Регион
Грција го исполни ветувањето: бесплатен одмор за сите туристи што лани го преживеаја пoжарот на Родос

Грција почна да дели ваучери за бесплатен седумдневен одмор на туристите принудени да ги напуштат хотелите на грчкиот остров Родос во летото 2023 година поради шумски пожар.
Речиси 25.000 туристи, главно од Велика Британија, чекаат да добијат ваучери за седумдневен престој во хотелите на Родос, објави „Гардијан“.
Грција усвои нов закон за ова, а министерот за туризам, Мирон Флурис, рече дека Грција е првата земја во светот што одлучила на овој начин да им дава компензација на туристите.
Во рамките на оваа програма лицата евакуирани од хотелите поради пожарот во јули ќе може да користат е-ваучери во вредност од 300 до 500 евра за покривање на трошоците за сместување за време на еднонеделен престој.
Иницијативата ќе се спроведува во две фази: од сега до 31 мај и од 1 октомври до 15 ноември. Туристичките власти на Родос соопштија дека досега се регистрирани повеќе од 5.000 туристи во регистарот на корисници на програмата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Фото) Пијан Македонец удри во паркиран автомобил во Загреб, казнет е со 4.860 евра

45-годишен државјанин на Северна Македонија бил вклучен во сообраќајна несреќа на улицата Радничка во Загреб околу 6 часот наутро во неделата, објави хрватски Индекс.
Тој управувал со „фолксваген пасат“ со загрепски регистарски таблички и возел југозападно низ паркинг на северната страна од пристапниот пат до ресторан.
Пристигнувајќи до куќата број 27, тој се вратил на пристапниот пат, застанал и возел напред. Во тој момент, предниот лев дел од неговиот автомобил удрил во задниот дел од „рено клио“ со загрепски регистарски таблички, сопственост на 40-годишна жена, кое било паркирано.
Со истрагата и алкотестот е утврдено дека 45-годишниот возач управувал возило со 1,76 промили алкохол во крвта.
Сообраќајната несреќа предизвикала материјална штета. Возачот бил уапсен и сместен во посебни простории додека не исчезнат ефектите од опојната материја. Потоа бил изведен во Општинскиот прекршочен суд во Загреб.
Во обвинителниот акт, полицијата предложила возачот да биде казнет со парична казна од 5.360 евра и затвор, како и да му се изрече заштитна мерка забрана за управување со моторно возило Б категорија во траење од 12 месеци.
Судот го прогласи обвинетиот за виновен, му изрече парична казна од 4.860 евра и му изрече заштитна мерка забрана за управување со моторно возило Б категорија во траење од 12 месеци, објави Индекс.
Регион
Пожар во затвор во Сплит, неколку затвореници хоспитализирани

Неколку затвореници се повредени во пожарот во сплитскиот затвор Билице, кој е изгаснат, соопшти денес Сплитскиот противпожарен оперативен центар.
Како што е наведено, затворскиот персонал го изгаснал пожарот што избувнал синоќа, а пожарникарите ги евакуирале затворениците, од кои неколку побарале медицинска помош поради вдишување чад и биле пренесени во сплитската болница.
„Добивме дојава за пожар во една од ќелиите на затворот околу 21:30 часот, а по пристигнувањето на пожарникарите затворскиот персонал веќе го изгаснал пожарот во најголем дел, а пожарникарите веднаш ги евакуирале затворениците“, изјавиле за Хина од Противпожарниот центар.
Регион
Драма во Црна Гора: две жени од Србија извлечени на брегот од силните морски струи и ветер

Две српски државјанки беа спасени денес во водите на Јадранското Море, откако силни морски струи ги одвлекоа далеку од брегот.
Како што соопшти Управата за поморска безбедност и управување со пристаништата во Црна Гора, двете жени од Србија биле однесени од брегот кај Сутоморе од силните морски струи и ветер.
Управата изјави дека центарот за поморски операции добил повик за помош утрово во 8:33 часот, по што спасувачкиот брод со екипажот испловил кон областа Сутоморе.
„На лице место пронашле две српски државјанки кои биле во морето. Тие веднаш биле извлечени од водата и безбедно транспортирани со брод на Управата за поморска безбедност и управување со пристаништата до брегот, каде што ги пречекала екипата за итни случаи“, се додава во соопштението.
Управата истакна дека акцијата била завршена брзо и ефикасно, а спасувачката екипа била поддржана од брод од Секторот за гранична полиција со екипаж.