Македонија
Левица: Арсовска предложи набавка на еко-автобуси, ДПМНЕ гласаше против, водат инат на сметка на скопјани
Набавката на нови еко – автобуси за скопјани е точка на Дневен ред, ставена од градоначалничката на Град Скопје, за која советниците од ВМРО – ДПМНЕ гласаа против. Советниците од Левица апелираа до ВМРО-ДПМНЕ – да не се води инает на штета на граѓаните.
– Многу ми е жал што на волку важна точка за набавка на нови еко – автобуси, коишто му се нужно потребни на градот Скопје, за да, конечно, може сообраќајот во градот Скопје да почне да функционира, Советот наликува: не на средно училиште, туку на детска градинка! Се изнаслушавме сѐ и сешто тука, само не причини ЗА или ПРОТИВ набавката на нови автобуси. Колегата Филип којшто зборуваше некои десетина минути, ништо не кажа од причини зошто да не се набават нови автобуси? Наместо тоа, упатуваше критика кон градоначалникот на Град Скопје – истакна советничката од Левица во Советот на Град Скопје, Катерина Јовановска.
Јовановска ги праша советниците од ДПМНЕ за кој градоначалник гласаа пред две и пол години.
– Кој градоначалник го шетаа низ Скопје со Програмата ,,Подобро Скопје” и го промовираа како најдобар градоначалник за Град Скопје? Кој го донесе градоначалникот на Град Скопје на позицијата Градоначалник на Град Скопје, за вие да го саботирате сега и Градот Скопје да биде заложник на вашите војни што ги водите со вашиот кандидат за градоначалник? Каков е, таков е – вие си го гласавте… Меѓутоа, кажете причина зошто да не се набават нови автобуси – потенцираше Јовановска.
Според Јовановска од Левица, граѓаните се заложници на војната и инаетот што советниците од ДПМНЕ го водат со својот кандидат за градоначалник на Скопје.
– Повторно ли водите инает со градоначалникот и заради тоа граѓаните нема да имаат нови автобуси? Граѓаните ја избраа, ама вие ја предложивте. Каде ви беше профилирањето на кадарот за градоначалник кога го промовиравте како кандидат? Вие го предложивте, не го предложија граѓаните – рече Јовановска.
– Исто како што претходно кажав дека долго време нема да има училишта и градинки, уште долго време нема да има ни автобуси – додаде Јовановска.
Во име на советниците од Левица, Јовановска упати апел до советниците од ДПМНЕ да направат нешто за државата, за градот Скопје и за граѓаните.
– Не ве избраа граѓаните да водите битки со градоначалникот или со граѓаните, не ве избраа за да покажувате ароганција тука, ве избраа за да работите за нивен интерес – апелираше советничката од Левица во Град Скопје, обраќајќи им се на советниците од ДПМНЕ.
Јовановска потсети дека ДПМНЕ има апсолутна власт во државата, има претседател на државата, има во Собрание мнозинство, наскоро ќе има и Влада, имаат и градоначалници во цела Македонија, освен тројца, и имаат Градоначалник на Град Скопје, кому му водат инает за да се реализираат проекти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Бегај од Скопје се сели во Тетово, Гостивар и Дебар, улиците ќе бидат затворени
Во Тетово, Гостивар и Дебар денеска ќе има посебен сообраќаен режим поради престојот на претседателот на Албанија, Бајрам Бегај, кој ја завршува тридневната официјална посета на земјава.
Општина Тетово и СВР Тетово информираат дека денеска во градот ќе има привремени безбедносни мерки, посебен режим во сообраќајот и забрана за паркирање на повеќе улици по повод посетата на претседателот на Република Албанија Бајрам Бегај на Тетово.
Општина Тетово препорачува возила да не се паркираат на булевар „Маршал Тито“ од почетокот до кружниот тек кај пазарот со булевар „Благоја Тоска“, на булевар „Благоја Тоска“ од кружниот тек со булевар „Маршал Тито“ до зградата на Општина Тетово, на улица „ЈНА“ („Дервиш Цара“) во целост, до семафорите, на улица „Илинденска“ од Основен суд до Универзитетот на Југоисточна Европа, на улица „Киро Ристоски-Дрнц до Арабати Баба Теќе, на улица „ВонВардарска“ и на улица „172“.
-Возилата паркирани спротивно на известувањето ќе бидат отстранети од страна на службите, наведуваат од Општина Тетово.
СВР Тетово апелира до сите учесници во сообраќајот да ги почитуваат наредбите и упатствата што ќе ги даваат полициските службеници, со цел непречено и безбедно одвивање на сообраќајот.
-Полициската станица за безбедност на патниот сообраќај Тетово и Полициското одделение за безбедноста на патниот сообраќај Гостивар при СВР Тетово ќе преземат мерки за посебен режим на сообраќајот по сообраќајниците на поширокото централно подрачје на Тетово и Гостивар, посочија од СВР Тетово.
Согласно агендата, претседателот Бегај ќе ја посети Општина Тетово, ООУ „Лирија“, Шарената џамија и Арабати Баба Теќе.
Албанскиот претседател, Бајрам Бегај, кој е во тридневна официјална посета на земјава, по посетата на општина Гостивар, престојот ќе го заокружи со посета на Дебар, во попладевните часови, од каде преку граничниот премин Блато ќе замине за Албанија.
По тој повод од ОВР Дебар соопштија дека попландево во сила ќе биде посебен сообраќаен режим со цел непречено движење на возилата од делегацијата и непречено одвивање на предвидените активности.
-За таа цел, полициски службеници од ОВР Дебар и СВР Охрид, ќе вршат физичко обезбедување на трасата на движење како и на објектите каде се предвидени работни средби. Мерките стартуваат утре, 28 февуари од 12 часот и ќе траат до 19 часот, информираше Стефан Димоски, портпарол на Секорот за внатрешни работи -Охрид.
Дообјаснува дека посебниот сообраќаен режим ќе се спроведува со повремено затворање за сообраќај на регионалниот пат Р-1202, од Бошков мост до Дебар, улиците „Елена Ѓика“ од АД „Кнауф“ до кружен тек „Енѓи“, улиците „Иса Болетини“, „Јусуф Грвала“ и регионалниот пат Р-1201 до улиците „Мојси Големи“, „Амди Леши“, Јосиф Багери и регионалниот пат 1202 Дебар- граничен премин Блато.
-Апелираме до граѓаните и до сите учесници во сообраќајот, да се придржуваат до насоките на полициските службеници кои ќе вршат обезбедување и на исклучивост во користењето на своите моторни возила во овој временски период, посочува Димоски.
Според Општна Дебар, Бегај ќе се сретне со градоначалникот, Фисник Меља, но не се предвидени изјави.
Претседателката Гордана Сиљановска-Давкова вчера со државни и воени почести го пречека претседателот на Албанија Бајрам Бегај.
Македонија
Орце во ноќен увид на улиците кои се реконструираат низ Скопје, вели се работи и дење и ноќе
Во завршна фаза е изградбата на улицата „Фрањо Клуз“ во Аеродром која е една од најзначајните сообраќајници во овој дел од градот. Се работи со полна динамика, и дење и ноќе, затоа што скопјани заслужуваат модерен, функционален и безбеден град, објави вчера вечерта градоначалникот на Град Скопје, Орце Ѓорѓиевски.
-Делата говорат. Скопје не смее да чека. Скопје мора да се развива – посветено и со визија. Она што со години било запоставувано и туркано под тепих, денес се решава темелно и одговорно – објави на Фејсбук Ѓорѓиевски.

Реконструкцијата опфаќа нов тампон, двослоен асфалт, нови рабници, а во овој момент интензивно се асфалтираат тротоарите. Во должина од еден километар се изведуваат нови тротоари, се поставува современо улично осветлување и се гради нова атмосферска канализација.
– Од наредната недела, жителите на Аеродром ќе возат по нова, современа и безбедна улица. За само три месеци од преземањето на функцијата градоначалник на Скопје, покажавме дека кога се работи со срце, визија и чесна намера – резултатите се очигледни. Не ветивме чуда, туку работа. И работиме – објави Ѓорѓиевски.
Ѓорѓиевски, вели дека ова е само почеток и најавува дека следува најголемата инфраструктурна обнова досега.
– Ќе се работи рамномерно, во секој дел на Скопје. Затоа што секој заслужува исти услови, исти шанси и ист квалитет на живот.
Мојот народ го заслужува најдоброто – објави Ѓорѓиевски.
Македонија
Пролетен ден во зима, денес сонце и температури до 15 степени
Времето денеска ќе биде сончево со мала до умерена локална облачност. По одделни котлини ќе има услови за појава на магла. Ќе дува слаб ветер од југоисточен правец.
Минималната температура ќе биде во интервал од -3 до 6, а максималната ќе достигне од 10 до 15 степени.
Во Скопје, сончево со мала до умерена облачност и со слаб југоисточен ветер. Во делови од котлината ќе има услови за појава на утринска магла. Минималната температура ќе се спушти до -1, а максималната ќе достигне до 15 степени.
Во наредните денови продолжува периодот на стабилно и релативно топло време. Утрата ќе бидат постудени и по одделни котлини ќе има услови за појава на слаба магла.

