Свет
Мексико доби претседателка на историските избори
Кандидатката на владејачката партија во Мексико, Клаудија Шејнбаум, победи на вчера одржаните претседателски избори, покажуваат излезните анкети. Мексиканците вчера излегоа на историски избори каде се очекуваше за прв пат да изберат жена за претседател.
Шејнбаум (61) доби 57,8 отсто од гласовите, а нејзиниот најблизок противник, сенаторот од десниот центар Ксочитл Галвез, 29,1 отсто, покажуваат резултатите од анкетата на Институтот Енкол. На трето место е центристичкиот кандидат Алварез Мајнез со 11,4 отсто од гласовите, покажува истата анкета.
Шефот на владејачката партија Морена, Марио Делгадо, им рече на приврзаниците во Мексико Сити дека Шејнбаум победила со голема разлика. Шејнбаум, климатски научник и поранешна градоначалничка на Мексико Сити, е долгогодишен сојузник на актуелниот левичарски популистички претседател Андрес Мануел Лопез Обрадор, кому му беше забрането да се кандидира за реизбор по шест години на функцијата.
Таа ги отфрли тврдењата на опозицијата дека ќе биде „марионета“ на Лопез Обрадор, иако вети дека ќе продолжи со многу од неговите политики, вклучително и оние кои им помагаат на најсиромашните Мексиканци.
Речиси 100 милиони Мексиканци имаа право на глас на изборите, кога гласаа и за градоначалник на главниот град, осум гувернерски позиции, двата дома на парламентот и голем број други регионални и локални функции.
Најголемите избори некогаш одржани во Мексико беа и најнасилните во модерната историја, со убиство на 38 лица. Насилството ја поттикна загриженоста за демократијата поради завојуваните нарко картели.
Вчера две лица беа убиени на избирачките места во државата Пуебла. Победата за Шејнбаум би била голем чекор за Мексико, земја позната по својата мачо култура. Победникот треба да започне со шестгодишен мандат на 1 октомври.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Во Јабланица прогласена тридневна жалост: Загинаа 15 лица, се трага по уште исчезнати
Градоначалникот на општина Јабланица Дамир Шабановиќ деновите од недела до вторник ги прогласи за Денови на жалост во врска со трагичната смрт на сограѓанин во природна катастрофа што го зафати подрачјето на Јабланица, пренесува Ал Џезира Балканс.
Деновите на жалост се одбележуваат со спуштање на знамињата на половина копје на зградите на општината и јавните установи основани од општина Јабланица.
Културни, забавни и слични програми нема да се одржуваат на јавни места, а физичките и правните лица кои вршат угостителска дејност, како и локалните медиуми ќе го приспособат своето работење.
Досега на подрачјето на Јабланица и Коњица се пронајдени телата на 15 лица, а по 10 до 15 исчезнати лица се уште се трага.
Регион
Дрвја и кал во БиХ, местата зафатени од поплавите се непрепознатливи
По поплавите што вчера ја зафатија БиХ, најтешка е состојбата во општина Јабланица, каде што најголем број урнати згради и објекти се под вода, а истото е и во Трусина и Бутуровиќ Поље, јави телевизијата БХТ1.
Новинарка на телевизијата, која известува од терен, изјави дека овие места се непрепознатливи.
-Можеме да видиме само дрвја и вода, кал, се’ лебди на површината на водата, можеме да видиме загрижени жители, изјави таа и додаде дека веќе се започнати хуманитарни акции за помош на загрозените.
Според последните неофицијални податоци само на територијата на Јабланица како исчезнати се водат 48 лица, додека официјалните податоци велат дека по поројните поплави и свлечиштата кај Јабланица, Кониќ, Крешево и Кисељак, потврдена е смртта на 19 лица, а дека по многу други уште се трага.
Населението во погодените подрачја има потреба од итна помош, а најитни се конзервираната храна и вода во шишиња.
Патната комуникација е отежната, а на места и целосно прекината.
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај.
Регион
Страшни детали од поплавите во Босна и Херцеговина, загина трудница, а брачен пар се најдени гушнати
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај. Најмалку 21 лице го загуби животот во поплавите во БиХ, од кои 16 се сметаат за исчезнати.
„Најмалку 16 лица од областа на северна Херцеговина во моментов се водат како исчезнати, откако беше потврдено дека исто толку луѓе загинале само на подрачјето на Јабланица“, изјави премиерот на Федерацијата на БиХ, Нермин Никшиќ.
Затрупани се многу куќи, а утринава пристигна и дополнителна механизација.
Во тек е состанок на кризниот штаб за координација на спасувачките активности, а по него треба да се дознаат подетални информации за состојбата на теренот.
Најтешка е состојбата во Долна Јабланица каде се сомнева дека каменолом ја предизвикал трагедијата во населбата која е целосно затрупана со отпад од гранит.с