Свет
Извикал „Робо, дај ми рака“, па пукал кон словачкиот премиер – кој е човекот што стои зад атентатот на Фицо

Словачкиот премиер Роберт Фицо, кој беше застрелан во средата, сѐ уште е во тешка состојба. Според словачките медиуми, се очекува тој да биде подложен на уште една операција, а тоа е на колкот. Човекот што трипати пукаше во Фицо среде бел ден по владиниот состанок се вика Јурај Цинтула. Има 71 година, пензиониран, писател и поранешен чувар. Како што кажа и самиот по апсењето, пукал во Фицо „бидејќи не се согласува со политиката на владата“. Сега му се заканува доживотен затвор, а ова е сѐ што досега знаеме за атентаторот од Словачка.
Роберт Фицо беше застрелан во средата по состанокот на владата во градот што се наоѓа на 150 километри од Братислава. Фицо излезе да ги поздрави насобраните поддржувачи и се ракуваше со многумина на улица.
Напаѓачот, чие име подоцна беше откриено дека е Јурај Цинтула, наводно извикал „Робо, дај ми ја раката“. Ова го натерало премиерот на Словачка да му пријде и да му подаде рака за да се ракува.
Иако во тоа време бил опкружен со обезбедување, Цинтула извадил пиштол и пукал петпати од непосредна близина. Три куршуми го погодија Фицо.
Обезбедувањето тогаш скокнало врз напаѓачот, но премиерот веќе бил ранет. Тој итно бил пренесен во најблиската болница со хеликоптер бидејќи било проценето дека нема време да отпатува за Братислава.
Полицијата го совладала напаѓачот и го привела на улица. Фицо бил опериран пет часа и лекарите жестоко се бореле за неговиот живот.
По операцијата, беше соопштено дека е стабилен, но сѐ уште е во животна опасност. Според словачките медиуми, Фицо ќе мора да оди на операција на колкот кога ќе биде подготвен за тоа. Во меѓувреме, атентаторот бил сослушан во полиција и обвинет за обид за убиство со умисла. Тој се соочува со казна од 25 години до доживотен затвор.
Тој извикал „Робо, дај ми ја раката!“, а потоа го застрелал Фицо.
Сведоците што биле на местото на пукањето велат дека Јурај Цинтула првин му викал на премиерот: „Робо, дај ми ја раката“, а кога Фицо дошол да се поздрави – одекнале истрели. Според информациите, испукани се пет истрели, а три тешко го повредиле словачкиот премиер.
По пукањето, напаѓачот бил совладан од полицијата и преземен од Националната агенција за криминал. Тој е 71-годишен пензионер, кој е и малку познат писател. Тој бил чувар во трговски центар кога и самиот бил нападнат по што објавил видеоснимки во кои повикува да се прекине насилството.
„Не се согласувам со неговата политика“
Словачкиот портал „Новине“ ја објави изјавата што Цинтула ја дал во полиција веднаш по неговото апсење.
„Не се согласувам со политиката на владата. На крајот на краиштата, медиумите се ликвидирани. Зошто се напаѓа РТВС (Радио-телевизија на Словачка), зошто е сменет судијата Мазак?“, наводно рекол Цинтула.
Мазак е поранешниот претседател на Судскиот совет, кој неодамна беше разрешен.
Претходно, снимил видео против насилството
Јурај Цинтула пред осум години објавил три видеа со наслов „Против насилството“.
„Мора да покажеме сила, но не и насилство“, вели тој во првиот дел од видеото.
Како што додаде, треба да се покаже сила на плоштадите, каде што треба да се соберат луѓе што не се согласуваат со алчноста на политичарите, но не се против демократијата.
На крајот од видеото има клип од логото на движењето против насилството, кое сакал да го регистрира.
„Движењето против насилството е политичка партија во подем, чија цел е да го спречи ширењето на насилството во општеството. Да се спречи војна во Европа и ширење омраза“, стои под логото.
Во заднина се слуша првиот концерт за пијано на рускиот композитор Чајковски.
Според информациите од снимките, тој го основал движењето во 2016 година.
Во април истата година тој почна петиција за регистрирање на движењето. Сепак, според информациите на веб-страницата, се потпишале само осум лица.
„Тој не гласал за Фицо“
Порталот „Актуалити“ успеал да стапи во контакт со синот на осомничениот за атентатот на Фицо, кој потврдил дека татко му имал пиштол во легално поседување. Сепак, тој негира дека некогаш спомнал оти планира да го нападне Фицо.
„Апсолутно немам поим што правеше татко ми, што планираше, зошто се случи ова“, рече тој. На прашањето дали негувал омраза кон Фицо, кој е и претседател на партијата Смер, тој одговори: „Ќе ви кажам – не гласаше за него“.
Според словачкиот портал СМЕ, осомничениот бил голем противник на политиката на Фицо.
И синот на осомничениот напаѓач негира дека татко му е психијатриски пациент.
„Можеби имало краток спој, не знам. Тој е поенергичен, но не би се занимавал со психијатар или нешто слично“.
Рудник, трговски центар, па поезија
Јурај Цинтула претходно работел во рудник во Хандлова. Подоцна бил чувар во еден од трговските центри во Левице. Во септември 2016 година бил нападнат од еден од муштериите.
„Беше дрогиран. Почна да фрла храна од полиците на земјата, а потоа почна да жонглира со неа“, изјави Цинтула за младиот човек кој дошол во трговскиот центар со својата девојка. Го фатил за рамениците и го замолил да си оди, но младиот човек почнал да го тепа. Го удирал со тупаници и клоци додека, конечно, не паднал меѓу полиците.
Напаѓачот бил приведен од полицијата и осуден на затворска казна.
Цинтула исто така бил уметник. Пишувал песни, член е на Здружението на словачките писатели. Член на управниот одбор на тоа здружение е пратеникот и претседател на Комисијата за култура и медиуми, Роман Мишелко (СНС).
Според него, здружението брои 550 члена.
„Секој што ќе објави две книги има право да аплицира за членство“, изјави Мишелко за СМЕ.
Според него, осомничениот напаѓач не бил во ниеден орган на здружението.
„Речиси никој од одборот не го познава. Според моите сознанија, тој се пријавил за членство пред девет години. Не го познавам лично“, рече Мишелко.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Орбан: Унгарија успеа да се спротивстави на притисокот од Брисел

Орбан нагласи за унгарскиот јавен сервис дека владата со двотретинско мнозинство, која беше избрана во 2022 година, е клучна за зачувување на независноста на Унгарија во односите со Европската Унија.
„Европските бирократи вршат голем притисок врз земјите-членки да овозможат почеток на преговорите за пристапување со Украина, со поддршка на повеќе од 30.000 бирократи. Унгарија, сепак, стои цврсто затоа што народот создаде стабилна влада“, рече Орбан.
Тој нагласи дека, додека многу европски влади имаат коалиции што го отежнуваат постигнувањето обединета позиција, Унгарија ужива политичка стабилност што ѝ овозможува да се спротивстави на надворешните притисоци.
Унгарскиот премиер нагласи дека оваа стабилност е најважната предност на Унгарија во меѓународната конкуренција и рече дека земјата продолжува да се спротивставува на сите обиди за доведување во прашање на нејзиниот суверенитет.
Орбан, исто така, ја поздрави победата на Карол Навроцки на претседателските избори во Полска, нарекувајќи ја фантастичен резултат за Унгарија, што, според него, е продолжение на маршот на патриотите.
Тој додаде дека „Вашингтон експрес штотуку пристигна во Варшава“, алудирајќи на растечкото влијание на САД во регионот.
Свет
Трамп назначи 22-годишен градинар за шеф на канцеларијата за спречување на тероризам

Американскиот претседател, Доналд Трамп, назначи 22-годишник за раководител на главниот центар за спречување на тероризам на Министерството за внатрешна безбедност. Тој претходно работел како градинар и продавач во маркет.
Кариерата на Томас Фугејт тргна во миг. Само една година по дипломирањето, 22-годишникот без видливо искуство во националната безбедност сега е службеник во Министерството за внатрешна безбедност на САД, задолжен за главната владина агенција за спречување на тероризам.
Белата куќа го назначи Фугејт, кој претходно работеше во кампањата на Трамп и беше практикант во десничарската Фондација Херитиџ, на позиција во Министерството за внатрешна безбедност, која подоцна беше проширена за да го вклучи и Центарот за програми и партнерства за превенција (CP3). Канцеларијата ги води националните напори за спречување на злосторства од омраза, пукања во училиштата и други форми на целно насилство.
ProPublica известува дека назначувањето на Фугејт е најновиот шок за канцеларијата која е практично уништена откако Доналд Трамп се врати во Белата куќа и започна со ревизија на политиката за национална безбедност, фокусирајќи се речиси исклучиво на имиграцијата.
Веста за назначувањето предизвикува загриженост кај експертите за борба против тероризмот и непрофитните организации финансирани од CP3. Неколкумина признаа дека морале да побараат информации за Фугејт на LinkedIn – бидејќи никој во индустријата не го познавал.
Според неговиот профил, тој работел во супермаркет во Остин дури до август 2023 година како „член на тимот со повеќе функции“.
„Вршам разни задачи во секој оддел од продавницата, исполнувајќи клучни должности што придонесуваат за работењето на продавницата“, напишал Фугејт во своето CV.
Неговата прва работа во 2020 година била уредување на пејзажи. Тој напишал дека работи за своја компанија и дека неговата работа вклучува „косење тревници, корнење плевел, рабови на тревници и чистење на остатоци“.
Фугејт, исто така, завршил четиримесечен стаж во 2023 година во Фондацијата Херитиџ, конзервативен тинк-тенк кој стои зад контроверзниот „Проект 2025“, визија за целосна реконструкција на федералната влада.
Висок функционер во Центарот за програми и партнерства за превенција изјави за ProPublica дека на Фугејт „привремено му се дадени дополнителни лидерски одговорности поради неговиот успех“.
„Тоа е признание за неговиот ентузијазам за работата и неговиот успех на работното место“, рече функционерот.
Сепак, истражувачите за борба против тероризмот наводно се загрижени за назначувањето на Фугејт, со оглед на неговото неискуство.
„Можеби е чудо од дете. Можеби е како Дуги Хаузер и има што е потребно за да води канцеларија на 21 година. Но, тоа веројатно не е случај. Звучи како да поставиле практикант на чело“, изјави еден истражувач за ProPublica.
Свет
Русија го нападна Киев со ракети и дронови, погодени воз и станбени згради

Русија изврши интензивен ракетен и беспилотен напад врз украинскиот главен град Киев, во текот на ноќта, при што загинаа четири лица, соопштија украинските власти, додека моќни експлозии одекнуваа низ целиот град.
Нападот следеше по предупредувањето од рускиот претседател Владимир Путин, пренесено од американскиот лидер Доналд Трамп, дека Кремљ ќе возврати за нападот во кој украинските беспилотни летала уништија неколку стратешки бомбардери во напади во Русија.
Градоначалникот на Киев, Виталиј Кличко, изјави дека 20 лица се повредени, од кои 16 се во болница, а четири лица починаа.
„Градското метро беше нарушено од руски напад што погоди и оштети воз помеѓу станиците“, соопшти воената администрација на Киев.
„Во населбата Соломенски, руски дрон погоди станбена зграда, оставајќи огромна дупка и трага од оган“, изјави фотограф на „Ројтерс“ на местото на настанот.
Порано таа вечер, новинарите на „Ројтерс“ го слушнаа звукот на руските беспилотни летала, заедно со звуците на украинската воздушна одбрана.
Сведоци на „Ројтерс“ пријавија серија продорни експлозии доволно силни за да ги потресат прозорците далеку од местото на ударот.
Некои жители на Киев побараа засолниште во метро станиците или подземните гаражи.
Украинските воздухопловни сили соопштија дека градот бил цел на беспилотни летала и крстосувачки ракети „Калибр“.
Во еден од најсмелите напади од почетокот на војната меѓу Украина и Русија, Украина минатиот викенд уништи некои од руските стратешки бомбардери на земја користејќи беспилотни летала скриени во дрвени куќи.
Кремљ најави одмазда за украинскиот напад врз руските воздухопловни бази, рече Трамп по телефонскиот разговор со Путин во средата.