Свет
Американски адмирал предупредува: Националната безбедност на САД е загрозена
Националната безбедност на САД е загрозена од бранови руски и кинески граѓани кои се обидуваат да се инфилтрираат во воените бази, предупреди Дерил Кодл, адмирал на американската морнарица.
Како што пренесува „Дејли Мејл“, шефот на командата на американската морнарица тврди дека обидите за инфилтрација се случуваат „два или три пати неделно“, само во поморските бази.
Минатата година кинеските граѓани направиле повеќе од сто обиди, а кога ќе бидат откриени, тие тврдат дека се невини туристи.
„Овие ситуации и обиди за упад во нашите воени бази од странски државјани стануваат се почести“, рече адмиралот Кодл и продолжи:
„Тоа се руски или кинески државјани, но има и други националности. Во повеќето случаи тие имаат пасоши и документи, но не постои начин да се добие овластување за влез во базата. Многу ни е тешко да ги утврдиме мотивите во сите туку случаите“.
Повеќето странски државјани кои се фатени добиваат мали казни и им се советува да не се враќаат, бидејќи нивните прекршоци не се сметаат за федерални злосторства, вели тој.
„Ова е нешто што го гледаме веројатно два или три пати неделно, каде што ги запираме овие луѓе на портата, а се работи само за морнарицата. Тие обично имаат слична приказна. Јас сум студент, јас сум ентузијаст, јас сакам да ги видам бродовите“, рече Кодл.
Загриженоста за намерите на Пекинг се зголеми во услови на зголемување од 8.000 отсто на бројот на кинески државјани за кои се знае дека ја преминале јужната граница во последните три години. Повеќе од 24.000 се пресретнати во тековната фискална година, објави Комитетот за домашна безбедност на Претставничкиот дом минатиот месец. Барањата за азил им се одобруваат на кинеските мигранти повеќе од која било друга националност.
Емили Хардинг, поранешен вработен во Комитетот за разузнавање на Сенатот, неодамна изјави дека кинеската шпионска операција е повеќе игра со бројки.
Амбасадата на Република Кина во Вашингтон ги отфрли овие наводи како „намерна измислица“.
„Апелираме до релевантните американски институции да го напуштат менталитетот на Студената војна, да престанат со неоснованите обвинувања и да направат повеќе за взаемната доверба меѓу двете земји и пријателството меѓу двата народа“, рече портпаролот Лиу Пенг Џу.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Марта Кос: Проширувањето е значајно и за Словенија и за Европската Унија
Марта Кос, словенечката кандидатка за еврокомесар денеска изјави дека проширувањето е синоним за ЕУ.
„За мене, проширувањето е синоним за ЕУ, а ЕУ е синоним за мир. Понатаму, мирот претставува стабилност, безбедност, иднина, поврзаност и инклузија“, додаде Кос, претставувајќи ја својата кандидатура за еврокомесар пред Комисијата на националното собрание за ЕУ.
Таа укажа на важноста на портфолиото на проширување и за Словенија и за ЕУ и додаде дека е убедена дека нејзините вештини ќе бидат најочигледни во оваа област.
Кос пред Комитетот, чие мислење не е обврзувачко, изјави дека исполнува три клучни услови за еврокомесар: компетентност, посветеност на ЕУ и независност.
„Вредностите и целите на ЕУ се свети за мене“, рече таа, пренесува агенцијата „СТА“.
Таа посочи дека успешната интеграција на Словенија во ЕУ може да послужи како вреден пример за другите земји од Западен Балкан кои се стремат да се приклучат.
Според неа, напредокот на Словенија и ЕУ е меѓусебно поврзан со напредокот и развојот на нејзините соседи.
Кос повика и на поблиска соработка со Националното собрание и предложи годишно обраќање до парламентот, кое ќе следи по говорот на претседателката на Европската комисија, Урсула фон дер Лајен, за состојбата на Унијата во Европскиот парламент, пренесува Танјуг.
Свет
Нетанјаху вети дека ќе ги врати жителите на северот во нивните домови
Израелскиот премиер Бенјамин Нетанјаху вети дека ќе ги врати во своите домови десетиците илјади жители евакуирани од северната погранична област со Либан.
„Реков претходно, ќе ги вратиме жителите на северот во нивните домови безбедно и токму тоа ќе го направиме“, објави Нетанјаху во кратката видео порака.
Тој не ги спомна експлозиите насочени кон Хезболах во Либан во изминатите два дена, пренесоа агенциите.
Во меѓувреме, бројот на жртвите од денешните најнови експлозии на комуникациски уреди низ Либан се зголеми од девет на 14, а повеќе од 450 луѓе се ранети, соопшти либанското Министерство за здравство.
Началникот на израелската армија, генерал-полковник Херзи Халеви изјави подоцна оваа вечер дека Израел подготвил дополнителни планови против Хезболах и е подготвен да нападне.
Израел има „многу повеќе опции“ кои се уште не се искористени во борбата против Хезболах, објави „Тајмс оф Израел“.
„Имаме многу можности кои се уште не се активирани, видовме некои од овие работи и ми се чини дека сме добро подготвени и се подготвуваме да ги реализираме овие планови“, рече Халеви и додаде дека во секоја фаза цената за Хезболах треба да биде висока, пренесе медиумот.
Свет
Уште една жртва од поплавите во Чешка, Полска и Унгарија ги зајакнуваат насипите околу реките
Чешката Република соопшти дека бројот на жртвите од катастрофалните поплави во земјата, кои ја погодија централна Европа, се искачи на четири, додека во Полска и Унгарија волонтери и персонал за итни случаи брзаат да ги зајакнат заштитните насипи околу реките, бидејќи нивото на водата почна да расте, пренесува Ројтерс.
Најлошите поплави што ја погодија централна Европа во најмалку две децении оставија зад себе трага на уништување што се протега од Романија до Полска, оставајќи затрупани градови во кал и урнатини, уништени мостови и потонати автомобили.
Домаќинствата и владите на погодените земји се соочуваат со штети кои можат да се измерат во милијарди долари, пренесува медиумот.
Со пријавена нова жртва во Чешка, бројот на загинати во Европа од поплавите се искачи на 23.
Според официјалните податоци, по седум лица загинале во Романија и Полска, а уште пет во Австрија.
Новооткриената жртва во Чешка, 70-годишна старица од село, била пронајдена на 20 метри од нејзината куќа. Таа била евакуирана во саботата, но следниот ден го напуштила центарот за евакуација за да се врати дома, објави чешката телевизија.
Во таа земја водата главно се повлекува, но нивото на водата се уште е на својот врв во некои делови на јужна Бохемија.
Во Вроцлав, Полска, голем број луѓе редат вреќи со песок од рака на рака за да се зацврстат бреговите на реката Одра. На југ од таму, тоа го прават полските војници. Највисок водостој во Вроцлав се очекува утре.
Во Унгарија, властите отворија брана во северозападниот дел на земјата за да ја пренасочат водата од реката Лејте во еден резервоар и да ги заштитат градовите.
Во Будимпешта, Дунав се очекува да се искачи на највисокото ниво – над 8,5 метри, во петок или сабота.
Во исто време, силно невреме и се заканува на Италија.
Предупредувања за силен дожд, ветрови и поплави се издадени во поголемиот дел од Италија, јавува Би-Би-Си.
Веќе се објавени извештаи за поплави во Пескара во централна Италија, додека италијанската метеоролошка служба предупредува дека невремето ќе го погоди северниот брег на регионот Емилија-Ромања.
На поплави во наредните денови предупредуваат и властите во Хрватска, Унгарија, Словачка и Полска, јавува Танјуг.