Свет
Путин: Односите меѓу Кина и Русија достигнаа највисоко ниво и покрај меѓународните предизвици
![](https://makfax.com.mk/wp-content/uploads/2024/05/Putin.jpg)
Рускиот претседател Владимир Путин во пресрет на неговата дводневна државна посета на Кина, која започнува утре, изјави дека координацијата на надворешната политика на двете земји поттикнува воспоставување праведен мултиполарен светски поредок, кој, како што наведе, е основа на идниот успех на руско-кинеското сеопфатно стратешко партнерство.
Во интервју за агенцијата Ксинхуа, Путин истакна дека современите односи меѓу Русија и Кина ја надминуваат идеологијата и претставуваат стратешки избор на двете земји без оглед на политичката ситуација.
Според неговите зборови, овие избори се засноваат на широки заеднички интереси, длабока меѓусебна доверба, силна јавна поддршка и вистинско пријателство меѓу народите на двете земји.
„Во поширока смисла, работиме да придонесеме за развојот и просперитетот на Русија и Кина преку промовирање на еднаква, заемно корисна економска и хуманитарна соработка и зајакнување на координацијата на надворешната политика во интерес на градење праведен мултиполарен светски поредок. Сето ова е клучот за идниот успех на нашето сеопфатно стратешко партнерство…“, рече Путин.
Тој посочи дека длабокото и долгогодишно пријателство и соработка меѓу народите на Русија и Кина е еден од најважните столбови на билатералните односи.
„Денес односите меѓу Русија и Кина достигнаа највисоко ниво во историјата, и покрај предизвикувачката меѓународна ситуација, овие односи продолжуваат да се развиваат“, додаде тој.
Путин нагласи дека Кина јасно ги разбира корените на украинската криза и нејзиното глобално геополитичко влијание, што, како што рече, се рефлектира во „Позицијата на Кина за политичкото решение на украинската криза“, предлог од 12 точки што Кина го претстави во февруари 2023 година и четири принципи за мирно решавање на украинската криза неодамна предложени од кинескиот претседател.
Тие принципи, прецизираше Путин, се засноваат на идејата дека треба да се откажеме од „менталитетот на Студената војна“ и да обезбедиме безбедност и почитување на меѓународното право и Повелбата на ОН во целост и меѓусебна поврзаност.
„Никогаш не сме одбиле да преговараме. Бараме сеопфатно, одржливо и праведно решение на овој конфликт преку мирни средства. Отворени сме за дијалог за Украина, но таквите преговори мора да ги земат предвид интересите на сите земји вклучени во конфликтот, вклучително и нашите“, рече рускиот лидер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Европа
Русија соопшти дека соборила 36 дронови испратени од Украина
![](https://makfax.com.mk/wp-content/uploads/2024/04/shahed-136-dron00002-830x0.jpg)
Системите на руската противвоздушна одбрана уништија 36 дронови, испратени од Украина во текот на изминатата ноќ кон територијата на Русија, соопшти Министерството за одбрана во Москва.
Петнаесет беспилотни летала се соборени над Курска област, девет над Липецка, по четири над Воронешка и Брјанска и по два над Орловска и Белгородска, посочи Министерството во објава на социјалната мрежа Телеграм.
Европа
Четиринаесетгодишно девојче е киднапирано во Грција, во месноста Лариса
![](https://makfax.com.mk/wp-content/uploads/2024/06/isceznata.jpg)
Четиринаесетгодишно девојче е киднапирано во Грција, во месноста Лариса, а активирана е „Амберт алерт“ – килибарна тревога. Девојчето Хрисула Хрисобаланти исчезнало на 27 јуни околу 20.30 часот. Се претпоставува дека девојчето било киднапирано од постаро лице.
Медиумите пренесуваат дека девојчето е високо 155 сантиметри, тешко 55 килограми, долга кафена коса и темнозелени очи.
Во моментот на нејзиното исчезнување носела зелени бермуди, бела маица и бели влечки.
Грчките власти пред неколку дена известија дека трагаат по девојчето Константина-Ирини Р.(16), кое исчезна од предградието Ахарнес во Атина.
Според грчките медиуми, девојчето последен пат била видена во неделата на 16 јуни во вечерните часови.
Регион
Вучиќ го посети повредениот полицаец, му честиташе за неговата смиреност и храброст
![](https://makfax.com.mk/wp-content/uploads/2024/06/Vucic.jpg)
Претседателот на Србија, Александар Вучиќ денеска го посети повредениот припадник на Жандармеријата Милош Јевремовиќ (34), кој откако беше ранет од самострел, беше опериран и е во стабилна состојба.
„Пресреќен сум што Јевремовиќ Милош се чувствува добро по операцијата. Му честитав на Милош за неговата извонредна храброст, неговата смиреност и успешно завршената задача во борбата со терористот. Србија нема да има милост кон терористите“, напиша Вучиќ на фотографијата со ранетиот полицаец.
„Им честитам на командирите и на сите во полициските сили за исклучителното однесување на Милош Јевремовиќ, ќе му се оддаде почест штом ќе ја напушти болницата. Важно е што нашиот херој Милош е жив и здрав, покажа како треба да се реагира во таков момент“, изјави претседателот на Србија.
Непознато лице денес со самострел тешко го рани припадникот на жандармеријата кој бил на должност да ја обезбедува израелската амбасада.
Припадникот на жандармеријата употребил оружје во самоодбрана и го победил напаѓачот, кој од здобиените повреди починал.
Министерот за внатрешни работи на Србија Ивица Дачиќ изјави дека во Белград е уапсено уште едно лице под сомнение за терористичко здружување.
„Во Белград е уапсено уште едно лице осомничено за терористичко здружување. Станува збор за лице од Белград, родено 1999 година, кое веќе беше уапсено пред две години бидејќи бил администратор на неколку милитантни групи на Интернет кои повикувале на џихад“, соопшти Дачиќ.
Тој објасни дека случајот против него и понатаму се води, а тој е пуштен од притвор.