Спорт
Рој Кин: Не можам да го гледам овој Манчестер јунајтед
Рој Кин, поранешниот капитен на Манчестер Јунајтед, по којзнае кој пат го критикуваше својот поранешен клуб. Анализирајќи го полуфиналето на ФА Купот со Ковентри во кое Јунајтед среќно мина во финалето и покрај тоа што имаше водство 3:0, Кин рече дека настапот на тимот на Ерик тен Хег е срамен.
Ковентри (осми на табелата во Чемпионшип), од 70 до 95.минута ја надомести негативата од три гола, а во 120.минута сонот за место во финалето им го урна ВАР. Глоот на Торп беше поништен поради милиметарски офсајд.
Пенал серијата Јунајтед ја доби со 4:3.
„Некои играчи и навивачи на Јунајтед на крајот не славеа. Им беше срам што победија на крајот. Секогаш кога го гледам овој тим на Јунајтед, не ми се допаѓа тоа што го гледам. Тие зборуваат за лидерство и карактер, а јас не го гледам тоа во тимот на Јунајтед. Боже, колку среќа имаа“, рече Кин.
Неверојатно е колку лошо екипата од „Олд Трафорд“ игра оваа сезона.
Противниците лесно им создаваат шанси, нема идеја во играта, па многумина веруваат дека Ерик тен Хаг ќе биде сменет на крајот од сезоната.
„Секоја недела приказната е иста кога се работи за Манчестер Јунајтед. Никогаш не знаеш што ќе добиеш од нив. Се вели дека некогаш е потребно да имате среќа. Мегваер рече дека покажале добар карактер. Не гледам никаков карактер во ова група играчи. Го гледам голманот, како „краде“ од времето. Човеку продолжи со играта, покажи малку храброст. Не можам да ги поднесам. Гледам на теренот група играчи со лоши навики, се уплашија да победат. Во продолженијата Ковентри изгледаше како тим од Премиер лигата, а Јунајтед како тим од Чемпионшип“, заклучи Кин.
Од друга страна, поранешниот дефанзивец на Ливерпул Џејми Карагер е убеден дека ова е крајот на мисијата за Ерик тен Хаг.
„Сите се сеќаваме како Марк Робинс му ја спаси работата на Алекс Фергусон, мислам дека поради овој натпревар Тен Хаг ќе остане без работа. Не гледам како може да остане после ова“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Спалети го објави спискот на Италија
Селекторот на италијанската фудбалска репрезентација Лучано Спалети денеска го објави поширокиот список на играчи за претстојното Европско првенство кое ќе се одржи во Германија.
Италија ја брани титулата европски првак, која ја освои во 2021 година. „Азурите“ до почетокот на Европското првенство ќе одиграат пријателски натпревари со Турција и Босна и Херцеговина.
Повик од селекторот не добија Џиро Имобиле и Мануел Локатели, кои беа стандарни во тимот на Роберто Манчини во походот на европската круна. Интерсно Спалети го повика фудбалерот на Јувентус, Николо Фаџоли, кој не игра од октомври поради суспензија. Фаџоли беше казнет поради нелегалното обложување.
ЕП ќе се одржи од 14 јуни до 14 јули во Германија, а Италија во групата Б ќе игра против Шпанија, Хрватска и Албанија.
Списокот на Спалети:
Голмани: Џанлуиџи Донарума, Алекс Мерет, Иван Проведел, Гиљермо Викарио.
Одбрана: Франческо Ачерби, Алесандро Бастони, Раул Беланова, Алесандро Бонџорно, Рикардо Калафиори, Андреа Камбијасо, Матео Дармијан, Џовани ди Лоренцо, Федерико Димарко, Џанлука Манчини, Џорџо Скалвини.
Среден ред: Николо Барела, Брајан Кристанте, Николо Фаџоли, Мајкл Фолорунсио, Давиде Фратеси, Жоргињо, Лоренцо Пелегрини, Самуеле Ричи.
Напад: Федерико Киеза, Стефан Ел Шарави, Рикардо Орсолини, Џакомо Распадори, Матео Ретеги, Џанлука Скамака и Матијас Закањи.
Спорт
Пакета под истрага за нелегално обложување
Фудбалската асоцијација на Англија (ФА), ќе поднесе обвинение против ѕвездата на Вест Хем и бразилски репрезентативец Лукас Пакета (26) за наводна вмешаност во обложување. Наводно, на некои натпревари од Премиер лигата, Пакета намерно добивал жолти картони..
„Крајно сум изненаден и вознемирен што ФА одлучи да ме обвини. Девет месеци соработував на секој чекор од нивната истрага и ги давав сите информации што можев. Ги отфрлам наводите во целост и ќе се борам до последен здив за да докажам дека сум чист. Поради процесот што е во тек, нема да давам дополнителни коментари“, изјави поранешениот играч на Милан, Лион и Фламенго.
Неодамна, „Манчестер Ивнинг њуз“ напиша дека Пакета, кој одигра 37 натпревари оваа сезона и постигна осум гола и забележа седум асистенции, ќе биде главната цел на Манчестер сити во летниот преоден рок во зделка која може да чини 100 милиони евра.
Пеп Гвардиола сакаше да го доведе Пакета минатото лето, но трансферот не беше реализиран бидејќи ФА веќе покрена истрага против фудбалерот поради наводно прекршување на правилата за обложување.
Атлетик наведува дека Пакета ќе дојде во Сити само доколку биде ослободен од обвинувањата, а трансферот ќе зависи и од потенцијалните заминувања на други играчи.
Бразилецот наводно веќе договорил дел од условите со актуелниот англиски шампион. Англиските новинари дури тврдат дека Гвардиола го повикал на почетокот на сезоната, по натпреварот на двата тим, да се ракува со него и со остатокот од стручниот штаб.
Сепак, тогаш почнаа шпекулациите дека Пакета ќе биде суспендиран поради обложување, па Сити се повлече од договорот.
Според податоците на „Трансфермаркт“, Манчестер сити платил 100 или повеќе милиони евра само за Џек Грилиш, кој пристигна во 2021 година од Астон Вила за 117,5 милиони евра. Втор најскап играч е хрватскиот дефанзивец Јошко Гвардиол кој лани беше платен 90 милиони евра.
Спорт
АС: Барселона има нов тренер
Германскиот тренер Ханси Флик ја презема Барселона, пишува шпанскиот спортски весник „АС“. Поранешниот тренер на Баерн и до неодамна селектор на Германија, Флик разговарал со спортскиот директор на Барселона Деко и членот на спортската комисија Бојан Кркиќ. На тој состанок се договориле Флик да биде тренер на Барселона во следните две сезони, тврди „АС“.
Челните луѓе на Барселона решиле се разделат со Чави, кој сезоната ја заврши на второто место во првенството, но минатата сезона беше шампион на Шпанија.
Според овој извор членовите на УО сега треба да се договорат со Чави околу обесштетувањето. Според некои медиуми предвремениот раскин на соработката со Чави, Барселона ќе ја чини околу 20 милиони евра.
Флик (59) како главен тренер го предводеше Баерн на 86 натпревари. Со Баерн ја освои Лигата на шампионите и две шампионски титули на Германија.
Откако се раздели со Баварците ја презеде германската репрезентација, која ја водеше на 25 натпревари, од август 2021 до септември 2023. Не се прослави како селектор на Германија, на Светско првенство бидејќи беше елиминиран во групата.