Македонија
Мисајловски: Ви ветувам дека Македонија ќе биде повторно горда, гласајте за професорката Силјановска Давкова
Денеска тука ви ветуваме дека Македонија повторно ќе биде горда! Тоа значи дека секој еден од нас треба да биде спокоен. Професорката ќе се грижи за Македонците, за секој еден граѓанин без разлика на припадност. Таа го крева гласот против неправдите, рече Владо Мисајловски, носител на листа на пратеници во изборна единица 2 на вечерашниот митинг во Куманово.
Мисајловски посочи дека професорката ќе ја претставува Македонија, и дома, и во светот, на најдобар можен начин.
„Со ваша помош, со заокружување на бројот 2, професорката ќе ја направи Македонија, горда и почитувана, а не како оние што до сега ја водеа дипломатијата, Стево Пендаровски, Бујар Османи и други како нив. Тие направија само штета на Македонците и Македонија, направија секој да се потсмева со нас, да не потчинува“, кажа Мисајловски.
Мисајловски рече дека Македонија и граѓаните ги живеат можеби најтешките времиња.
„Каде и да се свртите е хаос. За секој проблем се мачите, барате врски да ви се заврши работа, затоа што системот не функционира. Корупцијата е толку очигледна насекаде, поради ова си одат од државава и младите, но и повозрасните. Вие, ова не го заслужувате. Вие сакате ваша, напредна, Македонија со пристојни услови за живот. Вие, сте енергијата поради која, јас и ВМРО-ДПМНЕ, правиме промени и бараме промени за подобра Македонија“, вели Мисајловски.
Мисајловски им вети на граѓаните дека се што треба, а можат ќе реализираат за граѓаните.
„ВМРО-ДПМНЕ ќе покаже што е грижа за сите граѓани. За пензионерите 5.000 денари повисока пензија. Заедно можеме да направиме се, заедно можеме да направиме многу. Доста беа црнила, црни кампањи“, изјави Мисајловски.
Мисајловски посочи дека за време на посетите на населените места во Куманово видел желба за промени кај граѓаните.
„Кај нив гледам желба за нова влада на ВМРО-ДПМНЕ. Ви ветувам од 24 април ќе почнат промените. На 8 мај треба да избере и новиот премиер кој ќе биде заедно со граѓаните, а тоа е Христијан Мицкоски“, кажа Мисајловски.
Мисајловски додаде дека граѓаните одлучуваат за промените и ги повика масовно да излезат на 24 април и 8 мај да гласаат.
„Лошите денови ги праќаме во историјата, а јас ви ветувам дека нема да ве разочараме. Ние ќе пишуваме историја на задоволни граѓани, граѓани кои ќе останат дома на своето, а не да бегаат од Македонија“, порача Мисајловски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Силјановска-Давкова телефонски разговарала со Зеленски: украинскиот народ може и во иднина да смета на македонското сојузништво и пријателство
Претседателката Гордана Сиљановска Давковa денеска оствари телефонски разговор со претседателот на Украина, Володимир Зеленски.
„Во разговорот со украинскиот претседател Зеленски, Сиљановска Давкова ја нагласи нашата цврста и недвосмислена поддршка кон Украина во однос на неиспровоцираната и неоправдана руска воена агресија. Осврнувајќи се на меѓународното право, принципите на Повелбата на ОН и Статутот на Советот на Европа, претседателката рече дека украинскиот народ може и во иднина да смета на македонското сојузништво и пријателство во справувањето со историскиот предизвик со трајни и несогледливи последици.
Двајцата соговорници разменија мислење и за претстојниот Самит чиј домаќин ќе биде Швајцарија, а со цел да создаде рамка поволна за сеопфатен и траен мир во Украина“, соопштија од нејзиниот кабинет.
Претседателот Зеленски во текот на разговорот ја поканил претседателката да ја посети Украина, за што тие, како што е појаснето, дополнително ќе се консултираат на Самитот во Швајцарија.
За време на разговорот биле нагласени одличните билатерални односи меѓу двете земји, карактеризирани со идентични вредности, меѓусебна почит и разбирање, силно потврдени со континуираната соработка во сите области од заеднички интерес.
Сиљановска Давкова и Зеленски ја реафирмирале посветеноста од натамошна заемна поддршка во меѓународната дипломатија, во насока на исполнување на европската аспирација на двете држави.
Телефонскиот разговор со Зеленски, Сиљановска Давковa го оствари од Рим, за време на нејзината посета на Италијанската Република и Светиот Престол по повод манифестацијата „Македонија во чест на Св. Кирил“.
Македонија
Таравари уште размислува дали ќе биде министер за здравство: „Можноста не е исклучена, но не е дефинитивна“
Арбен Таравари, еден од партнерите на коалицијата „Влен“, а кој моментно е градоначалник на општина Гостивар, сѐ уште не одлучил дали ќе биде во идната влада како министер.
Тој потврди дека некои од пишувањата на некои медиуми за поделбата на владините ресори и службените места се точни. Според Таравари, конечниот договор меѓу идните владини партнери, „Влен“ и ВМРО-ДПМНЕ, најверојатно, ќе биде објавен денеска или утре, стои во напишаниот допис.
„Алијансата ќе има двајца министри, вицепремиер за добро владеење и транспарентност и министер за здравство и двајца заменик-министри, како и двајца државни секретари, и тоа заменик-министер за одбрана и заменик-министер за земјоделство. Државен секретар за здравство и уште еден на кој сега не ми текнува“, изјави Таравари.
Таравари вели дека сѐ уште не се дефинирани имињата на кадрите што ќе бидат назначени на овие позиции.
Запрашан дали ќе биде следниот министер за здравство, тој рече дека не одлучил и сѐ уште размислува дали ќе ја прифати оваа функција. „Не е исклучена можноста, но не е дефинитивна“.
Таравари ги коментира и резултатите од прегласувањето и истакна дека тие воделе на 8 мај и сега, како што рече тој, се во голема предност.
„ДУИ може да ги обжали резултатите, но резултатите се такви. Тоа беше очекувано и сега бранот промени не може да се запре, па ДУИ мора да го прифати резултатот. Граѓаните сега се ослободени, гласаат малку послободно од порано и посакувам ДУИ да ја прифати оваа реалност. Сега ‘Влен’ има еден пратеник повеќе, ДУИ еден помалку“, изјави Таравари.
Македонија
Црква изградена во 1874 година настрада од минирањата на „Бехтел и Енка“, велат од партијата Левица
Во селото Ореовец (Прилепско) се наоѓа црквата „Св. Димитрија“, која е гробиштен храм изграден во 1874 година. Црквата претрпе огромни штети по вршењето на минирањето од страна на американско-турскиот конзорциум „Бехтел и Енка“, велат од партијата Левица.
„Штетата е настаната по минирањето во непосредна близина од страна на преплатениот од народни пари конзорциум, што предизвикало земјотреси чија последица се одразила и на овој објект. Во Црквата има фрески постари од 150 години – дел од нив изработени на дрво и кожа, кои освен што се од огромно значење за месното население, туку тие претставуваат и богато културно наследство за овој крај.
Од потресите, оштетени и испукани се ѕидовите на Црквата и ако се продолжи со минирање, голема е веројатноста да настанат штети од поголеми размери, што не ја исклучува можноста да се случи и нејзино целосно рушење.
Покрај штетата на Црквата, од минирањето: загрозени се извори на вода од кои и денес се снабдува Прилеп со вода; оштетени се куќи во селото Ореовец; се крева прашина која поради струењето на воздухот и релјефот на теренот целосно паѓа во Прилеп и прилепските села и се уништуваат ендемични видови на животни.
Прилепчани десетина дена прават протесна блокада на патот кон село Ореовец и не дозволуваат машини и работници да продолжат со минирање и ископување. Пратеникот од редовите на Левица – Сашко Јанчев, присуствуваше на протестите и даде поддршка на блокадата.
Левица претходно го блокираше спроведувањето на договорот со „Бехтел и Енка” со илјадници амандмани. Сега најавуваме дека нашите активисти се спремни веќе и физички на терен да ја поддржат борбата на граѓаните“, соопшти партијата Левица.