за култура аргументирајќи дека кратење на платите во секторот нема да има.
Костадиновска-Стојчевска го појасни решението испратено до установите одговарајќи на нејасностите што се јавуваат и разменуваат преку Синдикатот на културата и додаде дека за изработка на овој документ Министерството за култура ги консултира Министерството за труд и социјална политика и Државниот испекторат за труд.
Потенцира дека во изминатиот период, по донесувањето на колективниот договор во културата, во ниту еден момент не станало збор за негово непочитување додавајќи дека од самото потпишување на колективниот договор во 2019 година тој е исполнет.
„Некогаш сме имале потреба за одредени кратења средства или пренамена за да ги дообезбедиме платите, меѓутоа во последните три буџети зголемувањата на платите им се предвидени. Може и самите културни работници да проверат дека и најновото покачување од март е предвидено во системот за изработка на плати на Министерството за финансии“.
Костадиновска-Стојчевска, одговарајќи на новинарско прашање, повтори дека кратење во културата нема и упати апел да не се шират дезинформации, да не се шират страв и паника во секторот зашто колективниот договор се почитува и со секое ново покачување на минималната плата платите во културата уште повеќе ќе растат. Тоа е наша заедничка цел, рече министерката за култура говорејќи за завидното ниво на платите што културните работници го заслужуваат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Подрачјето на Велес ќе биде зафатено од поројни врнежи, грмежи и засилен ветер
ЦУК информира, според известувањето на УХМР, дека подрачјето на Велес ќе биде зафатено од пообилни поројни врнежи со грмежи и засилен ветер.
Правец на движење на оваа нестабилна маса се предвидув дека е кон исток и североисток, додаваат од ЦУК.
Македонија
Министерството за животна средина отстапи движни ствари на повеќе општини, за потребите на училиштата вклучени во ГЛОБЕ програмата
Владата, на предлог на Министерството за животна средина и просторно планирање, донесе одлука со којашто движни ствари во сопственост на министертството, се даваат на трајно на повеќе општини во државата, за потребите на повеќе основни училишта и тоа во Гевгелија, Неготино, Валандово, Битола, Прилеп, Тетово, Куманово, Пробиштип, Ранковце, Велес, како и на училишта во скопските општини: Центар и Карпош.
Целта е спроведување на ГЛОБЕ програмата во Република Северна Македонија, а Министерството за животна средина и просторно планирање, како што е посочено, е носител на активностите на ГЛОБЕ програмата и со владина одлука е задолжено да обезбеди хемикалии и инструменти за вршење на мерењата и да ги пренесе на користење на вклучените училишта во програмата.
Станува збор за движни ствари што ќе им бидат од полза на училиштата во спроведувањето на проектот, а коишто, по пат на јавна набавка ги обезбедило ресорното министерство.
Македонија
Одлука за учество на Армијата во НАТО операцијата „КФОР“ во Косово
Владата, на предлог на Министерството за одбрана, донесе Одлука за определување на бројот на кандидати кои се запишуваат на Воената академија „Генерал Михаило Апостолски“- Скопје, во студиската учебна 2024/2025 година, чие образование се финансира од Буџетот на Република Северна Македонија.
Со одлуката е определено, во студиската учебна 2024/2025 година да се запишат 44-ца студенти/питомци како редовни студенти, од кои 25-мина студенти/питомци за потребите на Министерството за одбрана – Армијата на Република Северна Македонија; како и тројца студенти/питомци за потребите на Војската на Црна Гора; шестмина студенти/питомци за потребите на вооружените сили на Босна и Херцеговина; петмина студенти за потребите на управување со кризи и петмина студенти за потребите на заштита и спасување.
Согласно Законот за Воената академија, како што е образложено од ресорното министерство, на Академијата можат да студираат и припадници на вооружените сили на странски држави и странски државјани.
Владата, на предлог на Министерството за одбрана, донесе и Одлука за испраќање припадници на Армијата на Република Северна Македонија за учество во НАТО операцијата „КФОР“ во Република Косово.